ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވެވަޑައިގެންނެވި ވައުދުފުޅެއް ފުއްދަވާނެކަމަށާއި، ކޮށްދެއްވާނެކަމަށް ވިދާޅުވި ކަމެއް ކޮށްދެއްވާނެކަމަށް، ރައީސް އޮފީހުގެ ތަރުޖަމާނު މިއުވާން މުޙައްމަދު ވިދާޅުވެއްޖެއެވެ.
ރައީސުލްޖުމްހޫރިއްޔާ ރަށްރަށަށް ކުރައްވާ ދަތުރުފުޅުތަކުގައި، ކުރައްވާނެކަމަށް ވިދާޅުވާ ކަންކަމަކީ ވައުދުފުޅެއް ނޫންކަމަށް، ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވުމާ ގުޅިގެން "ރާއްޖެއެމްވީ"އަށް މިއުވާން ވިދާޅުވީ، ރައީސުލްޖުމްހޫރިއްޔާ ރަށްރަށަށް ކުރައްވާ ދަތުރުފުޅުތަކުގައި އަދި އެކިއެކި ބައްދަލުވުންތަކުގައި ރަށްރަށުގެ ކައުންސިލްތަކުންނާއި ރައްޔިތުންގެ ފަރާތުން ލިބިވަޑައިގަންނަވާ ޚިޔާލާއި ޝަކުވާއަށް ހައްލެއް ހޯއްދަވައިދެއްވުމަށް އަޅުއްވާނެ ކަމަށްވާ ވިދާޅުވާ ފިޔަވަޅުތަކަކީ، އަދި ކޮށްދެއްވާނެކަމަށް ވިދާޅުވާ ކަންކަމަކީ ކަމާ ގުޅުންހުރި ބޭފުޅުންނާއި އިދާރާތަކާ މަޝްވަރާކުރެއްވުމަށްފަހު ވިދާޅުވާ ވިދާޅުވުމެއް ކަމަށެވެ.
ކަމެއް ކޮށްދެއްވާނެކަމަށާއި، މައްސަލައަށް ހައްލެއް ހޯއްދަވައިދެއްވާނެ ކަމަށް ރައީސުލްޖުމްހޫރިއްޔާ ވިދާޅުވެއްޖެނަމަ، އެ ކަންކަން ކޮށްދެއްވާނެ ކަމަށާއި އަދި އެކަން ހިނގަމުންދޭތޯ ރައީސް ބައްލަވާ ކަމަށްވެސް މިއުވާން ވިދާޅުވިއެވެ. މިކަމުގައި ކުޑަ ރަށެއް، ބޮޑު ރަށެއް އަދި ސިޔާސީ ފިކުރެއް ނުބައްލަވާނެ ކަމަށްވެސް ވިދާޅުވިއެވެ.
ރައީސް ޞާލިޙުގެ މެނިފެސްޓޯވެސް ތަންފީޒުކުރައްވާނެކަން ފާހަގަކުރައްވައި މިއުވާން ވިދާޅުވީ، ހުރިހާ ވައުދުފުޅުތަކަކީ މެނިފެސްޓޯގައި ހުރި ވާހަކަތަކަކަށް ނުވެދާނެކަމަށެވެ. މިސާލަކަށް ފެނާއި ނަރުދަމާ ހުރިހައި ރަށެއްގައި ގާއިމުކުރުމުގެ ވާހަކަ މެނިފެސްޓޯގައި ނޯންނާނެ ކަމަށާއި، އެހެންނަމަވެސް އެއީ ރައްޔިތުންނަށް ލިބެން ޖެހޭ އަސާސީ ހައްގަކަށްވާތީ، ރާއްޖޭގެ މީހުން ދިރިއުޅޭ ހުރިހާ ރަށަކަށް ފެނާއި ނަރުދަމާގެ ޚިދުމަތް ދެއްވާނެކަމަށް ރައީސް ވައުދުވެވަޑައިގެން، އެ ވައުދު ފުއްދަވަމުންދާކަމަށް ވިދާޅުވިއެވެ.
