ޗެލްސީ އަށް ބަދަލުވާން ބޭނުންވީ ޓުޗެލްއާއެކު މަސައްކަތް ކުރަން: ޒަކަރިއާ
22 ސެޕްޓެމްބަރު 2022 | ބުރާސްފަތި 02:41ޒަކަރިއާ ބުނީ އޭނާ ޗެލްސީ އަށް ބަދަލުވާން ޖެހުނު އެއް ސަބަބަކީ ޓުޗެލް ކަމަށް.
ޑެނިސް ޒަކަރިއާ
ޗެލްސީ އަށް ބަދަލުވާން ބޭނުންވަނީ އެ ޓީމުގެ ކުރީގެ ކޯޗު ތޯމަސް ޓުޗެލްއާއެކު މަސައްކަތް ކުރަން ކަމަށް ސްވިޒަލެންޑުގެ މިޑްފީލްޑަރު ޑެނިސް ޒަކަރިއާ ބުނެފިއެވެ.
ޔުވެންޓަސްގައި ހުރުމަށްފަހު ޒަކަރިއާ ޗެލްސީ އަށް ބަދަލުވީ ލޯނު އެއްބަސްވުމެއްގެ ދަށުންނެވެ. އޭނާ ހޯދުމުގެ މަސައްކަތް ޗެލްސީން ކުރީ އެ ޓީމުގެ ކޯޗަކަށް ޓުޗެލް ހުއްޓައެވެ. ނަމަވެސް ފަހުން ވަނީ ޓުޗެލް މަގާމުން ވަކިކޮށް، އެ މަގާމަށް ގްރަހަމް ޕޮޓާ ހަމަޖައްސާފައެވެ.
ޗެލްސީ އަށް ބަދަލުވުމަށްފަހު ޒަކަރިއާ ބުނީ، ކަންތައް ވެގެންދިޔައީ ވަރަށް އަވަހަށް ކަމަށެވެ. އޭނާ ބުނީ ޓްރާންސްފާ މާކެޓް ނިމެއް ހަ ގަޑިއިރަށްވީ އިރު ވެސް، ޗެލްސީ އަށް ބަދަލުވެވޭނެކަން އޭނާ އަށް ޔަގީން ނޫން ކަމަށެވެ. އޭނާ ފާހަގަ ކުރި ގޮތުގައި ޗެލްސީ އަށް ބަދަލުވާން ތައްޔާރުވެ، އެއްބަސްވުމުގައި ސޮއިކުރެވޭނެ ވަގުތެއްގެ އިންތިޒާރުގައި އޭނާ ހުރި ކަމަށެވެ.
މީގެ އިތުރުން އޭނާ ބުނީ ޗެލްސީ އަށް ބަދަލުވާން ޖެހުނު އެއް ސަބަބަކީ ޓުޗެލް ކަމަށެވެ. އޭނާ ދެކޭ ގޮތުގައި ޓުޗެލް އަކީ ވަރަށް މޮޅު، އަދި ރަނގަޅު ކޯޗެކެވެ. ނަމަވެސް ޗެލްސީގެ ކޯޗުކަމުގައި އޭނާ ނެތްކަން ފާހަގަކޮށް ޒަކަރިއާ ބުނީ، މިއީ ފުޓުބޯޅަ ކަމަށާއި، ކަންކަން ވަރަށް އަވަހަށް ބަދަލުވާ ކަމަށެވެ.
އޭނާ ބުނީ އައު ކޯޗާއެކު މަސައްކަތް ކުރަން އޭނާ އަށް ފުރުސަތު އޮތް ކަމަށާއި، އޭނާއާ ގުޅޭ ރަނގަޅު އެތައް ވާހަކަތަކެއް އިވިފައިވާ ކަމަށެވެ. ޒަކަރިއާ ވަނީ ޗެލްސީގައި އެންމެ ރަނގަޅު މަސައްކަތެއްކޮށް، އޭނާގެ މަގާމަށް ދާން މަސައްކަތް ކުރާނެ ކަމަށް ވެސް ބުނެފައެވެ.
