ސިފައިން އަބަދުވެސް އިސްކުރާނީ ރައްޔިތުންނާއި ޤައުމީ ވާޖިބުކަމަށް ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުﷲ ޝަމާލް ވިދާޅުވެއްޖެއެވެ.

ސިފައިންގެ 130 ވަނަ އަހަރީ ދުވަހުގެ ރަސްމީ ޖަލްސާގައި ވާހަކަދައްކަވަމުން ޝަމާލް ވިދާޅުވީ، ސިފައިންގެ ދުވަހަކީ ދިވެހި އަސްކަރިއްޔާގެ އަގުހުރި ޤައުމީ ޚިދުމަތާއި، ސިފައިންގެ މަތިވެރި ޤުރުބާނީގެ ހަނދާންތައް އައު ކުރެވޭ ދުވަސް ކަމަށެވެ. އެގޮތުން ދީނާއި ޤައުމު ހިމާޔަތްކޮށް، ދިވެހި ފަސްގަނޑުގެ މިނިވަންކަމަށްޓަކައި ސިފައިން އަދާކުރާ މުހިއްމު ދައުރަށް ޝަމާލް ވަނީ އަލިއަޅުވާލައްވާފައެވެ.

ޝަމާލް ވިދާޅުވީ، ސިފައިންގެ ދުވަހަކީ އެ ކަންކަމުގައި ނުގުޑާ ފަދަ އަޒުމެއް އަނެއްކާވެސް އާކުރެވިގެންދާ ދުވަހެއް ކަމަށެވެ. ޝަމާލް ވަނީ ދުވަހުގެ ތަހުނިޔާ ސިފައިންނާއި، ސިފައިންގެ އާއިލާތަކަށް ދަންނަވާފައެވެ.

ފާއިތުވި ދެ އަހަރެއްހާ ދުވަސް ވޭތުކޮށްފައިވަނީ ކޮވިޑް-19 އާ ދެކޮޅަށް ކުރި ހަނގުރާމައެއްގެ ތެރޭގައިކަން ފާހަގަ ކުރައްވައި ޝަމާލް އިތުރަށް ވިދާޅުވީ، އެ އޮޕަރޭޝަންގައި ރައްޔިތުންނާއި ޤައުމު އިސްކޮށް، ގިނަ ދުވަސްތަކެއް ވަންދެން އާއިލާއާއި ދުރުގައި ސިފައިން އަދާކޮށްފައިވަނީ ޤައުމީ އަދި އިންސާނީ މަތިވެރި ޚިދުމަތެއް ކަމަށެވެ.

ޝަމާލް ވަނީ ސިފައިންގެ އެންމެ އިސްވެރިޔާގެ ޙައިސިއްޔަތުން ރައީސުލްޖުމްހޫރިއްޔާ އިބްރާހިމް މުޙައްމަދު ސާލިޙު ކުރެއްވި މަސައްކަތްޕުޅާއި، ދިފާއީ ވަޒީރުގެ މޭސްތިރިކަމުގެ ދަށުން ސިފައިން ކުރައްވާފައިވާ މަސައްކަތް ފާހަގަ ކުރައްވާފައެވެ.

ޝަމާލް ވިދާޅުވީ، ސިފައިން އަބަދުވެސް އިސްކުރާނީ ރައްޔިތުންނާއި ޤައުމީ ވާޖިބުކަން ކޮވިޑް-19 ބަލިމަޑުކަމުގެ ތެރޭގައިވެސް ފެނިގެން ގޮސްފައިވާ ކަމަށެވެ.

މިއަދު ދިވެހި އަސްކަރިއްޔާ ބައްޓަން ކުރަމުން ގެންދަނީ ވިސްނުންތެރިކަމާއެކު، ކަނޑައެޅިފައިވާ ވަކި ސިޔާސަތުތަކެއްގެ ތެރެއިންކަމަށް ޝަމާލް ވިދާޅުވިއެވެ. އެގޮތުންވެސް އެންމެ އިސްކަމެއް ދީފައިވަނީ ދިވެހި ސިފައިންގެ ޚިދުމަތްތައް ހަރުދަނާ ކުރުމަށާއި، ބަދަލުވަމުން އަންނަ ނުރައްކާތެރި ސަލާމަތީ މަސްރަހާއި ކުރިމަތިލުމަށް ބޭނުންވާ އަސްކަރީ ޤާބިލުކަން އިތުރު ކުރުމަށްކަން ޝަމާލް ފާހަގަ ކުރެއްވިއެވެ.

އޭގެ އިތުރުން، ކައުންޓަރ ޓެރަރިޒަމްފަދަ ދާއިރާތަކުން ޤާބިލުކަން އިތުރު ކުރުމުގެ ގޮތުން ބޭރުގެ ޤައުމުތަކުގެ އެހީގައި ވަސީލަތްތަކާއި ތަމްރީނުތައް ހޯދަމުން ގެންދާކަންވެސް ޝަމާލްގެ ވާހަކަފުޅުގައި ފާހަގަ ކުރެއްވިއެވެ.

ބޭރު ޤައުމުތަކާއެކު އޮތް އެކުވެރި އަދި ބަދަހި ގުޅުންތައް ދެމެހެއްޓުމަށްވެސް އަސްކަރިއްޔާއިން ޚާއްސަ ސަމާލުކަމެއް ދޭކަން ޝަމާލް ފާހަގަ ކުރެއްވިއެވެ.