ބަދުއަޚުލާގީ އަމަލު ހިންގި ވީޑިއޯތައް ބޭނުންކޮށްގެން ބްލެކްމެއިލްކުރިކަމަށް ތުހުމަތުކުރެވޭ މީހުންގެ ވަނަވަރު އާއްމުކޮށްފި
މި މައްސަލައިގައި ފަސް މީހުން ހައްޔަރުކުރިއިރު، ދެ މީހަކު ވަނީ ބަންދުން ދޫކޮށްލާފައި
ބަރަހަނާ މަންޒަރު ރެކޯޑްކޮށް އެ ވީޑިއޯ ބޭނުންކޮށްގެން ބްލެކްކުރިކަމުގެ ތުހުމަތުގައި ހައްޔަރުކުރި ތިން މީހުން
ބަންގްލަދޭޝްގެ ރައްޔިތެއްކަމަށްވާ އަލަމްގީރާއެކު ދިވެހިންގެ ތެރެއިން ގިނަ ބަޔަކު ބަދުއަޚުލާގީ އަމަލު ހިންގާ މަންޒަރު ބޭނުންކޮށްގެން ބްލެކްމެއިލް ކުރިކަމުގެ ތުހުމަތުގައި ހައްޔަރުކުރި މީހުންގެ ވަނަވަރު އާއްމުކޮށްފިއެވެ.
މި މީހުންގެ ވަނަވަރު އާއްމުކޮށް ފުލުހުން ބުނީ ބަދުއަޚުލާގީ މަންޒަރުތައް ރެކޯޑްކޮށް، އެ ވީޑިއޯތައް ލީކުކޮށްލާނެކަމަށް ބުނެ ބިރުދައްކައި، ބްލެކްމެއިލްކޮށް، ބޮޑެތި އަދަދުތަކުން ފައިސާ ދިނުމަށް ޑިމާންޑްކޮށް، އަދި ރެކޯޑްކޮށްފައިވާ ބައެއް ވީޑިއޯތައް އާންމުކޮށްފައިވާ މައްސަލައާ ގުޅިގެން މިހާތަނަށް ޖުމްލަ ފަސް މީހަކު ހައްޔަރުކޮށްފައިވާކަމަށެވެ. މީގެ ތެރެއިން ދެ މީހަކު ކޯޓަށް ހާޒިރުކުރުމުން، ބަންދުގައި ބަހައްޓަންޖެހޭ ސަބަބެއް ނެތްކަމަށް ނިންމައި، ކޯޓުން ދޫކޮށްލާފައިވާ ކަމަށްވެސް ފުލުހުން ބުންޏެވެ
ހައްޔަރުކުރި ފަސް މީހުންގެ ތެރެއިން ދެ މީހުން ދޫކޮށްލިނަމަވެސް ތިން މީހުން އަދިވެސް ތިބީ ފުލުހުންގެ ބެލުމުގެ ދަށުގައެވެ. އެއީ ބ. ދަރަވަންދޫ، އަކިރި، ހަމްދޫން އަބްދުﷲ (37އ) އާއި ބ. ދަރަވަންދޫ، ހީމަ، މުހައްމަދު މިހާދު މުސްތަފާ (24އ) އަދި ށ. ފުނަދޫ، ސީސްޓަރ، މައުމޫން މޫސާ (41އ)އެވެ.
މި މީހުންގެ ތެރެއިން ހަމްދޫން އަބްދުﷲ އާއި މުހައްމަދު މިހާދު މުސްތަފާ ހައްޔަރުކޮށްފައިވަނީ މި މަހުގެ 18 ވަނަ ދުވަހު ކަމަށް ފުލުހުން ބުންޏެވެ. ހަމްދޫންގެ ބަންދަށް 15 ދުވަސް ކޯޓުން ދީފައިވާއިރު މިހާދުގެ ބަންދަށް 7 ދުވަސް ކޯޓުން ވަނީ ދީފައެވެ.
މި މައްސަލައިގައި މައުމޫން މޫސާ ހައްޔަރު ކޮށްފައިވަނީ މި މަހުގެ 20 ވަނަ ދުވަހުއެވެ. އޭނާގެ ބަންދަށް ކޯޓުން ވަނީ 10 ދުވަހުގެ މުއްދަތެއް ޖަހާފައެވެ.
މި މައްސަލަ ފުލުހުން އިތުރަށް ތަހުގީގު ކުރަމުންދާއިރު މި މައްސަލައިގައި ހިމެނޭ ބަންގްލަދޭޝްގެ އަލަމްގީރު ވަނީ ދިވެހި ފިރިހެނުންތަކަކާއެކު ބަދުއަޚުލާގީ އަމަލު ހިންގިކަމަށް އިިއުތިރާފުވެފައެވެ. އަދި އެ މަންޒަރުތައް ވީޑިއޯކުރިކަމަށް ބުނެ ދައުލަތުން އުފުލާފައިވާ 40 ދައުވާއަށްވެސް މިހާރު އޭނާ ވަނީ އިއުތިރާފުވެފައެވެ.
މި މައްސަލައިގައި ވީޑިއޯތަކުން އަލަމްގީރާއެކު ފެންނަ ދިވެހިންތަކެއްވެސް ވަނީ ހައްޔަރުކޮށްފައެވެ. އަދި އެއްބައި މީހުންގެ ޝަރީއަތްވެސް ވަނީ ނިމިފައެވެ. އެ ގޮތުން މި މައްސަލައިގައި ހިމެނޭ ނާޒިމް ސައްތާރު އަލަމްގީރާއެކު ބަދުއަޚުލާގީ އަމަލު ހިންގިކަމަށް އެއްބަސްވެ، ކުށަށް ތައުބާވެފައިވާތީ، ކްރިމިނަލް ކޯޓުން ވަނީ އޭނާ ތިން މަހާއި 26 ދުވަހަށް ގޭގައި ބަންދުކުރުމަށް ހުކުމްކޮށްފައެވެ. އަދި ފުލުހުންގެ ޑްރަގް އެންފޯސްމަންޓް ޑިޕާޓްމަންޓްގައި މަސައްކަތްކުރި އަބްދުއްރަހުމާން ރަފީއުއަށް އިއްވާފައިވަނީ 1 އަހަރާއި ދެ މަހާއި 12 ދުވަހުގެ ޖަލު ހުކުމެކެވެ.
