60 އަކީ އަދި އެއްޗެއް ނޫން!
18 ސެޕްޓެމްބަރު 2022 | އާދީއްތަ 06:08ރޮބަރޓް ވަނީ ދުނިޔޭގެ އެކި ކަންކޮޅުތަކުން 150 އަށް ވުރެ ގިނަ، އުސް އިމާރާތްތަކަށް އަރާފައި
އުސް ތަންތަނަށް އެރުމުގެ މަސައްކަތް ރޮބަރޓް ފެށީ 1975 ވަނަ އަހަރުގެ ތެރޭގައި، އެއީ ފަރަންސޭސިވިލާތުގެ ދެކުނުގެ ސަރަހައްދުތަކުގައި ހުންނަ ފަރުބަދަތަކަށް އަރައިގެން
ޢުމުރުން ދުވަސް ވާ ވަރަކަށް ކުރިން އުޅުނު ގޮތަށް ހެލިފެލިވެ އުޅުމަށް ދަތިވާ ކަމުގެ ޝާކުވާއަކީ ގިނަ ބަޔަކު ތާ އަބަދުމެހެން ކުރަމުންދާ ޝަކުވާއެކެވެ. ނަމަވެސް، އެންމެ ޅަ އުމުރުން ފަށައިގެންވެސް އަމިއްލަ ސިއްޙަތަށް ފަރުވާތެރިވެ، ހިތްވަރާއި ޢަޒުމު ނަގާ ނުލާ ކަމުގައި ވާ ނަމަ، ޢުމުރަކީ ހަމައެކަނި ނަމްބަރެއް ކަން ސާބިތުކޮށްދޭ މީހުންވެސް މަދެއް ނޫނެވެ. އެފަދަ އެކަކީ، އިތުރު އާލާތްތަކެއްގެ އެހީއާ ނުލާ، އުސް ތަންތަނަށް އެރުމުގައި ފަރަންސޭސިވިލާތަށް މަޝްހޫރު އެލެއިން ރޮބަރޓް ނުވަތަ ފަރަންސޭސި "ސްޕައިޑަރމޭން"އެވެ.
މިދިޔަ ހޮނިހިރު ދުވަހު ރޮބަރޓް ވަނީ އޭނާގެ 60 ވަނަ އުފަން ދުވަސް ފާހަގަ ކުރުމުގެ ގޮތުން، ފަރަންސޭސިވިލާތުގެ އެންމެ އުސް އިމާރާތްތަކުގެ ތެރޭގައި ގުނާލެވޭ ޓުއަރ ޓޯޓަލްއެނަރޖީޒްގެ އިމާރާތަށް އަރާ، ގިނަ ބަޔަކު އާޝޯޚް ކުރުވާފައެވެ.
48 ފަންގިފިލާގެ މައްޗަށް އެކުލެވޭ ޓުއަރ ޓޯޓަލްއެނަރޖީޒްގެ އިމާރާތަށް އެރި ރޮބަރޓްއަށް 60 އަހަރު ފުރުނީ ހުސްވި މަހުގެ ތެރޭގައެވެ.
187 މީޓަރު ނުވަތަ 613 ފޫޓު އުސް އިމާރާތުގެ އެންމެ މައްޗަށް އެރުމަށްފަހު، ހެދިހުރި ހަށިގަނޑުގެ ވެރިޔާ ވަނީ، އެ ކާމިޔާބީ ފާހަގަ ކުރުމުގެ ގޮތުން އެ އިމާރާތުގެ މަތީގައި ހުރެ، މަންޒަރު ބަލަން ތިބި މީހުންނަށް ހަނާ އަޅާފައެވެ.
ރޮބަރޓް ބުނި ގޮތުގައި، 60 އަހަރު ފުރުން ފާހަގަ ކުރުމުގެ ގޮތުން، އުސް އިމާރާތަކަށް އެރީ ގިނަ ބަޔަކަށް މުހިންމު މެސެޖެއް ދިނުމުގެ ގޮތުން ކަމަށެވެ.
60 އަހަރު ފުރުމާ ދިމާކޮށް އެ ޓަވަރަށް 2 ވަނަ ފަހަރަށް އަރާނެ ކަމަށް ރޮބަރޓް ވަނީ މީގެ ކުރިން އޭނާގެ އަމިއްލަ ނަފުސަށް ވަޢުދުވެސްވެފައެވެ.
ފަރަންސޭސި ވިޔަފާރި ހަބުގައި ހުންނަ ޓޯޓަލްއެނަރޖީޒްގެ އިމާރާތަށް ރޮބަރޓް އެރި އެއް މަޤްޞަދަކީ މޫސުމީ ނޭދެވޭ ބަދަލުތަކަށް މީހުން ހޭލުންތެރި ކުރުވުން ކަމަށް ވާއިރު، މީގެ ކުރިންވެސް އެތައް ފަހަރެއްގެ މަތިން އޭނާ ވަނީ އެ އިމާރާތަށް އަރާފައެވެ.
އުސް ތަންތަނަށް އެރުމުގެ މަސައްކަތް ރޮބަރޓް ފެށީ 1975 ވަނަ އަހަރުގެ ތެރޭގައެވެ. އެއީ އޭނާގެ އުފަން ވަޒަން ކަމަށް ވާ ފަރަންސޭސިވިލާތުގެ ދެކުނުގެ ސަރަހައްދުތަކުގައި ހުންނަ ފަރުބަދަތަކަށް އަރައިގެންނެވެ. ގިނިކަންޏާ ތަންތަނަށް އެރުމުގެ މަސައްކަތް ފެށީ 1977 ވަނަ އަހަރު. އިސާހިތަކު، ރޮބަރޓްއަކީ 1 ވަނަ ދަރަޖާގައި އެކަން ކުރާ މީހެއްގެ ގޮތުގައި ގިނަ ބަޔަކު އޭނާ ބަލައިގަތެވެ.
ރޮބަރޓް ވަނީ ދުނިޔޭގެ އެކި ކަންކޮޅުތަކުން 150 އަށް ވުރެ ގިނަ، އުސް އިމާރާތްތަކަށް އަރާފައެވެ. އޭގެ ތެރޭގައި ދުނިޔޭގައި މިވަގުތު ހުރި އެންމެ އުސް އިމާރާތް ކަމަށް ވާ ދުބާއީގެ ބުރުޖު ޚަލީފާ، ފަރަންސޭސިވިލާތުގެ އައިފިލް ޓަވަރު އަދި އެމެރިކާގެ ގޯލްޑަން ގޭޓް ބްރިޖް ފަދަ މަޝްހޫރު ބިނާތައްވެސް ހިމެނެއެވެ.
ރޮބަރޓް ގިނަ ފަހަރަށް އިމާރާތްތަކަށް އަރަނީ ހުއްދަވެސް ނުހޯދާއެވެ. ނަތީޖާއެއްގެ ގޮތުން، އެތައް ފަހަރެއްގެ މަތިން އޭނާއަށް ވަނީ ހައްޔަރަށްވެސް ދާން ޖެހިފައެވެ. އިމާރާތްތަކަށް އެރުމުގައި ރައްކާތެރިކަމުގެ ގޮތުން ބޭނުން ކުރާ ބެލްޓްވެސް އޭނާ ބޭނުމެއް ނުކުރެއެވެ. ބޭޏުން ކުރާހާވެސް އެއްޗަކީ ތަންތަނަށް އެރުމަށް ހާއްސަ ބޫޓަކާ، އަތުން ހިއްލާ ދާ ހިއްކަން ބޭނުން ކުރާ ހާއްސަ ކުނޑިއެކެވެ. މިއީ ކަމަށް ނުފަރިތަ މީހަކު، އެއްވެސް ހާލެއްގައި އަމިއްލައަށް ކުރަން އުޅެން ހެޔޮ ވާ ވަރުގެ ކަމެއް ނޫނެވެ.
