ނިޒާމީ ވޯޓު 30 ގައި ނެގޭނެކަމުގެ އުއްމީދު ކުޑަ، ތާރީހެއް އަންގާނެކަމަށް އީސީން ބުނެފި

ވެރިކަމުގެ ނިޒާމު ބަދަލުކުރުމަށް ފެންނަ ނުފެންނަ ވޯޓެއް ނެގުމަށް ގަރާރު ފާސްކޮށްފައިވީނަމަވެސް، ނިޒާމީ ވޯޓު މި މަހުގެ 30 ގައި ނެގޭނެކަމުގެ އުއްމީދު ކުޑަ ކަމަށާއި، އެކަން ކުރެވޭނެ ތާރީހެއް އަންގާނެކަމަށް އިލެކްޝަންސް ކޮމިޝަނުން ބުނެފިއެވެ.

އިލެކްޝަންސް ކޮމިޝަނުން މިހެން ބުނެފައިވަނީ ވެރިކަމުގެ ނިޒާމު ބަދަލުކުރުމަށް ފެންނަ ނުފެންނަ ވޯޓު ނެގުމަށް މަޖިލީހުން ގަރާރެއް ފާސްކޮށް، އެކަން އިލެކްޝަންސް ކޮމިޝަނަށް އެންގުމުން، އެ ކޮމިޝަނުން ފޮނުވި ޖަވާބު ސިޓީގައެވެ.

ވެރިކަމުގެ ނިޒާމް ބަދަލުކުރުމާއި ގުޅޭ ގަރާރާއި ގުޅޭގޮތުން ރައްޔިތުންގެ މަޖިލީހަށް، އިލެކްޝަންސް ކޮމިޝަނުން ފޮނުވި ސިޓީގައި ވިދާޅުވެފައިވަނީ، ރައްޔިތުންނާއި ގުޅޭ މުހިންމު ކަންތައްތަކުގައި ރައްޔިތުންގެ ހިޔާލު ހޯދުމުގެ އާންމު ވޯޓެއް ނެގުމަކީ ގާނޫނު އަސާސީގެ 70 ވަނަ މާއްދާއިން ރައްޔިތުންގެ މަޖިލީހަށް ލިބިފައިވާ ބާރެއްކަމަށް ވާތީއާއި، މަޖިލީހަށް ލިބިދީފައިވާ ބާރުގެ ދަށުން ފާސްކޮށްފައިވާ ގަރާރުގައިވާ ގޮތުގެ މަތިން މަޖިލީހުން އެދިފައިވާ ގޮތުގެ މަތިން ދިވެހިރާއްޖޭގައި މިހާރު އޮތް ވެރިކަމުގެ ނިޒާމް ބަދަލުކުރުމާއި ގުޅޭގޮތުން ރައްޔިތުންގެ ހިޔާލު ހޯދުމުގެ އާންމު ވޯޓު ނެގުމުގެ އިންތިޒާމް ކުރިއަށް ގެންދިއުމަށް ކޮމިޝަންގެ ބައްދަލުވުމުގައި ފާސްކޮށްފައިވާ ކަމަށެވެ.

އެހެންނަމަވެސް ރައްޔިތުންގެ ހިޔާލު ހޯދުމުގެ އާންމު ވޯޓު ނެގުމުގެ ކަންކަން ކުރިއަށް ގެންދިއުމަށް، އެ ވޯޓު ނަގާ މައުޟޫއާ ގުޅިގެން ރައްޔިތުން ހޭލުންތެރިކުރުމަށާއި، ވޯޓުގައި ބައިވެރިވާ ފަރާތްތަކުގެ ރަޖިސްޓްރީ އެކުލަވާލުމާއި، ވޯޓާއި ގުޅޭގޮތުން ޝަކުވާ ހުށަހެޅުމުގެ އިންތިޒާމްތަކާއި ވޯޓުލުމަށް ތައްޔާރުކުރަންޖެހޭ އެންމެހާ ކަންކަން ކުރުމަށް އެކަށީގެންވާ ވަގުތު ބޭނުންވާނެތީ އެންމެހާ ކަންކަމަށް ހޭދަވާނެކަމަށް ލަފާކުރެވޭ މުއްދަތުތަކަށް ބަލާއިރު، އެންމެ އަވަހަށް ވޯޓުނެގުމަށް ކުރިއަށް ގެންދެވޭނެ ތާރީހު މަޖިލީހަށް ފަހުން އަންގާނެކަމަށް އިލެކްޝަންސް ކޮމިޝަންގެ ސިޓީގައި ބުނެފައިވެއެވެ.

ނިޒާމީ ވޯޓު ގަރާރުގައި ބަޔާންކޮށްފައިވާ ގޮތުގެ މަތިން ވޯޓު ނެގުނުގެ އިންތިޒާމް ކުރިއަށް ގެންދިއުމަށްޓަކައި ދެވަނަ ކަމަކަށް ލިޔުމުން ހިއްސާކޮށްދެއްވުމަށް އިލެކްޝަންސް ކޮމިޝަނުން އެދިފައިވަނީ:

އިލެކްޝަންސް ކޮމިޝަނުން ބުނެފައިވަނީ ވޯޓު ނެގުމަށް ބައްވާ އިންތިހާބަށް އިލެކްޝަންސް ކޮމިޝަނުން ކުރަންޖެހޭކަމަށް ލަފާކުރެވޭ ހަރަދުގެ ބަޖެޓް، ކޮމިޝަނުން ހިއްސާކުރުމުން ބަޖެޓުގައިވާ ގޮތުގެ މަތިން ވޯޓު ނެގުމުގެ ކަންކަމަށް ހޭދަވާނެ ފައިސާ ލިބޭނެ އިންތިޒާމް ވެވަޑައިގެންނެވި އެންމެ އަވަހަކަށް ފުރުސަތެއްގެ ތެރޭގައި ހަމަޖައްސައިދެއްވުމަށް ވަނީ އެދިފައެވެ.

މީގެ އިތުރުން ރައްޔިތުންގެ ހިޔާލު ހޯދުމުގެ އާންމު ވޯޓު ނެގުމުގައި އަމަލުކުރަންޖެހޭ އުސޫލުތައް ބަޔާންކުރާ ތަފްސީލީ ގާނޫނެއް އަދި ގަވާއިދެއް ވުޖޫދުގައި ނެތް ކަމަށް ފާހަގަކޮށްފައިވެއެެވެ. އެހެންކަމުން އިލެކްޝަންސް ކޮމިޝަންގެ ގާނޫނުގެ 32 ވަނަ މާއްދާއިން ކޮމިޝަނަށް ލިބިދީފައިވާ ބާރުގެ ދަށުން ރައްޔިތުންގެ ހިޔާލު ހޯދުމުގެ އާންމު ވޯޓު ނެގުމުގެ ގޮތުން ބާއްވާ އިންތިހާބު ބޭއްވުމުގައި އަމަލުކުރާނެ އުސޫލުތައް ބަޔާންކުރުމުގެ ގަވާއިދެއް އެކުލަވާލާ، އެ ގަވާއިދު ދެ ދުވަހެއްގެ ތެރޭގައި ދިވެހި ސަރުކާރުގެ ގެޒެޓުގައި ޝާއިޢުކުރުމުގެ މަސައްކަތް ވެސް ކޮމިޝަނުން ކުރަމުންދާ ކަމަށް ބުނެފައިވެއެވެ.