ސައުދީ އަރަބިއްޔާގެ ބޮޑުވަޒީރުގެ މަގާމަށް އެ ޤައުމުގެ ވަލީއަހުދު މުޙައްމަދު ބިން ސަލްމާން އައްޔަން ކުރައްވައިފިއެވެ.
މުޙައްމަދު ބިން ސަލްމާން އެ މަގާމަށް އައްޔަން ކުރެއްވީ އެމަނިކުފާނުގެ ބައްޕާފުޅު އަދި ސައުދީގެ ރަސްގެފާނު ސަލްމާންއެވެ. އެމަނިކުފާނު ވަނީ ކެބިނެޓަށް ބަދަލުތައް ގެންނަވައި އަންގާރަ ދުވަހު ޝާހީ އަމުރެއް ނެރުއްވާފައެވެ.
ބޮޑުވަޒީރު ކަމަށް އައްޔަން ކުރެއްވުމުގެ ކުރިން މުޙައްމަދު ބިން ސަލްމާން ހުންނެވީ ބޮޑުވަޒީރުގެ ނައިބުގެ މަގާމާއި ޑިފެންސް މިނިސްޓަރުގެ މަގާމުގައެވެ. އެމަނިކުފާނުގެ ބަދަލުގައި ޑިފެންސް މިނިސްޓަރަކަށް އައްޔަން ކުރައްވާފައިވަނީ އެ މިނިސްޓްރީގެ ނައިބެއްގެ މަގާމުގައި ހުންނެވި އެ މަނިކުފާނުގެ ކޮއްކޯފުޅު ޚާލިދު ބިން ސަލްމާނެވެ.
ކެބިނެޓަށް ބަދަލުތައް ގެންނެވި ސަބަބެއް ސައުދީގެ ރަސްގެފާނު ހާމަނުކުރައްވައެވެ. ނަމަވެސް ބޭރުގެ މީދިއާތަކުން ރިޕޯޓު ކުރާ ގޮތުގައި މިއީ އެމަނިކުފާނު އާލާސްކަންފުޅާ އުޅުއްވާތީ ބާރުތައް މަޑުމަޑުން ވަލީއަހުދާ ހަވާލުކުރެއްވުމަށް ކުރައްވަމުން ގެންދަވާ މަސައްކަތެވެ.
ބޮޑުވަޒީރު ކަމާ ހަވާލުވެވަޑައިގަތުމުގެ ކުރިންވެސް ރަސްގެފާނު ވަނީ މުޙައްމަދު ބިން ސަލްމާނާއި އެ ޤައުމުގެ ގިނަ ކަންކަން ހަވާލުކުރައްވާފައެެވެ. އެގޮތުން، އިގްތިސާދާއި ޑިފެންސާއި ތެލުގެ ކަންކަމާއި ޤައުމުގެ ދާޚިލީ ސެކިއުރިޓީގެ ކަންކަން ވެސް ހަވާލުކުރައްވާފައި އޮތީ އެމަނިކުފާނާއެވެ.
މުޙައްމަދު ބިން ސަލްމާނާ ބޮޑުވަޒީރުކަން ހަވާލު ކުރެއްވި ނަމަވެސް އަދިވެސް ސައުދީގެ ހެޑް އޮފް ސްޓޭޓްގެ މަގާމު އަދާކުރައްވާނީ ރަސްގެފާނު ސަލްމާންއެވެ. އަދި ކުރިއަށް އޮތް ދުވަސްތަކުގައި ކެބިނެޓް ބައްދަލުވުންތަކުގެ ޗެއަރކަން ވެސް އަދާކުރައްވާނީ އެމަނިކުފާނެވެ.
ސައުދީގެ ވަލީއަހުދަކަށް މުޙައްމަދު ބިން ސަލްމާން އައްޔަން ކުރައްވާފައިވަނީ 2017 ވަނައަހަރުއެވެ. އެހެންކަމުން ބައްޕާފުޅު ސަލްމާން އަވާހަރަވުމުން ސައުދީގެ ރަސްކަމާ ހަވާލުވެވަޑައިގަންނަވާނީ މުޙައްމަދު ބިން ސަލްމާނެވެ.
