ގަސްތައް ނުކަނޑައި މަގު ހެދޭނެ ގޮތެއް ހޯދާނެ ކަމަށް އުއްމީދުކުރަން – ރައީސް ނަޝީދު

އަމީނީ މަގު ހެދުމަށް، އެ މަގުގައި ހައްދާފައި ހުރި ގަސްތައް ނުކަނޑާ މަގު ހެދޭނެ އެހެން ގޮތެއް ހޯދާނެ ކަމަށް އުއްމީދުކުރައްވާ ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.

ރައްޔިތުންގެ މަޖިލީހުގެ ބުދަ ދުވަހުގެ ޖަލްސާ ފައްޓަވާ ވާހަކަފުޅުދައްކަވަމުން ރައީސް ނަޝީދު ވިދާޅުވީ އަމީނީ މަގުގައި ތާރުއަޅަންކަމަށް ބުނެ އެ މަގުގައި ހުރި ގަސްތައް ކަނޑަމުންދާ ވާހަކަ ނުވަތަ އެހެންތަނަކަށް ބަދަލުވާ ވާހަކަ އިވިވަޑައިގެންފައިވާ ކަމަށެވެ. ގަހެއް ހެދުމަށް 15-20 އަހަރު ނަގާ ކަމަށާއި، މަގެއް ހެދުމަށް ހޭދަވަނީ 2-3 މަސް ކަމަށެވެ. ރައީސް ނަޝީދު ވަނީ އެހެން ގޮތެއް މިކަމުގައި ހޯދަންޖެހޭ ކަމަށެވެ.

އަމީނީ މަގު ތަރައްގީކުރުމަށް ކުރަމުން އަންނަ މަސައްކަތުގެ ދަށުން, އެ މަގުން ނަގާ ގަސްތަކުގެ ބަދަލުގައި އިތުރު ގަސްތައް އިންދާނެކަމަށް، އާރްޑީސީން ވަނީ ބުނެފައެވެ. އެ ކުންފުނިން ހޯމަ ދުވަހު ނެރުނު ބަޔާނެއްގައި ބުނީ މާލެ ސްޓްރީޓް ސްކޭޕިންގ ޕްރޮޖެކްޓުގެ ދަށުން އަމީނީ މަގު ތަރައްގީކުރުމުގެ މަސައްކަތްކުރަން ރާވާފައިވަނީ އެ މަގުގައި ހުރި އެއްވެސް ގަހަކަށް ގެއްލުންނުވާނެހެން ތިމާވެއްޓާ ރައްޓެހިގޮތަކަށް ކަމަށެވެ. ނަމަވެސް މާލޭގެ މަގުތަކަކީ ފެނާއި ނަރުދަމާގެ އިތުރުން އެތައް ބައިވަރު ނެޓްވޯރކްތަކެއް ވަޅުލާފައިވާ މަގުތަކެއް ކަމަށްވާއިރު، މި މަސައްކަތް ކުރުމުގައި ގޮންޖެހުންތަކާ ކުރިމަތިވާކަމަށް އެ ކުންފުނިން ބުނެއެވެ.

އާރްޑީސީން މިހާރު މަސައްކަތް ކުރަމުން އަންނަ އަމީނީ މަގަކީ، ފެނާއި ނަރުދަމާގެ މައި ހޮޅިތަކުގެ އިތުރުން އެހެން ނެޓްވޯރކްތަކުގެ ވެސް މައި ހޮޅިތައް ވަޅުލާފައިވާ މަގެއްކަން އެކުންފުނިން ފާހަގަކުރިއެވެ. މީގެ ސަބަބުން އެ މަގު ޒަމާނީ ފެންވަރަށް ތަރައްގީކުރަން ދަތިތައް ހުރިކަން އާރްޑީސީން ވަނީ ފާހަގަކޮށްފައެވެ. އެގޮތުން، މަގުގެ ފެން ފަށަލަ ތިލަވެފައި، މަގުގެ އަޑީގައި ހުރި ފެނާއި ނަރުދަމާގެ އިތުރުން އެހެނިހެން ނެޓްވޯރކްތަކާ ގުޅޭގޮތުން ލިބިފައިހުރި ކުރެހުންތަކާއި މަގުގެ އަޑި އޮތްގޮތް ދިމާނުވުންފަދަ ގޮންޖެހުންތައް އެބަހުރިކަމަށް އެ ކުންފުނިން ބުނެއެވެ.

މީގެ އިތުރުން ބައެއް ހޮޅިތަކާއި ކޭބަލްތަކަށް އެ މަގުގައި ހުރި ގަސްތަކުގެ މުލުގެ އަސަރު ކޮށްފައިވާކަމަށްވެސް އާރްޑީސީން ބުނެއެވެ. މިއާއެކު އެ ގަސްތައް އަމީނީ މަގުން ނަގައި އެހެންތަނަކަށް ގެންދިއުމުގެ މަސައްކަތް އަންނަކަމަށް އެ ކުންފުނިން ބުނެއެވެ.

އާރްޑީސީގެ ބަޔާނުގައި ބުނެފައިވާ ގޮތުގައި މިގަސްތައް ބަދަލު ކުރަނީ ކ. ކުޑަގިރީގައި ތަރައްގީކުރަމުން އަންނަ ޕިކްނިކް އައިލެންޑަށެވެ. ނަމަވެސް އަމީނީ މަގުން ނަގާ ގަސްތަކުގެ ބަދަލުގައި، މަގުގެ މަސައްކަތް ނިމުމުން ގަސް އިންދޭނެ ތަންތަނުގައި ގަސް އިންދާނެއެވެ.