ކޮށްފައިވަނީ ދޮގު ތުހުމަތުތަކެއް، ބިރުދައްކައިގެން މަސައްކަތެއް ނުހުއްޓުވޭނެ: ފާރިސް
19 ޖޫން 2017 | ހޯމަ 17:10ފާރިސްގެ މައްޗަށް ކޮށްފައިވަނީ ރިޝްވަތު ދިނުމުގެ ތުހުމަތު
ރައްޔިތުންގެ މަޖިލީހުގެ ދިއްގަރު ދައިރާގެ މެންބަރު އަޙުމަދު ފާރިސް މައުމޫން
ރައްޔިތުންގެ މަޖިލީހުގެ ދިއްގަރު ދައިރާގެ މެންބަރު އަޙުމަދު ފާރިސް މައުމޫންގެ މައްޗަށް ދައުލަތުން ކޮށްފައިވާ ތުހުމަތުތަކަކީ ދޮގު ތުހުމަތުތަކެއް ކަމަށާ، ބިރުދައްކައިގެން މަސައްކަތް ނުހުއްޓުވޭނެ ކަމަށް އެމަނިކުފާނު ވިދާޅުވެއްޖެއެވެ.
ފާރިސް މިގޮތަށް ވިދާޅުވީ، ކުރީގެ ރައީސުލްޖުމްހޫރިއްޔާ އަދި ފާރިސްގެ ބައްޕާފުޅު، މައުމޫން ޢަބްދުލްޤައްޔޫމްގެ ޕަރސަނަލް އެސިސްޓަންޓް، އަޙުމަދު ސޮފްވާން ފުލުހުންގެ ތަހުގީގަށް ހާޒިރުވާން އެންގުމުން، ފުލުހުންގެ ޗިޓަށް ހާޒިރު ނުވި މައްސަލައިގައި ދައުވާ ކުރުމަށް ޕްރޮސެކިއުޓަރ ޖެނެރަލްގެ އޮފީހަށް ފޮނުވިކަން ހާމަކޮށް، ފުލުހުން ކުރި ޓްވީތްތަކެއްގައި ފާރިސްގެ މައްޗަށް ކޮށްފައިވާ ތުހުމަތުތަކަށް އިޝަރާތް ކުރައްވާ ކުރެއްވި ޓްވީޓެއްގައެވެ.
ފުލުހުން ކުރި ޓްވީޓްގައި ބުނެފައިވަނީ، ރައްޔިތުންގެ މަޖިލީހުގެ ރައީސްގެ އިތުބާރު ނެތްކަމުގެ ވޯޓަށް ނުފޫޒު ފޯރުވުމުގެ ގޮތުން، ދިއްގަރު ދާއިރާގެ މެންބަރު އަޙުމަދު ފާރިސް މައުމޫން، މަޖިލިސް މެންބަރުންނަށް ރިޝްވަތު ދެއްވިކަމަށް ތުހުމަތު ކުރެވޭ ކަމަށެވެ.
މި ކަމާއި ގުޅިގެން ފާރިސް ކުރެއްވި ޓްވީޓްގައި ވިދާޅުވީ، ސަރުކާރުން އެމަނިކުފާނާއި ދެކޮޅަށް ކޮށްފައިވާ ތުހުމަތުތަކަށް ހަރުއަޑުން ދެކޮޅުހައްދަވާ ކަމަށާ، އެއީ ދޮގު ތުހުމަތުތަކެއް ކަމަށެވެ.
ފާރިސް ވިދާޅުވީ، އިންޒާރުދީ ބިރުދައްކައިގެން، ފާރިސް ކުރައްވަމުން ގެންދަވާ މަސައްކަތް ނުހުއްޓުވޭނެ ކަމަށެވެ.
ރައްޔިތުންގެ މަޖިލީހުގެ ރައީސްގެ އިތުބާރު ނެތްކަމުގެ ވޯޓަށް ނުފޫޒު ފޯރުވުމުގެ ގޮތުން، އެކި ފަރާތްތަކަށް ނުފޫޒު ފޯރުވުމުގެ ތުހުމަތު ފާރިސްގެ އިތުރުން ޖުމްހޫރީ ޕާޓީގެ ލީޑަރު އަދި ރައްޔިތުންގެ މަޖިލީހުގެ މާމިގިލީ ދާއިރާގެ މެންބަރު ޤާސިމް އިބްރާހިމްގެ މައްޗަށްވެސް ދައުލަތުން ވަނީ ކޮށްފައެވެ.
