ސްޕެނިޝް ލީގުގައި ސެލްޓަ ވިގޯ ބަލިކޮށް އެތުލެޓިކޯ މެޑްރިޑުން ތާވަލްގެ ހަތަރުވަނަ މަގާމަށް ޖެހިލައިފިއެވެ.

އެތުލެޓިކޯގެ އަމިއްލަ ދަނޑުގައި ކުޅުނު ފުޓުބޯޅަ މެޗު އެ ޓީމުން ކާމިޔާބުކުރީ 4-1 އިންނެވެ. މެޗުގައި ފުރަތަމަ ލަނޑު ޖަހައި ލީޑު ނެގީ އެތުލެޓިކޯ އިންނެވެ. މެޗުގެ ނުވަވަނަ މިނެޓުގައި އެ ޓީމަށް ލީޑު ނަގައިދިނީ އެންހެލް ކޮރެއާ އެވެ. އޭނާ މި ލަނޑު ޖެހީ ރޮޑްރީގޯ ޑި ޕައުލް ތަނަވަސްކޮށްދިން ފުރުސަތަކުންނެވެ.

މެޗުގެ ލަނޑުތައް ދެން ފެނުނީ ދެވަނަ ހާފުގައެވެ. ދެވަނަ ހާފު ފަށައިގެން ފަސްވަނަ މިނެޓުގައި ޑި ޕައުލް ވަނީ ލަނޑެއް ޖަހައި އެތުލެޓިކޯއަށް ލީޑު ފުޅާކޮށްދީފައެވެ. އޭގެ ފަހުން 67 ވަނަ މިނެޓުގައި އެތުލެޓިކޯއަށް އިތުރަށް ލީޑު ފުޅާކޮށްދިނީ ޔަނިކް ކަރަސްކޯއެވެ. މެޗުގައި ސެލްޓަގެ ހަމައެކަނި ލަނޑު ޖެހީ 71 ވަނަ މިނެޓުގައި ގެބްރިއެލް ވެއިގާއެވެ. އެތުލްޓިކޯގެ ހަތަރުވަނަ ލަނޑަކީ ސެލްޓަގެ އުނާއި ނޫނޭޒް އަތުން ބައި ކޮޅަށް ވަތް ލަނޑެކެވެ.

މެޗުން މޮޅުވެ ލިބުނު ތިން ޕޮއިންޓާއެކު ޖުމުލަ 10 ޕޮއިންޓު ހޯދައިގެން އެތުލެޓިކޯ އޮތީ ތާވަލްގެ ހަތަރުވަނަ މަގާމުގައެވެ. ތިންވަނަ މަގާމުގައި އޮތް ވިލަރެއާލަށް ވެސް ލިބެނީ 10 ޕޮއިންޓެވެ. ވިލަރެއާލަށް ކުރި ލިބެނީ ފައިދާ ގޯލުންނެވެ. ދެވަނައިގައި އޮތް ރެއާލް މެޑްރިޑަށް 12 ޕޮއިންޓު ލިބޭއިރު، އިތުރަށް އެއް މެޗު ކުޅެގެން ބާސެލޯނާ އެއްވަނައިގައި އޮތީ 13 ޕޮއިންޓާއެކުއެވެ.