ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު އަބަދުވެސް ދެއްވާ ނަސޭހަތްޕުޅަކީ، އެމްޓީސީސީން މަސައްކަތެއް ނިންމާފައި ދިއުމުން އެ މަސައްކަތަކީ ރައްޔިތުން އުފަލުން ހިތް ބަންޑުންވާފަދަ މަސައްކަތަކަށް ހަދައިދިނުން ކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.
ށ. މާއުނގޫދޫ ބަނދަރު ތަރައްގީކުރުމުގެ މަޝްރޫއުގެ އަމަލީ މަސައްކަތް ފެށުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން އާޒިމް ވިދާޅުވީ، ރައީސްގެ ނަސޭހަތްޕުޅާ އެއްގޮތަށް އަމަލުކުރައްވާނެކަމުގެ ޔަގީންކަން ރައްޔިތުންނަށް ދެއްވާކަމަށެވެ.
ކުރިން އެކި ސަރުކާރުތަކުން ބަނދަރުތައް ތަރައްގީކުރާ ގޮތް ފެނިފައިވާކަމަށާއި، ރައީސް ޞާލިޙުގެ ވެރިކަމުގައިވެސް ބަނދަރު ތަރައްގީކުރަމުންދާ ގޮތް ފެނިފައިވާކަމަށް އާޒިމް ވިދާޅުވިއެވެ.
ނަމަކަށް ކަމެއް ކުރާ އުސޫލުން މާއުނގޫދޫގައި ކުރީ ސަރުކާރުން ބަނދަރެއް ތަރައްގީކޮށްފައި ވާކަމަށާއި އެހެން ރަށްރަށުގައިވެސް އެ އުސޫލުން ކަންތައްތައްކޮށްފައި ހުރި މަންޒަރު ފެނިގެން ހިނގައްޖެ ކަމަށްވެސް ވިދާޅުވިއެވެ.
އާޒިމް ވިދާޅުވީ، ރަށުގައި ބަނދަރެއް އޮތްނަމަވެސް ރައްޔިތުން ބޭނުންވާ ގޮތަށް މަސައްކަތްކޮށްދީފައި ނުވާކަމަށެވެ. މި ސަރުކާރުގައި އެންމެ ގިނަ މަޝްރޫއުތައް ކުރިއަށް ގެންދާ ކުންފުންޏަކަށް އެމްޓީސީސީ ވެގެންދާއިރު، ށ. މާއުނގޫދޫގެ ބަނދަރަކީ އެންމެ ޒަމާނީ ބަނދަރަކަށް ވެގެންދާނެ ކަމަށްވެސް ވިދާޅުވިއެވެ.
މި ސަރުކާރުން މަޝްރޫއުތައް ކުރިއަށް ގެންދަނީ ގެންދެވޭނެ އެންމެ ރަނގަޅަކަށް ކަމަށާއި، އެކަމަށް ހެކިވެވަޑައިގަންނަވާ ކަމަށް އާޒިމް ވިދާޅުވިއެވެ. އާޒިމް ވިދާޅުވީ މާއުނގޫދޫގައި އަޅާ ބަނދަރުވެގެންދާނީ ރައްޔިތުންގެ ތަރައްގީއަށް ހުޅުވައިދޭ މުޅިން އައު ކުރިމަގަށްކަމަށެވެ.
އާޒިމް އިތުރަށް ވިދާޅުވީ، އޭނާ މާއުނގޫދޫއަށް ވަޑައިގަތުމުން އެ ރަށު މީހުން މަރުހަބާ ކިޔާފައިވަނީ ޒަމާނުއްސުރެ ދަންނަ، ރައްޓެހި ބައެއްގެ ގޮތުގައި ކަމަށެވެ. އަދި އެރަށުން ދެންނެވި މަރުހަބާއަށްޓަކައި އާޒިމް ވަނީ ޝުކުރު އަދާކުރައްވާފައެވެ.
