ހުޅުމާލެއިން ގެއްލިގެން ހޯދާ ޒުވާނާ އެންމެ ފަހުން ފެނުނީ ޓެކްސީއަކަށް އަރަނިކޮށް
25 ސެޕްޓެމްބަރު 2022 | އާދީއްތަ 12:26އެންމެ ފަހުން އޭނާ ލައިގެން ހުރީ ޕީޗް ކުލައިގެ މާޖެހި އަތްކުރު ގަމީހެއް
ގެއްލިގެން ހޯދަމުން އަންނަ އަޒްހާން
މިމަހުގެ 19 ވަނަ ދުވަހު ހުޅުމާލެ ދެވަނަ ފިޔަވަހިން ގެއްލިގެން ހޯދަމުން އަންނަ މުހައްމަދު އަޒްހާން އެންމެ ފަހުން ފެނިފައި ވަނީ ހުދު ކާރަކަށް އަރައިގެން ދަނިކޮށް ކަމަށް ފުލުހުން ބުނެފިއެވެ.
އުމުރުން 27 އަހަރުގެ މުހައްމަދު އަޒްހާން ގެއްލިގެން ރިޕޯޓްކޮށްފައިވަނީ ސެޕްޓެމްބަރ 19 ވަނަ ދުވަހުގެ ރޭގަނޑު 7 ޖަހާ އެހާކަންހާއިރުކަމަށާއި، އަޒްހާން ހޯދުމުގެ މަސައްކަތް ކުރަމުން އަންނަކަމަށް ފުލުހުން ވަނީ ފާހަގަކޮށްފައެވެ. މެރާކީ ކެފޭގައި ބަރިސްތާއެއްގެ ވަޒީފާ އަދާކުރަމުން އަންނަ އަޒްހާން ދިރިއުޅެމުން އައީ ހިޔާ ޓަވަރުގެ ފްލެޓެއްގައި، އޭނާގެ އާއިލާއާ އެކުގައެވެ.
އާދިއްތަ ދުވަހު ފުލުހުން ބުނީ، ފުލުހުން މިހާތަށް ބެލި ބެލުމުން އަޒްހާން އެންމެ ފަހުން ފެނުނީ މިދިޔަ ހޯމަ ދުވަހު ފަތިހު ހިޔާ ފްލެޓުގެ 13 ވަނަ ޓަވަރު ކައިރިން ހުދު ކުލައިގެ ޓެކްސީއަކަށް އަރަނިކޮށް ކަމަށެވެ. އެ ސަރަހައްދުގެ ސީސީޓީވީ ފުޓޭޖްތައް ބެލުމުން، އެ ދުވަހުގެ ފަތިހު 4:53 ހާއިރު އަޒުހާން ޓެކްސީއަކަށް އަރާ މަންޒަރު ފެނިފައިވާ ކަމަށްވެސް ފުލުހުން ވަނީ ބުނެފައެވެ.
އެހެންކަމުން އިތުރު ފުޓޭޖުތަކުގެ އަލީގައި އެ ކާރު ދެނެގަތުމުގެ މަސައްކަތް ކުރަމުންދާ ކަމަށް ފުލުހުން ވަނީ ބުނެފައެވެ.
ފުލުހުން ވަނީ އަޒްހާނާއި، ހިޔާ ފްލެޓު ސަރަހައްދުން ފޮޓޯއިން ފެންނަ ޓެކްސީ ފެނިފައިވާ ފަރާތެއް ވާނަމަ، ނުވަތަ ހޯމަ ދުވަހު ފަތިހު ހިޔާ ފްލެޓު 13 ވަނަ ޓަވަރު ސަރަހައްދުން ދަތުރެއް ނަގާފައިވާކަމަށް ބެލެވޭނަމަ އެ ޑްރައިވަރަކު ލަސްނުކޮށް އެކަންހުޅުމާލެ ޕޮލިސް ފޭސް ދޭއްގެ އިންވެސްޓިގޭޝަން ނަންބަރު 9393351 ނުވަތަ ފުލުހުންގެ ހޮޓްލައިން 3322111ށް ގުޅައިގެން ހިއްސާކުރުމަށް އެދިފައެވެ.
އަޒްހާން އެންމެ ފަހުން ފެނުނުއިރު، އޭނާ ލައިގެން ހުރީ ޕީޗް ކުލައިގެ މާޖެހި އަތްކުރު ގަމީހެއް ކަމަށް ފުލުހުން ބުނެއެވެ. އަޒްހާން ގެއްލިގެން ފުލުހުން އާންމުންގެ އެހީތެރިކަމަށް އެދިފައިވަނީ ސެޕްޓެމްބަރ މަހުގެ 20 ވަނަ ދުވަހުއެވެ. އެ ޒުވާނާއާ ބެހޭ އެއްވެސް މައުލޫމާތެއް އެނގޭނަމަ ހުޅުމާލެ ފޭސް ދޭއް ޕޮލިސް ސްޓޭޝަން ނަންބަރު 9393351ށް ގުޅުމަށް ފުލުހުން ވަނީ އެދިފައެވެ.
