6 ބައްޔެެއް ފެތުރެމުންދާތީ ސަމާލުވުމަށް އިލްތިމާސްކޮށްފި

ރާއްޖޭގައި މިވަގުތު 6 ބައްޔެއް ހަލުވިކަމާއެކު ފެތުރެމުންދާތީ ސަމާުލުވުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން އިލްތިމާސްކޮށްފިއެވެ.

އެ އިދާރާއިން ކުރި ޓވްީޓެއްގައި ވަނީ، މިވަގުތު ރާއްޖޭގައި ފެތުރެމުންދާކަމަށް ފާހަގަވެފައިވަނީ ހުމާއި، ރޯގާއާއި، ފާނަބަސަންދާއި، ހޭންޑް ފުޓް އެންޑް މައުތާއި، ލޮލުރޯގާއާއި، ބޭރަށް ހިންގުމާއި ޑެންގީކަމަށެވެ. މި ބަލިތައް ދެނެގަނެ ރައްކާތެރިކަމުގެ ފިޔަވަޅުތައް އެޅުމަށް ވަނީ އިލްތިމާސްކޮށްފައެވެ.

މި ބަލިތަކުގެ ތެރެއިން ފާނަބަސަންދާއި ލޮލުރޯގާއަކީ މި ފަހަކަށް އައިސް ފެތުރެމުން އަންނަ ބަލިތަކެކެވެ. މިއީ ގައިން ގަޔަށް އަރާ ބަލިތަކަކަށްވުމުން، ސަމާލުވުމަށް ސިއްހީ މާހިރުން އެދެއެވެ. މިގޮތުން، މި ބަލީގެ އެއްވެސް އަލާމާތެއް ފެނިއްޖެނަމަ ވަގުތުން ޑޮކްޓަރަށް ދެއްކުމަށް ވަނީ އިލްތިމާސްކޮށްފައެވެ.

ފާނަބަސަންދުގެ އަލާމަތްތަކުގެ ތެރޭގައި; ވަރުބަލިވުމާއި، ގަދައަށް ހުންއައުމާއި، ކާހިތްނުވުމާއި، ބޮލުގައި ރިއްސުމާއި، ކެއްސުމާއި، ކަރުގައި ރިހުމާއި، ބަނޑުގައި ރިހުން، އަދި ފެންއަރާފައި ހުންނަ ބިހިތަކެއް (ބްލިސްޓަރސް) ހަމުގައި ނެގުން ހިމެނެއެވެ.

ލޮލުރޯގާ ޖެހުމުން ލޮލުގެ ހުދުކަޅީގެ މަތީގައިވާ ތުނި ދުލި ދުޅަވެ، ރަތްވެ، ޖަރާސީމު އުފެދެއެވެ. އަދި، ލޯ ރަތްވެ، ލޮލުން ފެން އައިސް، މަޑުލައެވެ. ލޯ ދުޅަވެ، ބައެއް ފަހަރު ލޮލުގެ ފެނުންވެސް ނުސާފުވެއެވެ.

މިދިޔަ އަހަރާ އަޅައިބަލާއިރު މި އަހަރު އަރިދަފުސް ރޯގާ ފެތުރެމުންދާ މިންވަރު ވަރަށް ބޮޑަށް އިތުރުވެފައިވެއެވެ. މިގޮތުން މިދިޔަ މަހު އެކަނިވެސް 25،700ށްވުރެ ގިނަ މީހުންނަށް މި ރޯގާ ޖެހުނުކަމަށް އެޗްޕީއޭގެ އެންމެ ފަހުގެ ތަފާސްހިސާބުތަކުން ދައްކައެވެ.