ބަރުލަމާނީ ނިޒާމަކަށް ވުރެ ބޮޑު ނިކަމެތި ކަމެއް ރައްޔިތުންނަކަށް ނުދެވޭނެ: ގާސިމް

ބަރުލަމާނީ ނިޒާމަކަށް ވުރެ ބޮޑު ނިކަމެތި ކަމެއް ރައްޔިތުންނަކަށް ނުދެވޭނެ ކަމަށް ޖުމްހޫރީ ޕާޓީގެ ލީޑަރ ޤާސިމް އިބްރާހިމް ވިދާޅުވެއްޖެއެވެ.

ޤާސިމް އިބްރާހިމް އެފަދައިން ވިދާޅުވީ ރާއްޖެ ޓީވީގެ ފަށާއިރު ޕްރޮގްރާމްގައި ވާހަކަދައްކަވަމުންނެވެ. ބަރުލަމާނީ ނިޒާމަކަށް ތާއީދު ނުކުރައްވާކަން ފާހަގަކުރައްވާ ގާސިމް ވަނީ އެއީ ރައްޔިތުންގެ ހައްގުގައި އަމަލުކުރާ ބަޔަކު ކުރާނެ ކަމެއް ނޫން ކަމަށް ވިދަޅުވެފައެވެ. މިހާރު ވެސް ސަރުކާރުތަކުން ހިޔާނާތްތެރިވުމުގެ ބޮޑެތި ތުހުމަތުތައް ކުރެވެމުން ދާއިރު ބަރުލަމާނީ ނިޒާމެއްގައި ސަރުކާރު ޒިންމާދާރު ކުރުވުމުގެ ފުރުސަތު ބޮޑުތަނުން ހަނިވެގެން ދާނެ ކަމަށް ގާސިމް ފާހަގަކުރެއްވިއެވެ. މީގެ އިތުރުން ތާއީދު އޮންނަ ޕާޓީތައް ކައިރި ކައިރީގައި ބަދަލުވެގެން ދާއިރު އެކަމުގެ ސަބަބުން ސަރުކާރު ބަދަލުވުން އަވަސް ވުމަކީ އެކަށީގެންވާ ކަމެއް ކަމަށް ވެސް ގާސިމް ވިދާޅުވިއެވެ. ރާއްޖޭގައި ވެރިކަމުގެ ނިޒާމް ބަރުލަމާނީ ނިޒާމަކަށް ބަދަލުކޮށްފި ނަމަ ދުވާލަކު އެއްފަހަރު ވެރިކަން ބަދަލުކުރާނެ ކަމަށް ވެސް އެނާ ވިދާޅުވިއެވެ. ގާސިމް ވަނީ ބަރުލަމާނީީ ނިޒާމް އޮންނަ ގައުމުތަކުގައި ސިޔާސީ މަސަލަސްކަން ގެއްލިފައިވާ ކަމަށް ވިދަޅުވެފައެވެ. މިގޮތުން ޔޫރަޕްގެ ބައެއް ގައުމުތަކުގައި 5 އަހަރު ތެރޭގައި ތިން ހަތަރު ޕްރައިމް މިނިސްޓަރުން ބަދަލުވާ ކަމަށާއި އެއީ ރާއްޖެ އަށް އެކަށީގެންވާ ގޮތެއް ނޫން ކަމަށް ގާސިމް ފާހަގަކުރެއްވިއެވެ.

ރާއްޖޭގެ ވެރިކަން ބަރުލަމާނީ ނިޒާމަކަށް ބަދަލުކުރުމަށް ފެނޭތޯ ބަލަން އާންމުންގެ ވޯޓެއް ނެގުމާބެހޭ ގަރާރެއް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވަނީ ނިމިދިޔަ އެމްޑީޕީގެ ކޮންގްރެސް އަށް ހުށަހަޅުއްވާފައެވެ. އެހެންނަމަވެސް މިކަމާބެހޭގޮތުން އަދިވެސް އިތުރަށް މަޝްވަރާ ކުރައްވަން އެ މަނިކުފާނު ނިންމަވާ، ގަރާރުވަނީ އަނބުރާ ގެންދަވާފައެވެ.

ބަރުލަމާނީ ނިޒާމަކަށް ތާއީދުކުރައްވާކަން ކުރީގެ ރައީސް އަބްދުﷲ ޔާމީން ވެސް ވަނީ ހާމަކުރައްވާފައެެވެ. ނަމަވެސް ވެރިކަމުގެ ނިޒާމު ބަދަލުކުރުމަށް ހުށަހަޅާ ގަރާރުގައި ހައްލެއް ފެނިވަޑައިނުގަންނަވާކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވަނީ މީގެ ކުރިން ވިދާޅުވެފައެވެ.