ބީއެމްއެލް ފެހި ޕްރޮޖެކްޓް ލިބޭ ރަށްތައް އިއުލާނުކޮށްފި
23 ސެޕްޓެމްބަރު 2022 | ހުކުރު 03:55ބީއެމްއެލުން ވަނީ ކުރިއަށް އޮތް 5 އަހަރުގެ މުއްދަތަށް މި ޕްރޮޖެކްޓް ހިންގުމަށް ނިންމާފައި
ބޭންކް އޮފް މޯލްޑިވްސްގެ ފެހި ޕްރޮޖެކްޓް ލިބޭ ރަށްތައް އިއުލާންކޮށްފި
ބޭންކް އޮފް މޯލްޑިވްސްއިން ރާއްޖޭގެ އެކިކަންކޮޅުތަކުގައި ކޮންމެ އަހަރަކު 50،000 ގަސް އިންދުމުގެ މަގްސަދުގައި ކުރިއަށްގެންދާ "ބީއެމްއެލް ފެހި ޕްރޮޖެކްޓް" މިއަހަރު ހިންގާނެ ރަށްތައް އިއުލާނުކޮށްފިއެވެ.
ބީއެމްއެލުން ވަނީ ކުރިއަށް އޮތް 5 އަހަރުގެ މުއްދަތަށް މި ޕްރޮޖެކްޓް ހިންގުމަށް ނިންމާފައެވެ. މިއީ ނޮވެމްބަރު މަހު ފާހަގަކުރުމަށް ހަމަޖެހިފައިވާ ބޭންކުގެ 40 ވަނަ އަހަރީ ދުވަހާ ހަމަޔަށް ހިންގުމަށް ހަމަޖެހިފައިވާ މުޖުތަމައަށް ފައިދާހުރި މުހިންމު 12 ހަރަކާތުގެ ތެރެއިން އަށް ވަނަ ހަރަކާތެވެ.
މި ޕްރޮޖެކްޓް އެންމެ ފުރަތަމަ ބީއެމްއެލް އިން އިފްތިތާހު ކުރީ މިއަހަރުގެ ޖޫން މަހުގައެވެ. މި ޕްރޮޖެކްޓު ހިންގުމަށް ކޮންމެ އަހަރަކު ފަސް ރަށެއް ހޮވާއިރު މި ޕްރޮޖެކްޓު ކުރިއަށް ގެންދިއުމަށް އެދި ހުށަހެޅުމުގެ ފުރުސަތު ހުޅުވައިލީ ރަށްރަށުގެ ކައުންސިލްތަކަށާއި ސިޓީ ކައުންސިލްތަކަށެވެ.
މިއަހަރު ހުޅުވާލި ފުރުސަތުގައި ޕްރޮޖެކްޓު ކުރިއަށްގެންދިއުމަށް އެދުނު ރަށްތަކުގެ ތެރެއިން ބީއެމްއެލް އިން ހޮވާފައިވަނީ ނ. މާފަރާއި ޅ. ހިންނަވަރާއި މ. ދިއްގަރާއި ތ. ގުރައިދޫގެ އިތުރުން ގދ. ގައްދޫއެވެ. މި ރަށްތަކަށް ރާއްޖޭގައި ހިންގާ ނާސަރީތަކުން ކޮންމެ ރަށަކަށް 10،000 ގަސް ހަދިޔާކުރުމަށް ވަނީ ނިންމާފައެވެ.
މި ޕްރޮޖެކްޓްގެ އެހީގައި ރަށްރަށަށް ބޭނުންވާ ފެހިކަން ގެނެވި މުޖުތަމައަށް އޭގެ މަންފާ ލިބިގެންދާނެ ކަމަށް ބީއެމްއެލް އިން ބުނެއެވެ. އެގޮތުން އަލުން ގަސް އިންދުމުގެ ސަބަބުން ރަށް ގިރުން ހުއްޓުމާއި، ހޫނުމިން ކުޑަވުމާއި ޖައްވަށް ދޫކުރެވޭ ކާބަންގެ މިންވަރު ދަށްކުރެވުމުގެ ސަބަބުން ތިމާވެއްޓަށް ހެޔޮ ބަދަލެއް ގެނުވާނެ ކަމަށް ވެސް ބީއެމްއެލްއިން ބުނެއެވެ.
އެ ބޭންކުން މީގެ ކުރިން ބުނެފައިވާ ގޮތުގައި ފެހި ޕްރޮޖެކްޓުގެ އެހީގައި ރަށްރަށުގައި ގަސް އިންދުމަށް އެހީވެ، ކާބަން ފުޓްޕްރިންޓް ދަށްކޮށް ރާއްޖޭގެ މީހުން ދިރިއުޅޭ ސަރަހައްދުތަކަކީ ހިތްހަމަޖެހުން ލިއްބައިދޭ ތަންތަނަށް ވެގެންދާނެއެވެ. އަދި ރަށު ކައުންސިލްތަކާއެކު މަސައްކަތްކޮށް ރާއްޖޭގެ ނާސަރީތަކަށް އެހީވެ، ރަށްރަށާއި މުޖުތަމައުތަކަށް ފާހަގަކުރެވޭ ހެޔޮ ބަދަލެއް ގެނައުމަށް މަސައްކަތް ކުރާނެ ކަމަށް ވެސް އެ ބޭންކުން ބުނެއެވެ.
ބީއެމްއެލްގެ 40 ވަނަ އަހަރީ ދުވަހާއި ގުޅުވައިގެން އެކި ދާއިރާތައް ހިމެނޭހެން ތަފާތު ގިނަ ޕްރޮޖެކްޓްތަކެއް ވަނީ ފަށާފައެވެ. މީގެެ ތެރޭގައި ބީއެމްއެލް ފެހި ޕްރޮޖެކްޓާއި އޮންލައިންކޮށް ފަންޑްރެއިޒް ކުރެވޭ ޕްލެޓްފޯމް، "ކައިންޑްލީ" އާއި ހާއްސަ އެހީއަށް ބޭނުންވާ މީހުންގެ މަރުކަޒު ތަރައްގީކުރުމަށް އެހީވުމާއި ކުދި ގްރާންޓުތަކާއި ހައުސިން ގްރާންޓާއި ސްޓާޓްއަޕް ގްރާންޓާއި ޤައުމީ ކުތުބުޚާނާ އިތުރަށް ތަރައްގީ ކުރުމާއި ބީއެމްއެލް ސްކޮލަރޝިޕް ފަންޑު ހިމެނެއެވެ.
