"ދުނިޔޭގެ މޮޅު ކުޅުންތެރިޔާއަށް ވާން ބޭނުންނަމަ ކުޅެންވާނީ ރެއާލަށް!"
21 ސެޕްޓެމްބަރު 2022 | ބުދަ 02:05ކަމަވިންގާ ރެއާލްގައި ހުރީ ނުހަނު ހިތްހަމަ ޖެހިގެން.
ކަމަވިންގާ
ދުނިޔޭގެ މޮޅު ފުޓުބޯޅަ ކުޅުންތެރިޔާ އަށް ވާން ބޭނުންނަމަ، ކުޅެން ވާނީ ރެއާލް މެޑްރިޑަށް ކަމަށް ޖޮނަތަން ބާނެޓް ބުނެފިއެވެ.
ބާނެޓަކީ ސްޕެއިންގެ ރެއާލް މެޑްރިޑަށް ކުޅެމުން އަންނަ ފްރާންސްގެ މިޑްފީލްޑަރު އެޑުއާޑޯ ކަމަވިންގާގެ އެޖެންޓެވެ. އޭނާ އެހެން ބުނީ ކަމަވިންގާގެ ކުރިމަގާ ގުޅޭ ގޮތުން ސްޕެއިންގެ މީޑިއާއަކުން ކުރި ސުވާލަކަށް ޖަވާދު ދެމުންނެވެ. އޭނާ ބުނީ ކަމަވިންގާ ރެއާލްގައި ހުރީ ނުހަނު ހިތްހަމަ ޖެހިގެން ކަމަށާއި، ރެއާލްދެކެ ކަމަވިންގާ ވަރަށް ލޯބިވާ ކަމަށެވެ. މީގެ އިތުރުން ބާނެޓް ބުނީ ރެއާލަށް ގުޅުމަކީ ކަމަވިންގާ އަށް ނިންމުނު ރަނގަޅު ނިންމުމެއް ކަމަށެވެ. އޭނާ ވަނީ ރެއާލްގެ ކޯޗު ކާލޯ އަންޗެލޮޓީގެ މޮޅު ކަމުގެ ވާހަކަ ވެސް ދައްކާފައެވެ.
އިތުރަށް ވާހަކަ ދައްކަމުން ބާނެޓް ބުނީ ރެއާލްގައި ޒުވާން، ހުނަރުވެރި ކުޅުންތެރިންނަށް ފުރުސަތު އޮތް ކަމަށާއި، އަންޗެލޮޓީގެ ވިސްނުން ފެންނަނީ ވެސް އެ މަގުން ކަމަށެވެ. ބާނެޓް ފާހަގަ ކުރި ގޮތުގައި ދުނިޔޭގެ މޮޅު ކުޅުންތެރިޔާ އަށް ވާން ބޭނުންނަމަ، ކުރެވޭނެ އެންމެ ރަނގަޅު ކަމަކީ ރެއާލަށް ކުޅުމެވެ.
ފްރާންސްގެ ރެނޭސް ދޫކޮށް ކަމަވިންގާ ރެއާލަށް ބަދަލުވީ 2021 ވަނަ އަހަރުއެވެ. އޭގެ ފަހުން އޭނާ ވަނީ އެ ޓީމަށް ކުޅެދިން 49 މެޗުން ދެ ލަނޑު ޖަހާފައެވެ. ރެއާލާއެކު ކަމަވިންގާ ވަނީ ސްޕެނިޝް ލީގާއި، ސްޕެނިޝް ސުޕަ ކަޕާއި، ޔުއެފާ ޗެމްޕިއަންސް ލީގުގެ އިތުރުން ޔުއެފާ ސުޕަ ކަޕް ކާމިޔާބުކޮށްފައެވެ. ކަމަވިންގާ އަންނަނީ 2020 ވަނަ އަހަރުން ފެށިގެން ފްރާންސްގެ ޤައުމީ ޓީމަށް ވެސް ކުޅެމުންނެވެ.
