މަސް ނުގަނެވުން އެންމެ ގިނައީ ކޫއްޑޫގައި، ހައްލު ނުކުރެވި ވަނީ މާލީ ދަތިތަކުގެ ސަބަބުން: މިނިސްޓަރު
26 ސެޕްޓެމްބަރު 2022 | ހޯމަ 05:20މަސްވެރިކަމާއި ގުޅުން ހުރި މަޝްރޫޢުތައް ނުނިމުމާއި މަސްވެރިންގެ ހުރި ޝަކުވާތަކާއި ގުޅޭގޮތުން މެމްބަރުން ވަނީ ވަަރަށް ބޮޑަށް ކަންބޮޑުވުން ފާޅުކުރައްވާފައި
މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޑޮކްޓަރ ޙުސައިން ރަޝީދު ޙަސަންއާ ސުވާލުކުރެއްވުން
މަސް ނުގަނެވި އެންމެ ގިނަ މީހުން ކިއުގައި ތިބޭ ކަމަށް ފާހަގަކުރެވެނީ ކޫއްޑޫގައި ކަމަށް ފިޝަރީޒް މިނިސްޓަރު ޑރ.ހުސެއިން ރަޝީދު ހަސަން ވިދާޅުވެއްޖެއެވެ.
ހޯމަ ދުވަހުގެ ޖަލްސާއަށް މިނިސްޓަރު ހާޒިރުކުރެއްވީ މަޖިލީހުގެ މަޑަވެލި ދާއިރާގެ މެމްބަރު ހުސެއިން ފިރުޝާން ކުރެއްވި ސުވާލަކާއި ގުޅިގެންނެވެ. އޭނާ ސުވާލުކުރައްވާފައި ވަނީ މި އަހަރުގެ މޭއި މަހުގެ ތެރޭގައި މަޖިލީހުގައި ވާހަކަދައްކަވަމުން ކޯލްޑް ސްޓޯރޭޖް އިތުރު ކުރާނެ ކަމަށް މިނިސްޓަރު ވިދާޅުވެފައިވާތީ އެކަމާއި ގުޅިގެން ކުރާ މަސައްކަތަކީ ކޮބާތޯ ބެލުމަށެވެ. ޖަވާބުގައި މިނިސްޓަރު ވިދާޅުވީ އެ ދުވަހު މަޖިލީހުގައި އެމަނިކުފާނު ވާހަކަދެއްކެވީ މަސްވެރިން ބާނާ މަސް ނުގަނެވޭ މައްސަލަ ހައްލުކުރުމަށް ކުރު މުއްދަތުގައި އާއި ދިގު މުއްދަތުގައި ކުރެވިދާނެ ކަންކަމާއި ގުޅޭގޮތުން ކަމަށެވެ. އެގޮތުން ކެޕޭސިޓީ އިތުރު ކުރުމުގެ ވާހަކަ ދެއްކެވީ ދިގު މުއްދަތުގައި ކުރެވިދާނެ ކަންކަމުގެ ތެރޭގައި ކަމަށް މިނިސްޓަރު ވިދާޅުވިއެވެ.
މަޖިލީހުގައި އިތުރަށް ވާހަކަަދައްކަވަމުން މިނިސްޓަރު ވިދާޅުވީ ކޫއްޑޫގައި ދިމާވާ މަސް ގަތުމުގެ މައްސަލަ ހައްލުކުރަން ބްރައިން ފްރީޒިން ކެޕޭސިޓީ 81000 ޓަނާއި ހަމައަށް އިތުރުކުރަން ހުށަހަޅާފައިވާނެ ކަމަށެވެ. އެ މަސައްކަތް ނުކުރެވުނީ އެކަމަށް ބޭނުންވާ ފައިސާ މިފްކޯއަށް ނުލިބިގެން ކަމާށާއި އެހިސާބުން ދެން ބެލީ ވެސެލް ގަނެގެން އެ މައްސަލަ ހައްލުކުރެވޭތޯ ކަމަށް މިނިސްޓަރު ވިދާޅުވިއެވެ. ނަމަވެސް އެ ފައިސާ ވެސް އެވަގުތު ހަމަޖެހޭ ގޮތްނުވި ކަމަށާއި ފަހުން ފައިސާ ހަމަޖެހުނު އިރު ކުރިން ހޯދި ވެސެލްތައް ލިބެން ނެތް ކަމަށް މިނިސްޓަރު ވިދާޅުވިއެވެ. މީގެ އިތުރުން ދިގު މުއްދަތަކަށް ބަލާއިރު މަސް ގަތުމުގެ ކެޕޭސިޓީ އިތުރުކުރަން ފިޔަވަޅުތައް އަޅަން ނިންމާފައިވާ ކަމަށް މިނިސްޓަރު ވިދާޅުވިއެވެ.
މީގެއިތުރުން ކޯލްޑް ސްޓޯރޭޖްގެ ކެޕޭސިޓީ އިތުރުކުރުމުގެ އިތުރުން، ކޫއްޑޫގެ ބަނދަރު ތަރައްޤީކޮށް، ފެލިވަރުގެ އާ ބަނދަރު ޤާއިމްކުރުމުން ވެސް މަސް ގަތުމަށް ދިމާވާ ދަތިތަކަށް ލުޔެއް ލިބޭނެކަމަށް މިނިސްޓަރު ވިދާޅުވިއެވެ. ރާއްޖޭގައި މަސް ކިރުމުގެ މައްސަލަ ދިމާވަނީ މަސްވެރިކަން ރަނގަޅު ދުވަސްވަރު އެކަނި ކަމަށް މިނިސްޓަރު ފާހަގަކުރެއްވިއެވެ. އެގޮތުން މަސް ނުގަނެވުމުގެ މައްސަލަ ދިމާވަނީ އޮކްޓޯބަރު މަހުން ފެށިގެން 7 މަސް ދުވަހުގެ މުއްދަތުގައި އެކަނި ކަމަށާއި އަނެއް 5 މަސް ދުވަހު މަސް ކިރުމުގެ މައްސަލަ ދިމާ ނުވާ ކަމަށް މިނިސްޓަރު ވިދާޅުވިއެވެ. މިނިސްޓަރު ވަނީ މި މައްސަލަ ހައްލުކުރަން މަސައްކަތް ކުރި ހަމައެކަނި ސަރުކާރަކީ ރައީސް އިބްރާހިމް މުހައްމަދު ޞާލިހުގެ ސަރުކާރު ކަމަށް ވެސް ވިދާޅުވެފައެވެ.
މިނިސްޓަރާ އިތުރު ސުވާލުކުރަން ލިބުނު ފުރުސަތުގައި މަސްވެރިކަމާއި ގުޅުން ހުރި މަޝްރޫޢުތައް ނުނިމުމާއި މަސްވެރިންގެ ހުރި ޝަކުވާތަކާއި ގުޅޭގޮތުން މެމްބަރުން ވަނީ ވަަރަށް ބޮޑަށް ކަންބޮޑުވުން ފާޅުކުރައްވާފައެވެ. އަދި މިނިސްޓަރުގެ ޖަވާބުތަކާ މެދު ހިތްހަމަޖެހިވަޑައިނުގެން ވެސް ބައެއް މެމްބަރުން ވަނީ ފާޑުވިދާޅުވެފައެވެ.
