ނިސްވިން އަލް ފާންގެ ނަން ދޭހަ ކޮށްދެނީ އަންހެނުންގެ ބޭކަރީއެއް ކަން، އެތަނުގަ އުޅެނީ ހުސް އަންހެނުން
ޖިނާނީ، އޭނާގެ އާއިލާއާއެކު ދިރިއުޅެމުން ދަނީ އެމީހުންގެ އަމިއްލަ އިމާރާތެއްގައި، އޯގަސްޓް 2021 ގައި ބޭކަރީ ހުޅުވީވެސް ހަމަ އެ އިމާރާތުގައި
ޖިނާނީ ހާޔަކް އަކީ ލުބްނާންގެ ބޭންކިންގް ސެކްޓަރުގެ ޤަދަރު ހުރި ބްރާންޗެއްގައި 28 އަހަރު ދުވަސް ވަންދެން މަސައްކަތް ކުރި މީހެކެވެ. ނަމަވެސް މިއަދު އޭނާއަކީ މައުންޓް ލެބަނަންގައި އަމިއްލަ ބޭކަރީއެއް ހިންގާ މީހެކެވެ. އަމާޒަކީ ހަމަ އެކަނި މުވައްޒަފުން ބައިވެރިކޮށްގެން ބޭކަރީ ހިންގުމެވެ. އަންހެނުންނަށްވެސް އަބުރުވެރި އަދި ބާރުވެރި ދިރިއުޅުމެއް ހޯދާދިނުމެވެ.
އިޔާދަ ކުރެވެން ނެތް ފަދަ އިޤްތިޞާދީ ހީނަރުކަމުގެ ކަނޑެއްގެ ތެރެއަށް ލުބްނާން ޣަރަޤުވާން ފެށީ 2019 ވަނަ އަހަރުގެ ތެރޭގައެވެ. އެ ޤައުމުގެ އާބާދީގެ 80 ޕަސެންޓް މީހުން މިހާރު ތިބީ އިންތިހާ ބިކަ ހާލުގައެވެ. އެމެރިކާ ޑޮލަރާ އަޅާ ބަލާއިރު، ލުބްނާން ފައިސާގެ އަގު ވަނީ 95 ޕަސެންޓަށް ވެއްޓިފައެވެ.
ލުބްނާންގެ އިޤްތިޞާދު މައިގަނޑު ގޮތެއްގައި ބިނާވެފައި އޮތީ ޚިދުމަތުގެ ސިނާއަތްތަކުގެ މައްޗަށް ކަމަށް ވާއިރު، އެ އިޤްތިޞާދަށް އިންތިހާއަށް ބޭނުންވާ ބޭންކިންގް ސެކްޓަރު އޮތީ ވާގި ނެތިފައެވެ. ބޭންކުތަކުގައި ފައިސާ ރައްކާ ކުރަމުން ދިޔަ މީހުންނަށް ޑޮލަރު އެކައުންޓްތަކާ ހިސާބަށް ދެވޭނެ ގޮތެއް ނެތެވެ. އެ ފުރުޞަތު ލިބޭ މީހަކަށްވެސް އަތް ލެވެނީ، އަސްލު އަގުގެ 4 ބައިކުޅަ 1 ހާ ފައިސާގައެވެ.
ޖިނާއީ އަކީ އަބަދުވެސް ވިޔަފާރިއެއްގެ ގޮތުގައި ބޭކަރީއެއް ހިނގުމުގެ ހުވަފެންތައް ދެކެމުން ދިޔަ މީހެކެވެ. މީގެ 4 ވަރަކަށް އަހަރު ކުރިން، އޭނާ ވަނީ ވިޔަފާރި ހިންގުމާ ބެހޭ ކޯސްތަކެއްވެސް ހަދާފައެވެ. އިންތިޒާރު ކުރަމުން ދިޔައީ ވިޔަފާރި ފުޅާކޮށްލާނެ ރަނގަޅު ވަގުތަކަށެވެ.
ޖިނާނީ، އޭނާގެ އާއިލާއާއެކު ދިރިއުޅެމުން ދަނީ އެމީހުންގެ އަމިއްލަ އިމާރާތެއްގައެވެ. އޯގަސްޓް 2021ގައި ބޭކަރީ ހުޅުވީވެސް ހަމަ އެ އިމާރާތުގައެވެ. ބޭކަރީގެ ނަންވެސް ހާއްސައެވެ. "ނިސްވިން އަލް ފާން"ގެ ނަމުންވެސް ދޭހަކޮށްދެނީ އެއީ އަންހެނުންގެ ބޭކަރީއެއް ކަމެވެ. ހަމަ އެއާއެކު، ތުންތުން މަތިން ފެތުރޭ ތޯތޯ ވާހަކަ ދެއްކުމުގައި އުޅޭ އަންހެނުންނަށްވެސް އެ ނަން ރިޢާޔަތް ކުރެއެވެ.
ޖިނާނީ ބުނާ ގޮތުގައި އޭނާގެ އަމާޒަކީ ހުރިހާ އެންމެންވެސް އުފަލުގައި ބޭތިއްބުމެވެ. އޭނާގެ ގާތުން ޚިދުމަތް ހޯދަން އަންނަ ކްލަޔަންޓުންނަށްވެސް އެކަން އިޙްސާސްކޮށްދިނުމެވެ. އަދި އަންހެނުންނަކީވެސް ކިހާ ބާރުގަދަ އަދި ކިހާ ކެރޭ ބައެއްކަން ސާބިތުކޮށްދިނުމެވެ.
މި ދަނޑިވަޅަކީ ހިތި ދާޚިލީ ހަނގުރާމައެއްވެސް ތަޖުރިބާ ކޮށްފައިވާ ލުބްނާންގެ ތާރީޚް ދެކެފައި ނުވާފަދަ ހީނަރުކަމަކާ އެ ޤައުމަށް ކުރިމަތިލާން ޖެހިފައިވާ ހިތްދަތި ދަނޑިވަޅެކެވެ. މާލީ ގޮތުންވެސް ބޮޑެތި ގެއްލުންތަކަކާ އެ ޤައުމަށް ކުރިމަތިލާން ޖެހިފައިވާއިރު، ލުބްނާންގައި މިވަގުތު ތިބި ކޮންމެ 10 މީހަކުން 8 މީހަކީ ފަޤީރަކަށް ވަނީ ވެފައެވެ.
