އޮކްޓޯބަރު މަހު 600ށްވުރެ ގިނަ ޑެންގީގެ ކޭސް ފެނިފައިވާއިރު، 500 ކޭސް ރިޕޯޓްކޮށްފައިވަނީ ރ އަތޮޅުން ކަމަށް، ހެލްތު ޕްރޮޓެކްޝަން އެޖެންސީގެ (އެޗްޕީއޭ)ގެ ޑިރެކްޓަރ ޕަބްލިކް ހެލްތު ޕްރޮގްރާމް އާމިނަތު އަރޫޝާ ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ބުދަ ދުވަހުގެ ރޭ ވާހަކަފުޅުދައްކަވަމުން އަރޫޝާ ވިދާޅުވީ، ޑެންގީގެ ކޭސްތައް އިތުރުވެފައިވާއިރު ރ އަތޮޅާއި ދެކުނުގެ އަތޮޅުތަކުގައި ކޭސްތައް އިތުރުވަމުން އަންނަ ކަމަށެވެ.
ފާއިތުވި ތިން އަހަރުގެ ތަފާސް ހިސާބުތަކަށް ބަލާއިރުވެސް ރ އަތޮޅުން މިއަހަރު ފެނުނު ޑެންގީގެ ކޭސްތަކުގެ އަދަދު އިތުރު ކަމަށް އޭނާ ވިދާޅުވިއެވެ.
އަރިދަފުސް ރޯގާއާއި ހުމުގެ އިތުރުން ކެއްސުމުގެ އުނދަގޫ ހުންނަ ރޯގާ ބޮޑެތި މީހުންނާއި ކުޑަކުދިންނަށް ޖެހިގެން ރިޕޯޓްކުރާ މިންވަރު އިތުރުވުމުން، ހޮސްޕިޓަލުތަކުން އެ މައުލޫމާތު ހިއްސާކޮށްފައިވާ ކަމަށްވެސް ވިދާޅުވިއެވެ. އަދި ހޮސްޕިޓަލްތަކާ ގުޅިގެން ގިނަ އަދަދެއްގެ މީހުން ކޮވިޑަށް ޓެސްޓްކުރި ކަމަށާއި އެ ޓެސްޓްތަކުން ގިނަ އަދަދެއްގެ މީހުން ކޮވިޑަށް ޕޮޒިޓިވްވިކަމަށް އަރޫޝާ ވިދާޅުވިއެވެ.
ކޮވިޑްގެ ކޭސްތައް އިތުރުވެފައިވަނީ ގްރޭޓަރ މާލެ ސަރަހައްދުގައިކަން ފާހަގަކުރައްވައި އަރޫޝާ ވިދާޅުވީ، އަތޮޅު ތެރޭގައިވެސް ކޮވިޑަށް ޓެސްޓް ކުރުމަށް އިރުޝާދުތައް ދެމުން އަންނަ ކަމަށެވެ. ކޮވިޑް ކޮންޓްރޯލް ކުރުމަށް އަތޮޅު ތެރޭގައި ރިޕޯޓިންގ ނިޒާމް ހަރުދަނާ ކުރުމަށް މަސައްކަތް ކުރައްވަމުން ގެންދަވާ ކަމަށްވެސް ވިދާޅުވިއެވެ.
ރޯގާގެ ގޮތުގައި މި ދުވަސްވަރު އަރިދަފުސް ރޯގާއާއި ބޭރަށް ހިންގުން އިތުރުކަމަށާއި، ކޮވިޑުގައި އާންމު ބަލީގެ ރޯގާތައް ދަށްވުމަށްފަހު އޮކްޓޯބަރު މަހު ކޭސްތައް އިތުރުވާން ފަށާފައިވާ ކަމަށްވެސް އަރޫޝާ ވިދާޅުވިއެވެ.
ސަރުކާރުން ފިޔަވަޅުތައް ލުއި ކުރިނަމަވެސް ބޫސްޓަރ ޑޯޒް ހަމަކުރަންޖެހޭ ކަމަށާއި، ހަތަރު ވަނަ ޑޯޒް ޖަހަން ބޭނުންވާ ފަރާތްތަކުން ވެކްސިން އަވަހަށް ޖެހުމަށް އަރޫޝާ އިލްތިމާސް ކުރެއްވިއެވެ.
އަރިދަފުސް ރޯގާއިން ރައްކާތެރިވުމުގެ ފިޔަވަޅުތައް އެޅުމަކީ މުހިއްމުކަމެއްކަމަށް އެ އެޖެންސީން ބުނެއެވެ.
ސެޕްޓެމްބަރު މަހު 33،584 ކޭސް ރިޕޯޓުކޮށްފައިވާއިރު، މިދިޔަ އޮކްޓޯބަރު މަހު 31،750 ކޭސް ވަނީ ރިޕޯޓުކޮށްފައެވެ. ނަމަވެސް މިދިޔަ އަހަރުގެ މި ދުވަސްވަރާ އަޅައިބަލާއިރު އަދަދުތައް އިތުރުވަމުން އަންނަކަން ވަނީ ފާހަގަކުރެވިފައެވެ.
އެޗްޕީއޭއިން ބުނީ ސެޕްޓެމްބަރު މަހާ އަޅާ ބަލާއިރު އޮކްޓޫބަރު މަހު އިންފްލުއެންޒާގެ އަލާމާތްތައް ހުރެގެން ޓެސްޓުކުރެވުނު އަދަދު މަދުވެފައިވާ ކަމަށެވެ. އަދި މިއަހަރު މިހާތަނަށް ޓެސްޓު ކުރެވުނު 1203 ސާމްޕަލްގެ ތެރެއިން 134 ސާމްޕަލްވަނީ ޕޮޒިޓިވްވެފައެވެ.
ބޭރަށް ހިންގުމުގެ ކޭސްތައް އިތުރުވެ، ސެޕްޓެމްބަރު މަހު 3533 ކޭސް ރިޕޯޓުކޮށްފައިވާއިރު، މިދިޔަ އޮކްޓޫބަރު މަހު 3820 ކޭސް ވަނީ ރިޕޯޓުކޮށްފައެވެ. މި އަދަދުތައް ދައްކާގޮތުން މިދިޔަ އަހަރަށްވުރެ މިއަހަރުގެ މި މުއްދަތުގެ ތެރޭގައި ކޭސްތައް ރިޕޯޓުކުރާ މިންވަރު ވަނީ ދެގުނަ އިތުރުވެފައެވެ.
މީގެ އިތުރުން އޮކްޓޫބަރު މަހު ލޮލުރޯގާ، ފާނަބަސަންދު، އަދި ހޭންޑް ފުޑް އެންޑް މައުތު ޑިޒީސް ފަދަ ބަލިތައްވެސް އާންމުކޮށް އުޅޭ މިންވަރަށްވުރެ އިތުރުކަމަށް އެޗްޕީއޭއިން ބުނެއެވެ.
