ޔޫކްރެއިން ހަނގުރާމައާ ގުޅިގެން ޕޫޓިން މޯދީއަށް ވިދާޅުވީ ކީކޭކަން އެނގޭތަ؟

ލިބިފައިވާ ޖާސޫސީ މައުލޫމާތަށް ބަލާއިރު، ރަޝިއާއިން ޔޫކްރެއިންގައި ހަނގުރާމައެއް ފަށަން އުޅޭކަމުގެ އިންޒާރު އެމެރިކާއިން ދެމުން ދަނިކޮށް، ރަޝިއާގެ ރައީސް ވްލޭޑްމިއަރ ޕޫޓިންގެ އަމުރުފުޅަކަށް އެ ގައުމުގެ އަސްކަރިއްޔާއިން ޔޫކްރެއިނަށް އެރީ ފެބުރުއަރީ 24، 2022 ވަނަ ދުވަހު ފަތިހުގެ ވަގުތެއްގައެވެ.

ކޮވިޑް-19ގެ ބަލިމަޑުކަމުގައި އިނދަޖެހުނު ދުނިޔެއަށް ހިންދެމިލުމުގެ ނޭވާއެއް ލުމަށް ލިބުނު ފުރުސަތުގައި އެކަން ނުވެ އުޅެނިކޮށް، ހަނގުރާމައެއްގެ ބަނަ ވިލާގަނޑު ބޯމަތިވެ، އިތުރު ކާރިސީ ކޮޅިގަނޑެއްގައި މުޅި ދުނިޔޭގެ ހަތަރު އުދަރެސް ބައްދާލިއެވެ. އަދާ ޖެހުނުއިރުވެސް ހަމަޖެހުމެއްނުލިބެއެވެ.

ޔޫކްރެއިންގައި ރަޝިއާއިން ކުރަމުންދަނީ ހަނގުރާމައެއް ކަމަކަށް ރަޝިއާއިން އަދިވެސް އެއްބަހެއް ނުވެއެވެ. ރަޝިއާއިން ބުނާގޮތުގައި އެ ގައުމުން ޔޫކްރެއިންގައި ހިންގަމުން ދަނީ އަސްކަރީ ޚާއްސަ އޮޕަރޭޝަނެކެވެ.

ނަމުން އެއީ އަސްކަރީ ޚާއްސަ އޮޕަރޭޝަނަކަށް ވީނަމަވެސް، ކަމުން އެއީ ހަނގުރާމައެއް ނޫން ކަމަކަށް ބުނާނެ މީހަކު ނުވާނެކަން ޔަގީނެވެ. ޔޫކްރެއިންގައި ކުރަމުންދާ ހަނގުރާމައާ ގުޅިގެން ބައިނަލްއަގުވާމީ މައިދާނުގައި ރަޝިއާ އެކަހެރިކޮށް، އެ ގައުމާ ދެކޮޅަށް ފިޔަވަޅުތަކެއް އަޅައި، ފިއްތުންތަކެއް ކުރިމަތިކުރަމުން ދާއިރު، ރަޝިއާއިންވެސް އޮތީ ދޫދޭފަދަ ގޮތަކަށް ނޫނެވެ.

ކަން މިހެން އޮތްނަމަވެސް، މިދިޔަ ހުކުރު ދުވަހު، ޕޫޓިން ވަނީ އިންޑިއާގެ ބޮޑުވަޒީރު ނަރެންދްރަ މޯދީ އަރިހުގައި ތަފާތު ރޫހެއްގައި ވާހަކަފުޅުދައްކަވާފައެވެ. އެގޮތުން، ޔޫކްރެއިންގައި ހިންގަމުންދާ ކަންކަން ވީ އެންމެ އަވަހަކަށް ހުއްޓުމަކަށް ގެންނެވުމަށް އޭނާ ބޭނުންފުޅުވާކަމަށާއި، ނަމަވެސް ޔޫކްރެއިންގެ ސަރުކާރުން އޮތީ ހަނގުރާމައިގެ މައިދާނުގައި މަގުސަދުތަކެއް ހާސިލުކުރުމުގެ އަޒުމުގައި ކުރިއަށްދިއުމަށް ކަމަށް ޕޫޓިން ވަނީ މޯދީއަށް ވިދާޅުވެފައެވެ.

ޔޫކްރެއިންގައި ހިންގަމުންދާ ކަންކަމުގައި އިންޑިއާގެ ރައުޔަކީ ކޮބައިކަން އެނގިވަޑައިގަންނަވާ ކަމަށްވެސް ޕޫޓިން ވަނީ ވިދާޅުވެފައެވެ.

ޕޫޓިން، މޯދީއާ ބައްދަލުކުރައްވާފައި ވަނީ އުޒްބަކިސްތާނުގައި ކުރިއަށްދިޔަ ޝަންހާއި ކޯޕަރޭޝަން އޯގަނައިޒޭޝަން (އެސްސީއޯ) ސަމިޓްގެ ހަވާސާގައެވެ.

ހަމަނުޖެހުމާއި ނުތަނަވަސްކަމުގައި އޮތް އަދުގެ ދުނިޔެއަށް ހަމަޖެހުން ގެނެސް، ހެޔޮ ފާލަކަށް ކަންކަން އެޅުވުމަށްޓަކައި ރަޝިއާއާއެކު މަސައްކަތްކުރުމަށް ޗައިނާ އޮތީ ތައްޔާރަށްކަމަށް، ޗައިނާގެ ރައީސް ޝީ ޖީންޕިންގްވެސް ވަނީ، ރަޝިއާގެ ރައީސް ޕޫޓިންއަށް، ބުރާސްފަތި ދުވަހު ދަންނަވާފައެވެ.

އުޒްބަކިސްތާނުގައި ޝީއާ ބައްދަލު ކުރައްވައި ދެއްކެވި ވާހަކަފުޅުގައި ޕޫޓިން ވަނީ، ޔޫކްރެއިންގެ މަސްރަހުގައި ހިނގަމުންދާ ކަންކަމާމެދު ޝީގެ ހިތްޕުޅުގައި ކަންބޮޑުވުންތަކަކާއި ސުވާލުތަކެއް އުފެދިފައި ވާނެކަމަށް ގަބޫލުފުޅުކުރައްވާ ކަމަށް ވިދާޅުވެފައެވެ. ޔޫކްރެއިންގެ މަސްރަހާ ގުޅިގެން، ޗައިނާގެ ލީޑަރު ގެންގުޅުއްވާ ހަމަހަމަ އުސްލޫބަށް ޕޫޓިން ވަނީ ތައުރީފު ކުރައްވާފައެވެ.

އަދާ ޖެހުނުއިރުވެސް ޔޫކްރެއިންގައި ރަޝިއާއިން ކުރަމުންދާ ހަނގުރާމަ ކުށްވެރިކުރަނިވި ރޫހެއްގައި ޗައިނާއިން ވާހަކަދައްކާފައެއް ނުވެއެވެ. އަދި އެއީ ހަނގުރާމައެއް ކަމަށްވެސް ރިއާޔަތް ކޮށްފައެއް ނުވެއެވެ. އޭގެ ބަދަލުގައި ޗައިނާއިންވެސް އެ ކަމަށް ރިއާޔަތް ކުރަނީ، ރަޝިއާގެ ސަރުކާރުންވެސް މުޚާތަބު ކުރަމުން ދާ ފަދައިން، "ޚާއްސަ އަސްކަރީ އޮޕަރޭޝަން"ގެ ނަމުންނެވެ.

ރަޝިއާއިން ޔޫކްރެއިންގައި ކުރަމުންދާ ވަރުގަދަ ހަނގުރާމައާ ގުޅިގެން ދުނިޔޭގެ އިގުތިސާދަށް ވަރުގަދަ ލޮޅުމެއް އަރާފައިވާއިރު، ޗައިނާއަކީވެސް އެކަމާ އިންތިހާއަށް ކަންބޮޑުވާ ގައުމެކެވެ. އަދި ހުޅަނގުން ކުރިމަތިކޮށްފާނެ ފިއްތުންތަކާއި އަޅާފާނެ ދަތިކުރުމުގެ ފިޔަވަޅުތަކަކަށް ބިރުން، ރަޝިއާއަށް އަސްކަރީ އެހީތެރިކަން ފޯރުކޮށްދިނުމަށްވެސް ޗައިނާއިން މަސައްކަތެއް ކޮށްފައި ނުވާކަން ފާހަގަކުރަންޖެހެއެވެ.

ރަޝިއާގެ ރައީސް ޕޫޓިންގެ އަމުރުފުޅަކަށް އެ ގައުމުގެ އަސްކަރިއްޔާއިން ޚާއްސަ އޮޕަރޭޝަނެއްގެ ނަމުގައި ފެބުރުއަރީ 24، 2022 ވަނަ ދުވަހު ޔޫކްރެއިންއަށް އަރައި، ކުރަމުންދާ ހަނގުރާމައާ ގުޅިގެން، ހުޅަނގުގެ ބާރުތަކުން ދަނީ ރަޝިއާއާ ދެކޮޅަށް ދަތި ކުރުމުގެ ހަރުކަށި ފިޔަވަޅުތަކެއް ތަންފީޒު ކުރަމުންނެވެ. އޭގެ ރައްދުގައި، ރަޝިއާއިންވެސް ދަނީ ހުޅަނގަށް އެކި ގޮތްގޮތުން ފިއްތުންތައް ކުރިމަތި ކުރުވަމުންނެވެ. ނަތީޖާއެއްގެ ގޮތުން، ހަނގުރާމައިގެ އަސަރު، ދުނިޔޭގެ އެކި ހިސާބުތަކުގައި ދިރިއުޅެމުންދާ އާންމު ރައްޔިތުންނަށްވެސް ދަނީ ފޯރަމުންނެވެ.