ޝީރީންގެ ޤާޠިލުންނަށް ދައުވާ ކުރުމަށް އައްބާސް ގޮންޖައްސަވައިފި

ވަކިވެފައިވާ މިނިވަން 2 ދަޢުލަތުގެ ގޮތުގައި އިޒްރޭލާއި ފަލަސްޠީނު އުފެދެން ޖެހޭ ކަމަށް ޔަހޫދީ އިޒްރޭލުގެ ބޮޑުވަޒީރު ޔެއީރު ލެޕީޑް ބުނި ބުނުމަށް މަރުޙަބާ ވިދާޅުވާ ކަމަށާއި، ނަމަވެސް، މި ހިނދުން މި ހިނދަށް، މަޝްވަރާގެ މޭޒުދޮށަށް ހާޒިރުވެ، އިޒްރޭލުން އެކަން ސާބިތުވެސް ކޮށްދޭން ޖެހޭ ކަމަށް، ފަލަސްޠީނުގެ ރައީސް މަޙްމޫދު އައްބާސް ވިދާޅުވެއްޖެއެވެ.

މިހާރު ކުރިއަށްދާ އދގެ އިސްވެރިންގެ ބައްދަލުވުމުގައި ތަޤުރީރު ކުރައްވަމުން އައްބާސް ވިދާޅުވީ، އިޒްރޭލުން ދައްކާ ވާހަކަތަކުގައި ހުރި ސީރިއަސްކަމެއް އެނގޭނީ، މިހާރުން މިހާރަށް މަޝްވަރާގެ މޭޒަށް ހާޒިރުވެގެން ކަމަށެވެ.

މި މޭރުމުން ވާހަކަފުޅު ކުރިއަށް ގެންދަވަމުން އައްބާސް ވަނީ، މިނިވަން ދައުލަތެއްގެ ގޮތުގައި ފަސްޠީނުގެ ބަލައިގަތުމަށް، އދގެ މެންބަރު ޤައުމުތަކަށް ގޮވާލައްވާފައެވެ. އަދި އދގެ ފުރިހަމަ މެންބަރުކަން، ފަލަސްޠީނަށް ދިނުމަށްވެސް އައްބާސް ވަނީ ގޮވާލައްވާފައެވެ.

ވަކިވެފައިވާ މިނިވަން 2 ދަޢުލަތުގެ ގޮތުގައި އިޒްރޭލާއި ފަލަސްޠީނު އުފެދެން ޖެހޭ ކަމަށް ޔަހޫދީ އިޒްރޭލުން ގޮވާލި ގޮވާލުމަށް މަރުޙަބާ ވިދާޅުވެ، އައްބާސް ވާހަކަފުޅު ދެއްކެވި ނަމަވެސް، އިޒްރޭލަށް ބަހުގެ ހަމަލާތަކެއްވެސް ދެއްވިއެވެ. އެގޮތުން އިޒްރޭލަކީ ނަސްލީ ތަފާތު ކުރުންތަކާއި ބައިބައިވުން ގެންގުޅޭ ބައެއް ކަމަށާއި، އިޒްރޭލަކީ، ނަސްލީ ތަޢައްސުބު އެކުލެވޭ ޤާނޫނުތައް އަމިއްލައަށް ހަދަމުން ދާ ބައެއް ކަމަށްވެސް އައްބާސް ވަނީ ވިދާޅުވެފައެވެ.

އައްބާސް ވަނީ އިޒްރޭލުން ހިންގަމުންދާ ލާއިންސާނީ ޖަރީމާތަކުގެ މަތިންވެސް ދުނިޔެއަށް ހަނދާން އާ ކޮށްދެއްވާފައެވެ.

އެތައް އަހަރަކަށް ދިގުލާ ގޮސްފައިވާ މެދުއިރުމަތީގެ ސުލްހައިގެ މަޝްވަރާތައް އަދިވެސް ކޮޅެއްގައި ނުޖެހިއެވެ. އިޒްރޭލާއި ފަލަސްޠީނަކީ ވަކިވެފައިވާ މިނިވަން 2 ދައުލަތުގެ ގޮތުގައި އުފެދެން ޖެހޭ 2 ދަޢުލަތް ކަމަށް ގިނަ ބަޔަކު ބުނަމުން ދަނިކޮށް، ޢަރަބި ގަލްފުގެ ބައެއް ޤައުމުތަކުން ވަނީ އެމެރިކާއިން ދެއްކި މަގުން ހިނގާ، އިޒްރާލާއެކު ޑިޕްލޮމެޓިކް ގުޅުންތައް އާންމު ކޮށްފައެވެ. ނަތީޖާއެއްގެ ގޮތުން ބައިނަލްއަގުވާމީ މައިދާނުގައި އިޒްރޭލުގެ ނުފޫޒާއި ބާރު އިތުރަށް ގަދަވެ، އިޒްރޭލުން ދަނީ، ފަލަސްޠީނުގެ ބިންތަކުން އެ ފަލަސްޠީނުގެ ރައްޔިތުން ބޭރު ކުރުމުގެ މަސައްކަތް މެކުހަށް ޖަހަމުންނެވެ.