ކުރަމަތި ރިސޯޓުގެ މުވައްޒަފުންނަށް މެރިޓައިމް ސޭފްޓީ އެވެއާނެސް ޕްރޮގްރާމެއް ފަށައިފި
11 ސެޕްޓެމްބަރު 2022 | އާދީއްތަ 02:06މި ޕްރޮގްރާމުގައި 58 މުވައްޒަފަކު ބައިވެރިވި
މެރިޓައިމް ސޭފްޓީ އެވެއާނެސް ޕްރޮގުރާމް
އެމްއެންޑީއެފް ކޯސްޓްގާޑު ޓްރެއިނިންގ ޑިވެލޮޕްމަންޓް އެންޑް ރިސާޗް ޑިޕާޓްމެންޓުން ކުރަމަތި އައިލެންޑް ރިޒޯޓުގެ މުވައްޒަފުންނަށް، ކަނޑުމަތީގެ ސަލާމަތާއި ރައްކާތެރިކަމަށް އަހުލުވެރިކުރުވުމަށް ހިންގާ މެރިޓައިމް ސޭފްޓީ އެވެއާނެސް ޕްރޮގުރާމް ފަށައިފިއެވެ.
ހަ ދުވަހުގެ މުއްދަތަށް ހިންގާ މި ޕްރޮގްރާމުގައި އެ ރިޒޯޓުގެ 58 މުވައްޒަފަކު ވަނީ ބައިވެރިވެފައެވެ.
މި ޕްރޮގުރާމްގައި އުނގަންނައިދެވޭ ބައިތަކުގެ ތެރޭގައި ޖެނެރަލް އެވެއާނެސް، ފަސްޓްއެއިޑް، ޝިޕް ބޯޑް ޑްރިލްއާއި ނެވިގޭޝަން ޗާޓްސްގެ ބައިތައް ހިމެނެއެވެ. މީގެ އިތުރުން ކަނޑުމަތީގައި ދިމާވާ އެކިއެކި ހާލަތްތަކުގައި އަމަލު ކުރާނެގޮތްތަކާއި ރެސްކިޔު ސްވިމިންގެ ބައިތައް ވެސް މި ޕްރޮގްރާމުގައި އުނގަންނައި ދިނުމަށް ވަނީ ހަމަޖެހިފައެވެ. މި ޕްރޮގްރާމް ނިންމުމުގެ ގޮތުން ޕްރެކްޓިކަލް އެކްސަސައިޒްތަކެއް ވެސް ކުރިއަށްގެންދިޔުމަށް ވަނީ ހަމަޖެހިފައެވެ.
މި ޕްރޮގްރާމުގެ މުދައްރިބުންގެ ގޮތުގައި ހަރަކާތްތެރިވަނީ އެމްއެންޑީއެފް ކޯސްޓްގާޑުގެ ސިފައިންނެވެ.
