ޕާކިސްތާނު ބަލިކޮށް ކްރިކެޓު އޭޝިއާ ކަޕްގެ ޗެމްޕިއަންކަން ސްރީލަންކާއިން ހޯދައިފި

ކްރިކެޓް އޭޝިއާ ކަޕްގެ ފައިނަލްގައި ޕާކިސްތާނުގެ މައްޗަށް ކުރި ހޯދައި، ސްރީލަންކާ އިން މުބާރާތުގެ ޗެމްޕިއަންކަން ހޯދައިފިއެވެ.

އާދިއްތަ ދުވަހުގެ ރޭ ކުޅުނު ފައިނަލްގައި ލަންކާއިން ޕާކިސްތާނުގެ މައްޗަށް ކުރި ހޯދާފައިވަނީ 23 ލަނޑުންނެވެ. މިއީ ލަންކާއިން މި މުބާރާތް ކާމިޔާބުކުރި ހަ ވަނަ ފަހަރެވެ. އެންމެ ގިނައިން މި މުބާރާތް ކާމިޔާބުކޮށްފައިވަނީ އިންޑިއާ އިންނެވެ. އެންމެ ފަހުން ލަންކާއިން މި މުބާރާތް ކާމިޔާބުކޮށްފައިވަނީ 2014 ވަނަ އަހަރުއެވެ. އެހެންކަމުން މިއަހަރު ލަންކާއިން ތަށި އުފުލާލާފައި މިވަނީ އަށް އަހަރު ދުވަހުގެ މެދު ކެނޑުމަކަށްފަހުއެވެ.

ފައިނަލް މެޗުގައި އެންމެ ފުރަތަމަ ކުޅެން އަރައި ލަންކާއިން ވަނީ 20 އޯވަރުގެ ތެރޭގައި ހަ ކުޅުންތެރިން ނުބައިވެގެން 170 ލަނޑު ހަދާފައެވެ. ޕާކިސްތާނުން ވަނީ ކުޅެން އަރައި، 20 އޯވަރުގެ ތެރޭގައި އެ ޓީމަށް ހެދުނީ 147 ލަނޑެވެ.

މުބާރާތުގައި ލަންކާ ބަލިވެފައިވަނީ އެންމެ މެޗަކުންނެވެ. އެއީ ފުރަތަމަ މެޗުގައި އަފްޣާނިސްތާނު އަތުންނެވެ. ފުރަތަމަ މެޗުގައި އަފްޣާނިސްތާން އަތުން ބަލިވި ނަމަވެސް، ގަދަ ހަތަރު ޓީމު ވާދަކުރި ބުރުގައި ލަންކާއިން ވަނީ އަފްޣާނިސްތާން ބަލިކޮށްފައެވެ.

މިއަހަރުގެ މުބާރާތް ލަންކާއިން ކާމިޔާބުކުރުން އެ ޓީމުގެ ކޯޗު ކްރިސް ސިލްވާވުޑް ސިފަ ކުރަނީ ވަރަށް ޚާއްސަ ކަމެއްގެ ގޮތުގައެވެ. ކޯޗު ވަނީ ހުރިހާ ވެސް ކާމިޔާބަކީ ކުޅުންތެރިން އެމީހުންގެ އަމިއްލަ ނަފްސަށް ކުރި އިތުބާރާއި، މުބާރާތާ މެދު ދުށް ގޮތް ކަމަށެވެ.

ލަންކާއިން މުބާރާތް ކާމިޔާބުކޮށްފައިވާ އަހަރުތަކަކީ 1986، 1997، 2004، 2008، 2014 އަދި 2022 އެވެ.