ފުރަތަމަ ތިން މެޗުންވެސް މޮޅުވެ ސެންޓްރަލް ލީގުގެ ޗެމްޕިއަންކަން ގުރައިދޫއަށް

ސެންޓްރަލް ލީގު ދެވަނަ ޑިވިޝަންގެ ޗެމްޕިއަންކަން ކ.ގުރައިދޫ ސްޕޯރޓްސް ރެކްރިއޭޝަން ކްލަބުން ހޯދައިފިއެވެ.

މާލެ އަތޮޅުގައި ފުޓްބޯޅައިގެ ގަދަ ބާރެއްގެ ގޮތުގައި ކުރިންވެސް އޮތް ގުރައިދޫ ޗެމްޕިއަންކަން ކަށަވަރުކޮށް, ފުރަތަމަ ޑިވިޝަންގެ ޖާގަ ޔަޤީންކުރީ ފުރަތަމަ ތިން މެޗުވެސް ކާމިޔާބުކޮށް, ބާކީ މެޗެއް އޮއްވައެވެ. ތިންވަނަ މެޗު ގުރައިދޫން ކާމިޔާބުކުރީ ގުޅި ފުޓްބޯޅަ ކްލަބާ ވާދަކޮށް 4-0 ނެވެ. މެޗުގައި އާލިމް އަބުދުލް ޤައްޔޫމް ތިން ލަނޑު ޖަހާ ހެޓްރިކް ހެދިއެވެ. މިއީ އޭނާ މުބާރާތުގައި ހެދި ދެވަނަ ހެޓްރިކެވެ. ގުރައިދޫގެ އަނެއް ލަނޑު ކާމިޔާބުކުރީ އަހުމަދު ނަބީލްއެވެ.

މިގްރޫޕްގެ ދެވަނާގައި މިވަގުތު އޮތީ މާފުށި ބަލިކުރި ގުޅިއެވެ. އެކަމަކު މިދެޓީމް މިއަދު ވާދަކުރާ މެޗުން މޮޅުވެގެން ދެވަނަ ޓީމްގެ ގޮތުގައި ފުރަތަމަ ޑިވިޝަނަށް ދިއުމުގެ ފުރުޞަތު މާފުއްޓަށްވެސް އަދި އެބައޮތެވެ.