ރާނީ އެލިޒަބަތުގެ ހަށިކޮޅު 6 ގަޑިއިރުގެ ދަތުރުފުޅަކަށް ފަހު ސްކޮޓްލެންޑްގެ އެޑިންބަރާއަށް ގެންގޮސްފިއެވެ.
އެކަމަނާގެ ހަށިކޮޅު އެޑިންބަރާއަށް ގެންގޮސްފައިވަނީ، ހޫނު މޫސުމުގައި އެކަމަނާ ދިރިއުޅުއްވާ ސްކޮޓިޝް ހައިލެންޑުންނެވެ. ހަށިކޮޅު ގެންދިޔަ މަގުގައި އެތައް ހާސް ބަޔަކު އެއްވެފައި ތިބި އިރު، އެތައް ހާސްބަޔަކު ދިޔައީ އެކަމަނާގެ ހަށިކޮޅު ގެންދިޔަ ކާރުކޮޅަށް މާ އުކަމުންނެވެ.
6 ގަޑިއިރުގެ މި ރާސްތާގެ ތެރެއިން ސްކޮޓްލޭންޑްގެ އަވަށްތަކާއި ސިޓީތައް ހުރަސްކޮށްފައިވެއެވެ. ހަށިކޮޅު އެޑިންބަރާއަށް ގެންދެވުމާއެކު އެކަމަނާގެ ސަންދޯއް ހިފައިގެން ސިފައިން ހޮލީރޫޑްހައުސް ގަނޑުވަރުގެ ތާޖު ކޮޓަރިކޮޅަށް ގެންދިޔައެވެ. މިއީ ސްކޮޓްލެންޑްގައި ހުންނަ އެކަމަނާގެ ރަސްމީ ގެކޮޅެވެ. އެތަނުގައި އެކަމަނާގެ ހަށިކޮޅު ރޭ އެއްކޮށް ބާއްވަވާނެއެވެ.
އިނގިރޭސީ އައު ރަސްގެފާނު އަދި ރާނީގެ ދަރިކަލުން ކިންގް ޗާލްސް ވަނީ ޓްރިބިއުޓެއް ދެއްވާފައެވެ.
ސްކޮޓްލޭންޑަށް އެކަމަނާގެ ހަށިކޮޅު ގެންގޮސްފައިވަނީ ބަލްމޯރަލް ގަނޑުވަރުންނެވެ. އުމުރުފުޅުން 96 އަހަރުގައި އެކަމަނާ އަވަހާރަވީ އާލާސްކަންފުޅާ އުޅުއްވަނިކޮށް ބަލްމޯރަލްގައެވެ.
އެޑިންބަރާއަށް ދެވުމާއެކު އެތައް ހާސް ބަޔަކު ވަނީ އެކަމަނާގެ ހަށިކޮޅު ގެންދިޔަ މޮޓޯކޭޑް ދިޔަ މަގުތަކަށް ޖަމާވެ ހިތާމައިގައި ބައިވެރިވެފައެވެ. އަދި އެޑިންބަރާއަށް ދެވުމާއެކު އަސްކަރީ ގާޑް އޮފް އޮނާއެއް ވެސް އެކަމަނާއަށް އެރުވުނެވެ.
ގަނޑުވަރަށް އެކަމަނާގެ ހަށިކޮޅު ގެންދެވުމާއެކު، އެކަމަނާގެ އަންހެން ދަރިކަނބަލުން ޕްރިންސެސް ރޯޔަލް އޭން، ހަގު ދެ ދަރިކަލުން ކަމުގައިވާ ޕްރިންސް އެންޑްރޫ އަދި އެޑްވަރޑް ވަނީ އެކަމަނާގެ ހަށިކޮޅަށް އިހްތިރާމް އަދާކުރައްވާފައެވެ.
އިނގިރޭސީވިލާތުގައި ތަހުތުގައި އިންނަވާ ބޭފުޅަކު އަވަހާރަވެއްޖެނަމަ، އެ ބޭފުޅެއްގެ ޖަނާޒާގެ ކަންކަން ކުރިއަށް ގެންދަނީ ވަކި ގޮތަކަށެވެ. އެގޮތުން ރާނީގެ ހަށިކޮޅު ބަލްމޯރަލް ގަނޑުވަރުން އެޑިންބަރާއަށް ގެންދިއުމަށްފަހު ހޯމަ ދުވަހު ހޮލީރޫޑްސްހައުސް ގަޑުވަރުން ކްރިސްޓިއަނުންގެ ފައްޅިއެއް ކަމަށްވާ އެސްޓީ ގިލްސް ކެތެޑްރަލްއަށް ގެންދެވޭނެއެވެ. އަދި އެކަމަނާގެ ހަށިކޮޅާއެކު ރަސްގެފާނާއި، ޝާހީ އާއިލާގެ ބޭފުޅުން ފައިންޕުޅުގައި ފައްޅިއަށް ވަޑައިގަންނަވާނެއެވެ.
އަންގާރަ ދުވަހު އަޅުކަމުގެ ކަންކަން ފުރިހަމަކުރުމަށްފަހު ލަންޑަނަށް ހަށިކޮޅު ގެންދިއުމަށް އެޑިންބަރާ އެއަރޕޯޓަށް ގެންދާނެއެވެ. އަދި ބުދަ ދުވަހު ވެސްޓްމިންސްޓަރއަށް ހަށިކޮޅު ގެންދެވޭނެއެވެ.
އެކަމަނާގެ ޖަނާޒާ ބާއްވާނީ ސެޕްޓެމްބަރު 19 ވަނަ ދުވަހުއެވެ. ޖަނާޒާގެ ކަންކަން ކުރިއަށްދާނީ ލަންޑަންގެ ވިންޑްސޮރ ގަނޑުވަރުގައެވެ.
