ޑެސްޓް ބޭނުންވަނީ ދާއިމީ އެއްބަސްވުމެއްގެ ދަށުން އޭސީ މިލާންގައި މަޑުކުރަން

ދާއިމީ އެއްބަސްވުމެއްގެދަށުން އޭސީ މިލާންގައި މަޑުކުރަން ބޭނުންވާކަމަށް ސާޖީނިއޯ ޑެސްޓް ބުނެފިއެވެ.

ބާސެލޯނާގެ ފުލްބެކް، އޭސީ މިލާނަށް ބަދަލުވީ ލޯނު އެއްބަސްވުމެއްގެ ދަށުން މި މަހުގެ ތެރޭގައެވެ. އެއް އަހަރު ދުވަހުގެ ލޯނު އެއްބަސްވުމެއްގެ ދަށުން ޑެސްޓް އޭސީ މިލާނަށް ބަދަލުވިއިރު، އެއްބަސްވުމުގެ މުއްދަތު ހަމަވުމުން، އޭސީ މިލާނުން ބޭނުންވާނަމަ، ދާއިމީކޮށް ޑެސްޓް ގަނެވޭނެއެވެ.

ޑެސްޓް ބުނީ ބާސެލޯނާއާ އޭސީ މިލާނާ ދެމެދު ހެދުނު އެއްބަސްވުމުގައި، އެއް އަހަރު ފަހުން އޭނާ ގަތުމުގެ ފުރުސަތު ހިމަނާފައިވާކަމަށެވެ. އަދި އޭސީ މިލާންގައި އޭނާގެ އެންމެ މޮޅު ކުޅުން ދައްކާނެ ކަމަށްވެސް ޑެސްޓް ބުންޏެވެ. އޭނާ އުންމީދުކުރަނީ އޭސީ މިލާނުން ދާއިމީ ގޮތެއްގައި އޭނާ އެ ކުލަބުގައި ބަހައްޓާނެކަމަށް ކަމަށެވެ. ޑެސްޓް ވަނީ އޭސީ މިލާނާއެކު ކުރިއަށްދާން ތައްޔާރަށް ހުރިކަމަށްވެސް ބުނެފައެވެ.

އަޔެކްސް ދޫކޮށް ޑެސްޓް ބާސެލޯނާއަށް ބަދަލުވީ 2020 ވަނަ އަހަރުއެވެ. އޭގެ ފަހުން އޭނާ ވަނީ ބާސެލޯނާއަށް 72 މެޗު ކުޅެދީ ތިން ލަނޑު ޖަހާފައެވެ. ޑެސްޓް އޭސީ މިލާނަށް ބަދަލުވީ އައު ސީޒަނަށް ބާސެލޯނާއިން ހޯދި ކުޅުންތެރިންނާއެކު އޭނާއަށް އެ ޓީމުން ޖާގަ ނެތުމުންކަމަށް މީޑިއާ ރިޕޯޓުތައް ވަނީ ބުނެފައެވެ.