ޖަޕާނަށް ބާރުގަދަ ތޫފާނެއް އަރަން އުޅޭތީ އެތައްހާސް ބަޔަކު ދުރު ހިސާބުތަކަށް ގެންގޮސްފި
18 ސެޕްޓެމްބަރު 2022 | އާދީއްތަ 06:52ތޫފާން ފުރަތަމަ އަރާނެ ކަމަށް ބެލެވޭ ކިއޫޝޫގައި 13 މިލިއަން މީހުންގެ އާބާދީއެއް އޮވޭ
ޖަޕާނުގެ އައްސޭރި ފަށުގެ ހިސާބެއް
ޖަޕާނަށް ބާރުގަދަ ތޫފާނެއް އަރަން އުޅޭކަށްބުނެ ލިބޭ މައުލޫމާތާގުޅިގެން ދެމިލިއަނެއްހާ މީހުން އެހެން ހިސާބުތަކަށް ގެންދިއުމުގެ މަސައްކަތް ފަށައިފި އެވެ. ނަންމަޑޯލްގެ ނަމުން ނަންދީފައިވާ ސުޕަރ ތޫފާނުގެ ސަބަބުން ވަރަށް ބޮޑަށް ގެއްލުން ވާނެ ކަމަށް ދަނީ ބެލެވެމުންނެވެ. މިގޮތުން ތޫފާނުގައި ގަޑިއަކު 250 ކިލޯމީޓަރުގެ ވަޔާއެކު ދެދުވަހުގެ ތެރޭ ވިއްސަކަށް އިންޗީގެ ވާރޭވެހޭނެ ކަމަށް ފޯކާސްޓަރުން ވަނީ އަންދާޒާކޮށްފައެވެ. ތޫފާން ފުރަތަމަ އަރާނެ ކަމަށް ބެލެވޭ ކިއޫޝޫ ޖަޒީރާގައި ޚާއްސަ އެލާޓެއް ނެރެފައި ވާއިރު ރޭލާއި ފްލައިޓްގެ ޚިދުމަތް ވަނީ މެދުކަނޑާލާފައެވެ. އަދި ފެންބޮޑުވުމާއި ކިސަޑު ހެދުން ވެސް ކުރިމަތިވާނެ ކަމަށްބަލާ އެކަމަށް ތައްޔާރުވުމަށް ދަނީ އަންގަމުންނެވެ.
ޖަޕާނުގެ މޫސުމާބެހޭ އިދާރާއިން ވަނީ ތޫފާނުގައި ބޯކޮށް ވާރޭވެހި ގަދަވަޔާއެކު ރާޅު އެރުމުގެ ހާދިސާތައް ވެސް ހިގުން އެކަށީގެންވާކަމަށް ބުނެފައެވެ. އަދި ވައި ގަދަކަމުން ގެދޮރާއި އެހެން އިމާރާތްތަކަށް ގެއްލުން ވުމުގެ ފުރުސަތު އޮތްކަމަށް ވަނީ ބުނެފައެވެ.
ކިއޫޝޫ އަކީ ޖަޕާންގައި ހިމެނޭ މައި ހަތަރު ޖަޒީރާގެ ތެރެއިން އެންމެ ދެކުނުގައި އޮންނަ ޖަޒީރާއެވެ. މިތަނުގައި 13 މިލިއަން މީހުންގެ އާބާދީއެއް އޮވެއެވެ.
