އަޅުގަނޑު ޔާމީނަށް ތާއީދެއް ނުކުރާނަން، ޕާޓީން ކުރަންޏާ ކުރަންވީ: ގާސިމް
އެއް ހަރަކުން މުއުމިނެއްގެ ގަޔަށް ދެ ފަހަރަށް ކައްޓެއް ނުޖެހޭނެ ކަމަށް ވިދާޅުވި
ކުނޫޒުގައި ގާސިމް ވާހަކަފުޅު ދައްކަވަނީ
ކުރީގެ ރައީސް އަބްދުﷲ ޔާމީންއަށް އަންނަ އަހަރުގެ ރިޔާސީ އިންތިޚާބުގައި ތާއީދު ނުކުރައްވާނެ ކަމަށް ރައްޔިތުންގެ މަޖިލީހުގެ މާމިގިލި ދާއިރާގެ މެމްބަރު އަދި ޖުމްހޫރީ ޕާޓީގެ ލީޑަރު ގާސިމް އިބްރާހިމް ވިދާޅުވެއްޖެއެވެ.
"ރާއްޖެ ޓީވީ" ގެ ފަށާއިރުގައި ވާހަކަފުޅު ދައްކަވަމުން ގާސިމް ވިދާޅުވީ ކުރިން ވެސް ވިދާޅުވެފައިވާ ފަދައިން އެއް ހަރަކުން މުއުމިނެއްގެ ގަޔަށް ދެ ފަހަރަށް ކައްޓެއް ނުޖެހޭނެ ކަމަށާއި އެހެންވެ، ޔާމީންއަށް ތާއީދު ނުކުރައްވާނެ ކަމަށެވެ. ނަމަވެސް ޖުމްހޫރީ ޕާޓީ އިން ކުރިއަށް އޮތް ރިޔާސީ އިންތިޚާބުގައި ޔާމީނަށް ތާއީދު ކުރަން ބޭނުންވާ ނަމަ އެކަން ޕާޓީއަށް ކުރެވޭނެ ކަމަށް ވިދާޅުވިއެވެ.
ގާސިމް ޔާމީނުއާއެކު މަސައްކަތް ނުކުރައްވާނެ ކަމަށް ވިދާޅުވެފައި މިވަނީ 2013 ވަނަ އަހަރުގެ ރިޔާސީ އިންތިޚާބުގައި އެމަނިކުފާނާ ކޯލިޝަން ހައްދަވައިގެން ވެރިކަން ލިބިވަޑައިގަތުމުން ކޯލިޝަން އެއްބަސްވުމުން ޔާމީން ޚިލާފުވެވަޑައިގެން ގާސިމް ޖަލައްލުމާއި ގުޅިގެންނެވެ. ރައީސް ޔާމީންގެ ވެރިކަމުގައި ގާސިމްގެ އިތުރުން އެމަނިކުފާނާއެކު މަސައްކަތް ކުރެއްވި ގިނަ އަދަދެއްގެ ސިޔާސީ ބޭފުޅުން ޖަލަށްލިއެވެ.
ގާސިމް ވިދާޅުވީ މިހާތަނަށް ޖުމްހޫރީ ޕާޓީއިން އަންނަ އަހަރުގެ ކެނޑިޑޭޓަކު ނެރުމާމެދު ގޮތެއް ނުނިންމާ ކަމަށާއި އަދި ކޯލިޝަނަކާ ގުޅޭގޮތުން ވެސް މަޝްވަރާ ނުކުރައްވާ ކަމަށެވެ.
ރާއްޖޭގެ ވެރިކަމުގެ ނިޒާމު ބަރުލަމާނީ ނިޒާމަކަށް ހެދުމާ ގުޅޭގޮތުން ދެކެވަޑައިގަންނަވާ ގޮތާމެދު ދެންނެވި ސުވާލަށް ޖަވާބުދެއްވަމުން ގާސިމް ވިދާޅުވީ އެކަމަށް އެއްވެސް ގޮތަކަށް ތާއީދު ނުކުރައްވާ ކަމަށެވެ. އެއީ އޭގެ ސަބަބުން ރައްޔިތުން އިތުރަށް ނިކަމެތިވެ ކޮރަޕްޝަނުގެ ކަންކަން އިތުރުވާނެތީ ކަމަށް ވިދާޅުވިއެވެ.
ގާސިމް އިތުރަށް ވިދާޅުވީ ބަރުލަމާނީ ނިޒާމެއްގައި ހުރިހާ ވުޒާރާތަކެއް ހިންގުމުގައި ތިބޭނީ މަޖިލިސް މެމްބަރުންނަށްވުމުން ސަރުކާރު ޖަވާބުދާރީ ނުކުރެވޭނެ ކަމަށެވެ.
ގާސިމް ބަރުލަމާނީ ނިޒާމު ސިފަ ކުރެއްވީ ރައްޔިތުންގެ ލާރިން އެހެން ބައެއްގެ ދިރިއުޅުން ރަނގަލުކުރުމަށް ނާޖާއިޒު ފައިދާ ނަގާ ފުރުސަތެއްގެ ގޮތުގައެވެ.
