ބޮޑީ ބޯޑިންގެ ޑްރޮޕްނީ ކެޓަގަރީން ދުނިޔޭގެ ގަދަ 12 އެތުލީޓުންގެ ތެރޭގައި ރާއްޖޭގެ އެއްވަނަ ބޮޑީ ބޯޑަރު އަލީ ޚުޝްރުވާން އަޙުމަދު (ކުޑަ އައްޔަ) ހިމެނިއްޖެއެވެ.

އިންޓަރނޭޝަނަލް ބޮޑީ ބޯޑިން ކޯޕަރޭޝަން (އައިބީސީ)އިން އާންމުކޮށްފައިވާ ރޭންކިންގެ ގަދަ 12 ގައި ކުޑަ އައްޔަ އޮތީ 1460 ޕޮއިންޓާއެކުއެވެ. ކުޑަ އައްޔަ ވަނީ ދާދި ފަހުން އޮތް ވިޒިޓް މޯލްޑިވްސް ޕްރޯ 2022 ގެ ޑްރޮޕްނީގެ ސެމީ ފައިނަލްގައި ވާދަކޮށްފައެވެ. މިއީ މި މުބާރާތުގެ ސީނިއާ ކެޓަގަރީގެ ގަދަ ހަތަރެއްގައި ދިވެހި އެތުލީޓަކު ހިމެނުނު ފުރަތަމަ ފަހަރެވެ. ސެމީ ފައިނަލްގައި ކުޑަ އައްޔަ ވާދަކޮށްފައިވަނީ ރޭންކިންގެ އެއްވަނައިގައި އޮތް ޑޭވް ހަބާޑްއާއެވެ.

އެ މުބާރާތުގައި ކުޑަ އައްޔަ ވަނީ ތަފާތު މޮޅު ހުނަރެއް ވެސް ދައްކާފައެވެ. އޭނާ ވަނީ އޭރު ދުނިޔޭގެ ދެވަނައިގައި އޮތް ޓަނާ މެކް ޑެނިއެލް ވެސް ބަލިކޮށްފައެވެ. އެއީ އެ މުބާރާތުގައި އެންމެ ގިނަ މީހުންގެ ލޮލުގައި އަޅައިގަން އެއް ނަތީޖާއެވެ.

އައިބީސީން އާންމުކޮށްފައިވާ ރޭންކިންގެ އެއްވަނަ ލިބެނީ ހާބާޑްއަށެވެ. އެއީ 4000 ޕޮއިންޓާއެކުއެވެ. ދެވަނައިގައި އޮތް އަމައުރީ ލެވާން އަށް ލިބެނީ 3720 ޕޮއިންޓެވެ. ތިންވަނައިގައި ދެ އެތުލީޓަކު ވަނީ ހިމެނިފައެވެ. އެއީ 2680 ޕޮއިންޓާއެކު އައިން ކޭމްޕްބެލް އާއި ފަބިއަން ތަޒާއެވެ. ފަސްވަނައިގައި އޮތް ސެމީ މޮރެޓީނޯ އަށް ލިބެނީ 2320 ޕޮއިންޓެވެ. ހަވަނައިގައި އޮތް ހެމް ހަމީމް ވަތޫރީ އަށް ލިބެނީ 2070 ޕޮއިންޓެވެ. ހަތްވަނަ މަގާމުގައި އޮތީ 1860 ޕޮއިންޓާއެކު ކަވިކާ ރޯރުކަމާއެވެ. އަށްވަނައިގައި މެކް ކްރިލީ އޮތީ 1830 ޕޮއިންޓާއެކުއެވެ.

ނުވަވަނައިގައި ވެސް ވަނީ ދެ އެތުލީޓަކު ހިމެނިފައެވެ. އެއީ ކެލެން ޔަމަސާކީ އާއި ޖެރިކޯ ރޮސޭރޯއެވެ. މި ދެ އެތުލީޓުންނަށް ލިބެނީ 1720 ޕޮއިންޓެވެ. ބާރަވަނައިގައި ކުޑަ އައްޔަ އޮތްއިރު، އައްޔަގެ ފަހަތުން ދެން އޮތީ ޕޮހާކަކުއޭއެވެ. އޭނާ އަށް ލިބެނީ 1400 ޕޮއިންޓެވެ.

ކުޑަ އައްޔަ ވަނީ ޤައުމީ ފެންވަރުގައި ވެސް އެތައް ކާމިޔާބީތަކެއް ހޯދާފައެވެ.