ޤައުމީ މުބާރާތުގެ 100 މީޓަރު ދުވުމުން އެއްވަނަ ސާއިދުއާއި އަލްހާއަށް
ސާއިދު އެއްވަނަ ހޯދީ ފައިނަލް ހީޓުގައި 10.86 ސިކުންތުން ރޭސް ނިންމައިގެން
ސާއިދު އާއި އަލްހާ
މިހާރު ކުރިއަށްދާ ޤައުމީ އެތުލެޓިކްސް މުބާރާތުގެ 100 މީޓަރު ދުވުމުގެ އެއްވަނަ ހަސަން ސާއިދުއާއި މައިޔަމް އަލްހާ ކާމިޔާބުކޮށްފިއެވެ.
100 މީޓަރު ދުވުމުގެ ފިރިހެން ޑިވިޝަނުން އެއްވަނަ ރާއްޖޭގެ އެންމެ ބާރު ދުވުންތެރިޔާ ސާއިދު ހޯދިއިރު އަލްހާ ވަނި މި ކެޓަގަރީގެ އަންހެން ޑިވިޝަންގެ އެއްވަނަ ކާމިޔާބުކޮށްފައެވެ.
ސާއިދު އެއްވަނަ ހޯދީ ފައިނަލް ހީޓުގައި 10.86 ސިކުންތުން ރޭސް ނިންމައިގެންނެވެ. ފައިނަލްގައި ދެން ވާދަކުރި އިބާދުﷲ އާދަމް ރޭހުގެ ދެވަނަ ހޯދީ 10.96 ސިކުންތުން ރޭސް ނިންމައިގެންނެވެ. ތިންވަނަ ހާސިލްކުރި ނަޖުދާން އަބްދުﷲ ރޭސް ނިންމީ 11.23 ސިކުންތުންނެވެ.
އަންހެން ޑިވިޝަންގެ އެއްވަނަ އަލްހާ ހޯދީ ފައިނަލްގައި 12.97 ސިކުންތުން ރޭސް ނިންމައިގެންނެވެ. ދެވަނައަށް ދިޔަ ހައްވާ މުޒްނާ ފާއިޒު 13.09 ސިކުންތުން ރޭސް ނިންމިއިރު، ތިންވަނަ ހޯދި އައިޝަތު ޝަބާ ސަލީމް ރޭސް ނިންމީ 13.14 ސިކުންތުންނެވެ.
މި މުބާރާތުގައި ރާއްޖޭގެ ދިގު ދުވުންތެރިޔާ އާމިނަތު ޖާއިޝާ ޖުނީޒް ވަނީ ޤައުމީ ރެކޯޑެއް ހަދާފައެވެ. ޖައިޝާ ވަނީ 5000 މީޓަރު ދުވުމުގައި ޖައިޝާ ރޭސް ނިންމީ 19.43.09 މިނެޓުން ރޭސް ނިންމާފައެވެ. މިއީ ދިވެހި އެތުލީތަކު 20 މިނެޓަށްވުރެ އަވަހަށް 5000 މީޓަރު ނިންމި ފުރަތަމަ ފަހަރެވެ. މީގެ ކުރިން 5000 މީޓަރުގެ އަންހެން ރެކޯޑު އޮންނަނީ 20 މިނިޓް 10:30 ސިކުންތުން ރޭސް ނިންމި މަރިޔަމް އަބްދުލް ކަރީމް އަތުގައެވެ. އޭނާ ރެކޯޑު ހެދީ 2019 ވަނަ އަހަރު އިންޑިއަން އޯޝަން އައިލެންޑް ގޭމްސްގައެވެ.
