ހިދުމަތް ތަޖުރިބާ ކުރުމަށް އިތުރު ފުރުސަތު ދިނުމުގެ ގޮތުން މިނީ ބަހުގެ ހިދުމަތް އިތުރު 2 ހަފްތާއަށް ހިލޭ
އަންމަ މަހުގެ 2 ވަނަ ދުވަހާ ހަމައަށް މިނީ ބަހުގައި ހިލޭ ދަތުރުކުރެވޭނެ
އިތުރު 2 ހަފްތާއަށް މިނީ ބަހުގެ ހިދުމަތް ހިލޭ ދިނުމަށް ވަނި ނިންމާފައި
ރާއްޖެ ޓްރާންސްޕޯޓް ލިންކް (އާރުޓީއެލް) ގެ ބަހުގެ ހިދުމަތް މާލެ ސަރަހައްދުގައި އިތުރު 2 ހަފްތާއަށް ހިލޭ ދިނުމަށް ނިންމައިފިއެވެ.
އެމްޓީސީސީން ބުނީ ހިލޭ ދަތުރުކޮށްދިނުމަށް ކަނޑައަޅާފައިވާ މުއްދަތު އިތުރުކުރުމުގެ މައިގަނޑު މަގުސަދަކީ ކަސްޓަމަރުން މި ހިދުމަތް ރަނގަޅަށް ތަޖްރިބާކުރުމުގެ އިތުރު ފުރުސަތު ދިނުމާއިއެކު ކަސްޓަމަރުންގެ ހިޔާލާއި އެއްގޮތަށް ހިދުމަތުގެ ފެންވަރު ރަނގަޅުކޮށް ހިދުމަތް ހަރުދަނާ ކުުރުމެވެ. އަދި ހިދުމަތަށް އަގުނަގައިގެން ދަތުރުކުރަން ފެށުމާއިއެކު ޓިކެޓް ނަގަން ބޭނުންކުރަންޖެހޭ އާރުޓީއެލް ޓްރެވެލް އެޕަށް ކަސްޓަމަރުން އަހުލުވެރިކުރުމަށް އިތުރު ފުރުސަތު ދިނުމަށް ކަމަށެވެ.
މާލޭގެ އެތެރޭގެ ދަތުރުފަތުރުގައި ދިމާވާ މައްސަލަތަކަށް ގިނަ ހައްލުތަކެއް ގެނެސްދީފައިވާ މިނީ ބަހުގެ ހިދުމަތުގެ އަޖުމަބެލުމުގެ ދަތުރުތައް ފަށާފައިވަނީ ސެޕްޓެމްބަރު މަހުގެ 5 ވަނަ ދުވަހުއެވެ. މިނީ ބަހުގައި ޓިކެޓް ނަގަން ޖެހެނީ އާރުޓީއެލް އެޕްލިކޭޝަން ނުވަތަ ވެބްސައިޓް މެދުވެރިކޮށެވެ. އެގޮތުން ޓިކެޓްގެ ގޮތުގައި ލިބޭ ކިއުއާރު ކޯޑް ބަހަށް އަރަމުން ބަހުގައި އިންނަ ޑިވައިސްއިން ސްކޭން ކޮށްލުމުން ހިދުމަތް ލިބިގެންދާނެކަމަށް އެމްޓީސީސީއިން ބުނެއެވެ.
މާލެ ސަރަހައްދުގައި އާރް.ޓީ.އެލް ބަހުގެ ޚިދުމަތް ހިލޭ ފޯރުކޮށްދެވޭ މުއްދަތު ނިމުމުން، އާރްޓީއެލް ވެބްސައިޓް އަދި އެޕްލިކޭޝަން މެދުވެރިކޮށް ފަސޭހައިން ކިޔުއާރް ޓިކެޓް ބައްލަވައިގަނެ ދަތުރުކުރުމުގެ އިންތިޒާމް ހަމަޖެހިފައިވެއެވެ. އަދި މިހާރު ކިއުއާރް ޓިކެޓް ނަގާފައިވާ ފަރާތްތަކަށް، އަގު ނަގަން ފެށުމުން އެ ޓިކެޓް ބޭނުންކުރެވޭނެ ކަަމަށް އެމްޓީސީސީން ބުނެއެވެ. އާރްޓީއެލް ޓްރެވަލް އެޕް، އެޕަލް އެޕް ސްޓޯރ އަދި ގޫގްލް ޕްލޭ ސްޓޯރއިން ހިލޭ ޑައުންލޯޑް ކުރެވެން ހުންނާނެއެވެ.
މާލެ ތެރޭގައި މިނީ ބަހުގެ ދަތުރުތައް ކުރެވިގެންދާއިރު ދަތުރަކަށް ނަގަން ނިންމާފައިވަނީ 7 ރުފިޔާއެވެ. ނަމަވެސް ޚާއްސަ އެހީއަށް ބޭނުންވާ މީހުންނަށާއި، 65 އަހަރުން މަތީގެ މީހުންނަށް އަދި ސްކޫލް ޔުނީފޯމުގައި ތިބޭ ކުދިންނަށާއި، 3 އަހަރުން ދަށުގެ ކުޑަކުދިންނަށް ބަހުގައި ހިލޭ ދަތުރުކުރެވޭނެ ކަމަށް އެމްޓީސީސީއިން ބުނެއެވެ.
ކޮންމެ ދުވަހަކުވެސް ފަތިހު 5:45 ގައި ދަތުރުތައް ފަށާ ގޮތަށް މެންދަމު 12:15 އާ ހަމައަށް ދަތުރުތައް ކުރިއަށް ގެންދިޔުމަށް ހަމަޖެހިފައިވާއިރު ކޮންމެ 2 ބަސް ސްޓޮޕެއްގެ ދޭތެރޭގައި ނަގާނީ 5 ވަރަކަށް މިނެޓު ކަމަށް އެމްޓީސީސީއިން ބުނެއެވެ. އަދި ބަސް ސްޓޮޕުން އެމީހަކު ދާން ބޭނުންވާ ތަނަކަށް ދިއުމަށް ގިނަވެގެން ނަގާނީ 10 މިނެޓު ކަމަށް ވަނީ ލަފާކޮށްފައެވެ.
42 ތަނެއްގައި ބަސް ސްޓޮޕްތައް ގާއިމްކޮށްފައި ހުންނާނެ ކަމަށް އެމްޓީސީސީން ބުނެއެވެ. މި ޚިދުމަތް ފެށިގެން ގޮސްފައިވަނީ 18 ބަހާއެކު ކަމަށާއި އެއީ 20 މީހުންގެ ޖާގައިގެ ބަސްތަކެއް ކަމަށް އާޒިމް ވިދާޅުވެފައިވެއެވެ.
ރާއްޖެޓީވީގެ ފަލަސުރިޚީ ޕްރޮގްރާމުގައި ވާހަކަފުޅު ދައްކަވަމުން އާޒިމް ވިދާޅުވެފައިވަނީ މިނީ ބަސްތަކުގެ ޚިދުމަތް ފެށުމާއެކު މާލޭގެ މަގުތަކުގައި ދުއްވާ ކާރުތަކާއި، ސައިކަލުތައް މަދުވާނެކަމަށް ބެލެވޭ ކަމަށެވެ. އަދި މިނީ ބަސް ދުއްވާ މަގުތަކުގައި އާންމުނަށް ޕާކު ކުރުން މަނާކޮށް ދަތުރުތައް ފެށިގެންދިއުމަކީ އެއްވެސް ދައްޗަކާނުލާ ބަސް ދުއްވޭނެ މަގު ފަހިވާނެ ކަމެއް ކަމަށެވެ.
މާލޭގައި މިނީ ބަހުގެ ޚިދުމަތް ފެށުމާއެކު މަޖީދީ މަގުގައި ޕާކުކުރުން މިހާރު ވަނީ މަނާކޮށްފައެވެ. މާލެ ސިޓީ ކައުންސިލުން ވަނީ މަޖީދީމަގުގައި ޕާކު ކުރުން މަނާކަން އެންގުމަށް، މަގުގެ ދެ ފަރާތުގައި ވެސް ރޮނގު ދަމާފައެވެ. ބައެއް ސަރަހައްދުތަކުގައި ޕާކު ނުކުރެވޭކަން އެންގުމަށް ކޯނުވެސް ވަނީ ޖަހާފައެވެ.
އަދި މިނީ ބަހުގެ ދަތުރުތައް މާލޭގައި ކުރިއަށް ގެންދިޔުމަށް މަގުތަކުގެ ޕާކިންގ ޒޯންތައް ނަގައި އެ ތަންތަނުގެ ބަދަލުގައި ވެހިކަލްތައް ޕާކުކުރުމަށް މިހާރު ހަތަރު ސަރަހައްދަކުން ބިން ވެސް ވަނީ ހަމަޖައްސާފައެވެ. އެއީ ހ. ސަމޯސާވިލާ ގޭގެ ބިމުން ބަޔަކާއި އެކުވެނި ޓްރެކް ކައިރިން ދެ ތަނަކާއި ދަރުބާރުގޭދޮށާއި ރަސްފަންނު ކައިރިން ކޮރަލް ބުލެވަރޑް ކައިރީ އޮންނަ ސަރަހައްދެވެ.
މިނީ ބަހުގެ ޚިދުމަތް މާލޭގެ އިތުރުން އެހެން ސަރަހައްދުތަކެއްގައި ވަނީ ފަށާފައެވެ. އެއީ އައްޑޫ ސިޓީއާއި ފުވައްމުލައް ސިޓީއާއި ލ. އަތޮޅުގެ ގުޅިފައިވާ ރަށްތަކެވެ.
