ޓޫރިޒަމާ ބެހޭ ޤާނޫނަށް 12 ވަނަ އިިސްލާހު ގެނައުމުގެ ބިލު ތަސްދީގު ކުރައްވައިފި

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، ދިވެހިރާއްޖޭގެ ޓޫރިޒަމާބެހޭ ޤާނޫނަށް 12 ވަނަ އިސްލާހު ގެނައުމުގެ ބިލް ތަސްދީގު ކުރައްވައިފިއެވެ.

މި ބިލަކީ، މި އަހަރުގެ ސެޕްޓެންބަރު 21 ވީ ބުދަ ދުވަހު ބޭއްވި ރައްޔިތުންގެ މަޖިލީހުގެ 2022 ވަނަ އަހަރުގެ ތިންވަނަ ދައުރުގެ 16 ވަނަ ޖަލްސާއިން ފާސްކުރި ބިލެކެވެ. އެގޮތުން މި ޤާނޫނަށް ގެނައި އިސްލާހުގެ ދަށުން އެ ޤާނޫނުގެ 11 ވަނަ އިސްލާހުގައި ރާއްޖޭގައި ހޭދަކުރާ ކޮންމެ ދުވަހަކަށް، ފަތުރުވެރިންގެ އަތުން ނެގޭނެކަމަށް ބަޔާންކޮށްފައިވާ ގްރީން ޓެކްސް ނެގުން 1 ޖަނަވަރީ 2023 އިން ފެށިގެން ނެގުމަށް އޮތް އޮތުން މިހާރުން ފެށިގެން ވެސް ނެގޭނެގޮތަށް ވަނީ މަގުފަހިކޮށްދީފައެވެ.

މީގެ އިތުރުން މި ޤާނޫނަށް 12 ވަނަ އިސްލާހު ގެނައުމުގެ ޤާނޫނަށް އަމަލުކުރަން ފެށުމާ ހަމައަށް ހިނގާފައިވާ މުއްދަތުގެ ތެރޭގައި، ގްރީން ޓެކްސްގެ ގޮތުގައި އެއްވެސް ފަރާތެއްގެ އަތުން ފައިސާ ނަގާފައިވާނަމަ، އެ ފައިސާ އެފަރާތަކަށް އަނބުރާނުދައްކާހާ ހިނދަކު، އެ ފަތުރުވެރިޔަކު ހުރި ތަނެއް ހިންގާ ފަރާތުން އެ ފައިސާ ދައުލަތަށް ދައްކަންވާނެކަމަށާއި،މި ޤާނޫނުގައި ބަޔާންކުރާ ފަރާތެއް ފިޔަވައި އެހެން ފަރާތެއްގެ އަތުން ގްރީން ޓެކްސް ނަގާފައިވާނަމަ، ނުވަތަ ނަގަންޖެހޭ އަދަދަށްވުރެ އިތުރަށް އެއްވެސް ފަރާތެއްގެ އަތުން ގްރީން ޓެކްސްގެ ގޮތުގައި ފައިސާ ނަގާފައިވާނަމަ، އެ ފައިސާ އެފަރާތަކަށް އަނބުރާނުދައްކާހާ ހިނދަކު، އެ ފަތުރުވެރިޔަކު ހުރި ތަނެއް ހިންގާ ފަރާތުން އެ ފައިސާ ދައުލަތަށް ދައްކަންވާނެ ކަމުގައި ވަނީ ބަޔާންކޮށްފައެވެ.

މި ބިލަށް އިސްލާހެއް ހުށަހެޅުއްވީ ތުލުސްދޫ ދާއިރާގެ މެންބަރު އިބްރާހީމް ނަސީމެވެ. އިސްލާހު ހުށަހަޅުއްވައި މެންބަރު ނަސީމް ވިދާޅުވީ، 2 ޖުލައި 2022ން ފެށިގެން މިހާރު މިއޮތް އިސްލާހު ފާސްވަންދެން ގްރީންޓެކްސް ނެގުމުގައި ގާނޫނީ ހުސްކަމެއް އަންނަކަމަށެވެ. އަދި މީރާއިން އަންގާފައިއޮތީ، ގާނޫނުގައި ނެތްކަމުގައި ވިޔަސް އެ ނަގައިފިއްޔާ އެ އަނބުރާ ދައްކަން ޖެހޭނެކަމަށެވެ. އަދި ޖޫން މަހުގެ ފަހުކޮޅުން ފެށިގެން ޖުލައި މަހުގެ ފަހުކޮޅަށް ސްޓޭކޮށްފައި ތިބި ފަތުރުވެރިންވެސް އެބަތިބިކަމަށާއި، އޭގެ މާނައަކީ ޖުލައި 1އާ ހަމައަށް ޓެކްސް ނަގަން ލާޒިމްވެފައި، 2ން ފެށިގެން ނުނެގޭކަމަށެވެ.

މި ޤާނޫނު ތަސްދީގު ކުރެއްވުމާއެކު ބުދަ ދުވަހު ވަނީ ދިވެހިސަރުކާރުގެ ގެޒެޓްގައި އެ އިސްލާހު ޝާއިއުކޮށް އަމަލު ކުރަން ފަށައިފައެވެ.