ޓެރަރިޒަމްގެ އުކުޅުތައް ބަދަލުވެ، ނުރައްކާ އިތުރުވަމުންދާކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
ރައީސުލްޖުމްހޫރިއްޔާ މިފަދައިން ވިދާޅުވީ އަންގާރަ ދުވަހުގެރޭ ބޭއްވުނު ސިފައިންގެ 130 ވަނަ އަހަރީ ދުވަހުގެ ޖަލްސާގައި ވާހަކަފުޅުދައްކަވަމުންނެވެ.
ރައީސުލްޖުމްހޫރިއްޔާ ވިދާޅުވީ ޒަމާނީ ޓެކްނޮލޮޖީއާއި، މުވާސަލާތީ ގޮތުން އަންނަ ކުރިއެރުންތަކާއެކު ޓެރަރިޒަމްގެ އުކުޅުތައް ބަދަލުވެ، ނުރައްކާ ބޮޑުވަމުންދާކަމަށެވެ. އެތެރެއާއި ބޭރުންވެސް އެ ނުރައްކާތައް ދަނީ ކުރިމަތިވަމުން ކަމަށް ރައީސް ވިދާޅުވިއެވެ. އެފަދަ ކޮންމެ ކަމަކުން ދިވެހިންނާއި ދިވެހި ގައުމު ސަލާމަތްކުރުމަށް ތިބެނީ ދިވެހި ސިފައިން ކަމުގައި ރައީސް ފާހަގަކުރެއްވިއެވެ. އެހެންކަމުން ސިފައިންގެ ގާބިލުކަން އިތުރުކޮށް ވަސީލަތްތައް އިތުރުކުރުމަކީ މި ސަރުކާރުން ޚާއްސަ އިސްކަމެއް ދެއްވާ ކަމެއް ކަމުގައި ރައީސް ވިދާޅުވިއެވެ.
ގައުމަށް ދިމާވި ކޮންމެ ކަމެއްގައި އެންމެ ކުރީ ސަފުގައި ހަރަކާތްތެރިވާ ސިފައިންނަށް ބޭނުންވާ އެންމެ ޒަމާނީ ހަތިޔާރާއި، އާލާތްތައް ހޯދިފައިވާ ކަމަށް ރައީސް ވިދާޅުވިއެވެ. އަދި ސިފައިންގެ ސިފަވަންތަކަން ދަމަހައްޓައިދޭ އިލްމީ އަދި ފަންނީ ތަމްރީނުތައް ސިފައިންނަށް ބަރާބަރަށް ދެމުންގެންދަވާކަމަށްވެސް ރައީސް ވިދާޅުވިއެވެ.
ހަމަ މީގެ އިތުރުން ދިވެހި އަސްކަރިއްޔާގައި މިންތީގެ ހަމަހަމަކަން ގާއިމްކުރުމަށް ކުރައްވާ މަސައްކަތްޕުޅަށްވެސް ރައީސްގެ ވާހަކަފުޅުގައި ވަނީ އަލިއަޅުވާލައްވާފައެވެ.
މި ރަސްމިއްޔާތުގައި ރައީސުލްޖުމްހޫރިއްޔާގެ އަރިހުގައި ރައީސުލްޖުމްހޫރިއްޔާގެ ނާއިބު ފައިސަލް ނަސީމާއި، ޑިފެންސް މިނިސްޓަރ މާރިޔާ އަހުމަދު ދީދީއާއި، ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުﷲ ޝަމާލްގެ އިތުރުން ސިފައިންގޭގެ އެކި މަގާމުތަކުގައި މަސައްކަތްކުރައްވާ އޮފިސަރުން ވަނީ ބައިވެރިވެވަޑައިގެންފައެވެ.
