އިންސެންޓިވްތަކެއް ދީގެން އުތުރާއި ދެކުނުގައި ފަތުރުވެރިކަން ކުރިއެރުވޭނެ: ރާއިދު

އިންސެންޓިވްތަކެއް ދީގެން ރާއްޖޭގެ އުތުރާއި ދެކުނުގެ ފަތުރުވެރިކަން ކުރިއެރުވޭނެ ކަމަށް މޯލްޑިވްސްް އިންޓަގްރޭޓެޑް ޓޫރިޒަމް ޑެވެލޮޕްމަންޓް ކޯޕަރޭޝަން (އެމްއައިޓީޑީސީ) ގެ މެނޭޖިންގ ޑިރެކްޓަރު މުޙައްމަދު ރާއިދު ވިދާޅުވެއްޖެއެވެ.

"ރާއްޖެ ޓީވީ" ގެ ފަލަސުރުޚީގައި ވާހަކަދައްކަވަމުން ރާއިދު ވިދާޅުވީ ރާއްޖޭގައި މިހާރު ހުރި ޓޫރިސްޓް އެނދުގެ ތެރެއިން 79 އިންސައްތަ އަކީ މާލެއާ ގާތްގަޑަކަށް ދެ ގަޑިއިރުގެ ރޭޑިއަސްގެ ތެރޭގައި ހުރި އެނދުތައް ކަމަށެވެ. މި ސަރަހައްދުގައި މިހާގިނަ އަދަދެއްގެ އެނދުތައް ހުރިއިރު ރާއްޖޭގެ އުތުރާ ދެކުނުގައި ފަތުރުވެރިކަން ފުޅާނުވެ އޮތުމުގެ ބައިވަރު ސަބަބުތައް އެބަހުރި ކަމަށް ވެސް އޭނާ ވިދާޅުވިއެވެ.

Advertisement

ރާއިދު ވިދާޅުވީ މާލެ ސަރަހައްދުގައި ރިސޯޓުތައް ހަދައި ފަތުރުވެރިކަން ތަރައްގީ ކުރަމުން އައިއިރު ޓެކްސް ނުނަގާ ކަމަށާއި އެފަދަ އިންސެންޓިވްތައް ދީގެން އެހެން ސަރަހައްދުތަކުގައި ވެސް ފަތުރުވެރިކަން ފުޅާ ކުރެވޭނެ ކަމަށެވެ. އެގޮތުން، ޓެކްސްގެ ލުއިތަކެއް ވެސް ސަރުކާރަށް ވަކި މުއްދަތަކަށް ދެވިދާނެ ކަން އޭނާ ފާހަގަކުރެއްވިއެވެ. މިގޮތަށް އުސޫލުތައް ބަދަލު ކުރެވިއްޖަނަމަ އުތުރާއި ދެކުނަށް ވެސް އިންވެސްޓަރުން ލިބޭނެ ކަމަށް ރާއިދު ވިދާޅުވިއެވެ.

ރާއިދު އިތުރަށް ވިދާޅުވީ އިންޓެންސިވްތަކެއް ދީގެން ސަރުކާރުގެ އާމްދަނީ ދަށްވާނެ ކަމަށް ބަޔަކު ދެކުނު ނަމަވެސް ތަނެއްގައި އިގްތިސާދީ ކަންކަން ފަށައިގަންނަން އެއީ މުހިންމު ކަމެއް ކަމަށެވެ. އެގޮތުން، ޤައުމެއްގެ ވަކި ތަންތަނުގައި އިގްތިސާދީ ހަރަކާތްތައް އިތުރު ކުރުމަށް ނުވަތަ ފަށައިގަތުމަށް ދުނިޔޭގެ އެހެން ޤައުމުތަކުން ވެސް މިފަދަ ފިޔަވަޅުތައް އަޅާކަން ރާއިދު ފާހަގަ ކުރެއްވިއެވެ.

ރާއްޖޭގެ އުތުރާއި ދެކުނުގައި ފަތުރުވެރިކަން ފުޅާވުމުގެ ސަބަބުން އެ ސަރަހައްދުގައި ހިނގާ އިގްތިސާދީ އެހެން ކަންކަމަށް ވެސް ކުރިއެރުން ލިބިގެންދާނެކަން ވެސް ރާއީދު ފާހަގަކުރެއްވިއެވެ.

ރާއިދު ފާހަގަ ކުރެއްވި ގޮތުގައި ދަތުރުފަތުރުގެ މައްސަލައަކީ ވެސް ރާއްޖޭގެ އުތުރާއި ދެކުނުގައި ފަތުރުވެރިކަން ތަރައްގީނުވުމުގެ ސަބަބެކެވެ. މިކަން ހައްލު ކުރުމަށް މި ސަރުކާރުން ކުރަމުން އަންނަ މަސައްކަތުގެ ދަށުން އާރުޓީއެލްގެ ޚިދުމަތަކީ ރަނގަޅު ޚިދުމަތެއްކަން އޭނާ ފާހަގަކުރެއްވިއެވެ.

މީގެ އިތުރުން ވައިގެ ދަތުރުފަތުގައި އަގުތަކަށް ބަދަލުތަކެއް ގެންނަން ޖެހޭކަން ވެސް ރާއިދު ފާހަގަކުރެއްވިއެވެ.