ނާސާއިން މިހާތަނަށް ތައްޔާރު ކުރި އެންމެ ބާރުގަދަ ރޮކެޓް، އާޓެމީސް 1 ލޯންޗު ކުރުން އަނެއްކާވެސް ފަސްކޮށްފިއެވެ.

ހަނދަށް ފޮނުވަން ތައްޔާރުވެފައިވާ މި ރޮކެޓް ލޯންޗު ކުރުން ފަސްކުރީ އެމެރިކާ ސަރަހައްދަށް މޫސުން ގޯސްވެ ތޫފާނެއް އުފެދުމުގެ ސަބަބުންނެވެ. އެ ރޮކެޓް ލޯންޗު ކުރަން ތާވަލު ކުރީ މި އަންގާރަ ދުވަހު އެމެރިކާގެ ފްލޮރިޑާގައި ހުންނަ ކެނެޑީ ސްޕޭސް ސެންޓަރުންނެވެ.

މިއީ މި ރޮކެޓް ލޯންޗުކުރުން ފަސް ކުރަން ޖެހުނު ތިން ވަނަ ފަހަރެވެ. ފުރަތަމަ ފަހަރަށް އޮގަސްޓް މަހުގެ ފަހުކޮޅު ރޮކެޓް ލޯންޗު ކުރަން އުޅުމުން ދިމާވި ޓެކްނިކަލް މައްސަލަތަކެއްގެ ސަބަބުން ސެޕްޓެމްބަރު މަހުގެ ކުރީ ކޮޅަށް ބަދަލު ކުރިއެވެ. ނަމަވެސް ދެވަނަ ތާރީހު އައިސް ޖެހުނު އިރު އެ ރޮކެޓުގައި ތެޔޮ ލީކުވުމުގެ މައްސަލައެއް ދިމާވުމުން އަންނަ އަންގާރައަށް ތާރީހު ބަދަލު ކުރީއެވެ.

މި ރޮކެޓް ދެން ލޯންޗު ކުރާނެ ތާރީހެއް އަދި އިއުލާނުކޮށްފައެއް ނުވެއެވެ. މި ރޮކެޓް ލޯންޗު ކުރުމަށް ދެން ފުރުސަތު އޮންނާނީ އޮކްޓޯބަރު 17 އިން 31 އާ ދެމެދު ކަމަށް ބޭރުގެ މީޑިއާތަކުން ރިޕޯޓް ކުރެއެވެ.

އާޓެމީސް 1 އަކީ ނާސާއިން ހަނދަށް އިންސާނުން ފޮނުވިތާ 50 އަހަރުފަހުން އަލުން އިންސާނުން ހަނދަށް ފޮނުވަން ހަދާފައިވާ ރޮކެޓެކެވެ. މީގެ ސަބަބުން ދިރާސާތައް ކުރުމަށް އިތުރު ޑޭޓާ ލިބިގެންދާނެ ކަމަށް ނާސާއިން ވަނީ ބުނެފައެވެ.