ސިފައިން ބޭނުންވާ އެންމެ ޒަމާނީ ހަތިޔާރާއި އާލާތްތައް މިހާރު ވަނީ ހޯދިފައި: ރައީސް
ޚާރިޖީ ސިޔާސަތަށް މި ސަރުކާރުން ގެނައި ހެޔޮ ބަދަލުގެ ސަބަބުން އަސްކަރީ ގާބިލުކަން އިތުރުވެއްޖެ ކަމަށް ރައީސް ވިދާޅުވި
ސިފައިންގެ އަހަރީ ދުވަހުގެ ޖަލްސާގައި ރައީސް ވާހަކަފުޅު ދައްކަވަނީ
އަސްކަރިއްޔާގެ އޮޕަރޭޝަނަލް ގާބިލުކަން އިތުރު ކުރަން މުހިންމު މަސައްކަތެއް ކުރެވިއްޖެ ކަމަށާއި ސިފައިންނަށް ބޭނުންވާ ޒަމާނީ ހަތިޔާރާއި އާލަތްތައް ހޯދިފައިވާ ކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވިދާޅުވެއްޖެއެވެ.
ދިވެހި ސިފައިންގެ 130 ވަނަ އަހަރީ ދުވަހާ ގުޅުވައިގެން އަންގާރަ ދުވަހުގެ ރޭ ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ ރާއްޖޭގެ މިނިވަންކަމުގެ މަރުކާއަކީ ދިވެހި ސިފައިންގެ އަސްކަރީ ގާބިލުކަން ކަމަށެވެ. އެހެންވެ، އަސްކަރިއްޔާގެ އޮޕަރޭޝަނަލް ގާބިލުކަން އިތުރު ކުރުމަށް ފާއިތުވި ދެ އަހަރު ދުވަހުގެ ތެރޭގައި މުހިންމު މަސައްކަތްތަކެއް ކުރެއްވި ކަމަށާއި އެގޮތުން، ޒަމާނީ ވަސީލަތްތައް ހޯދައި ޓެރަރިޒަމްގެ ހާދިސާތަކާ ކުރިމަތިލުމުގެ ގާބިލުކަން އެތައް ގުނައެއް އިތުރު ކުރެވިފައިވާ ކަމަށް ރައީސް ވިދާޅުވިއެވެ.
ޤައުމުގެ ދިފާއުގެ އެންމެ ކުރީ ސަފުގައި ޙަރަކާތްތެރިވާ ސިފައިންނަށް ބޭނުންވާ އެންމެ ޒަމާނީ ހަތިޔާރާއި އާލާތްތައް ހޯދައިދެވިފައިވާކަން ހާމަކުރައްވައި ރައީސް ވިދާޅުވީ ސިފައިންގެ ސިފަވަންތަކަން ދަމަހައްޓައިދޭ ޢިލްމީ އަދި ފަންނީ ތަމްރީނުތައް ވެސް ބަރާބަރަށް ދެމުންދާ ކަމަށެވެ.
ދިވެހި އަސްކަރީ ގާބިލުކަން އިތުރުކުރުމަށް ރަހުމަތްތެރި ބޭރުގެ ޤައުމުތަކުން ދޭ އެހީތެރިކަން ހަނދާން ކުރަން ޖެހޭ ކަން ފާހަގަކުރައްވައި ރައީސް ވިދާޅުވީ ރާއްޖޭގެ ޚާރިޖީ ސިޔާސަތަށް މި ސަރުކާރުން ގެނައި ހެޔޮ ބަދަލުގެ ސަބަބުން އަސްކަރީ ގާބިލުކަން އިތުރުވެ، ރާއްޖޭގެ ސިޔާދަތީ މިނިވަންކަމަށް ރައްކާތެރިކަމަކާއި ޔަޤީންކަމެއް ލިބިފައިވާ ކަމަށެވެ. އަދި ޤައުމުގެ ސަލާމަތާއި ރައްކާތެރިކަން ކަށަވަރު ކުރެވޭނީ، ސަރަޙައްދީ ޞުލްހަޔާއި ހަމަޖެހުން ދެމިއޮތް މިންވަރެއްގެ މައްޗަށް ކަަމަށް ވެސް ރަައީސް ވިދާޅުވިއެވެ.
ރައީސް ވިދާޅުވީ އިންޑިއާ ކަނޑުގެ ސަލާމަތާއި ރައްކާތެރިކަން ކަށަވަރުކުރުމުގައި، ދިވެހިން ވެސް އަދާކުރަންޖެހޭ ދައުރެއް އެބައޮތް ކަމަށެވެ. އެ ޒިންމާ މިއަދުގެ ސިވެހި އަސްކަރިއްޔާއިން ވަރަށް ފުރިހަމައަށް އަދާ ކުރަމުން އަންނަކަން ޤަބޫލު ކުރައްވާކަމަށް ވެސް ރައީސް ވިދާޅުވިއެވެ.
ރައީސް އިތުރަށް ވިދާޅުވީ މިންތީގެ ހަމަހަމަކަމުގައި މިއަދު ދިވެހި ސިފައިންނަކީ ނަމޫނާ ބައެއް ކަމަށެވެ. އެގޮތުން 1989 ވަނަ އަހަރު ސިފައިންގެ ޚިދުމަތަށް އަންހެނުން ވެއްދި ނަމަވެސް އެ ކަނބަލުންގެ ހަމައެކަނި ޒިންމާއަކީ އިދާރީ މަސައްކަތް ކަމަށްވި ނަމަވެސް މިއަދު އަންހެން ސިފައިންނަކީ އެންމެ ފަހުގެ އަސްކަރީ ތަމްރީންތައް ހޯދައިގެން ޤައުމުގެ ދިފާއުގައި އެންމެ ކުރީ ސަފަށް ނުކުންނަށް ތައްޔާރަށް ތިބި ބައެއްކަން ރައީސް ފާހަގަކުރެއްވިއެވެ.
ރައީސް ވިދާޅުވީ ކޮންމެ މީހަކަށް ވެސް އެ މީހެއްގެ ކެރުމާއި ޤާބިލުކަން ހުރި މިންވަރަކުން ސިފައިންގެ ޚިދުމަތުގައި މިހާރު ކުރިއަށްދެވޭނެ ކަމަށެވެ. މި ޚިދުމަތުގައި އަންހެނުންނާއި ފިރިހެނުން ތަފާތުނުކޮށް އެންމެނަށް ވެސް ހަމަހަމަ ފުރުސަތުތައް ހޯއްދައިވައިދެއްވާނެ ކަމުގެ ޔަގީންކަން ވެސް ރައީސް ދެއްވިއެވެ.
ދިވެހި ސިފައިންގެ ޚިދުމަތުގެ ތާރީހުގައި ވެސް ފުރަތަމަ ފަހަރަށް ލެފްޓިނެންޓް ކާނަލްގެ ރޭންކަށް އަންހެން އޮފިސަރުން ހަމަޖެއްސީ މިދިޔަ އަހަރުއެވެ. އެ ރޭންކުގައި ދެ އަންހެން ސިފައިން ތިއްބެވިއިރު އެއީ ސިފައިންގެ ލަފާދޭ މަޖިލީހުގައި ވެސް ވަރަށް މުހިންމު ދައުރެއް އަދާކުރައްވަމުން ގެންދަވާ ދެ ސިފައިން ކަން ރައީސްގެ ވާހަކަފުޅުގައި ފާހަގަކުރެއްވިއެވެ.
