2024 ވަނަ އަހަރުގެ ދިވެހި ޕްރިމިއަރ ލީގު ކޮލިފިކޭޝަންގައި ހިމެނޭ ސެންޓްރަލް ޒޯންގެ ދެވަނަ ޑިވިޝަންގެ ފުރަތަމަ މެޗު ކ. ގުރައިދޫން ކާމިޔާބުކޮށްފިއެވެ.
މާލޭ ރަސްމީ ސްޓޭޑިއަމްގައި ކުރިއަށްގެންދާ ސެންޓްރަލް ޒޯންގެ ފުރަތަމަ މެޗު ގުރައިދޫ ސްޕޯރޓްސް ރެކްރިއޭޝަން ކްލަބުން ކާމިޔާބުކުރީ ކ. ގުޅި ފުޓްބޯޅަ ކްލަބާ ވާދަކޮށް 3-1ންނެވެ. މެޗުގައި ފުރަތަމަ ތިން ލަނޑުވެސް ޖެހީ ގުރައިދޫންނެވެ. އެޓީމްގެ ތިން ލަނޑުވެސް ޖެހީ އާލިމް އަބްދުލްގައްޔޫމްއެވެ. ގުޅީގެ ހަމައެކަނި ލަނޑު، މެޗުގެ އިތުރު ވަގުތުގައި ޖެހީ މުހައްމަދު ފައިޝާން ފައިސަލްއެވެ. މިގްރޫޕްގައި ދެން ވާދަކުރަނީ ކ. މާފުއްޓެވެ.
ފުރަތަމަ ޑިވިޝަނުން ޖާގަ ލިބޭނީ ކޮންމެ ޓީމެއް ކޮންމެ ޓީމަކާ ދެފަހަރު ވާދަކޮށް އެންމެ ގިނަ ޕޮއިންޓް ހޯދާ ދެޓީމަށެވެ.
