ޕްރެކްޓިސް ޕާލިމެންޓް ފޯރ ވިމެން ނިންމުމުގެ ރަސްމިއްޔާތު ބާއްވައިފި
10 ސެޕްޓެމްބަރު 2022 | ހޮނިހިރު 12:12މިފަހަރުގެ ޕްރޮގްރާމުގައި 32 މީހުން ބައިވެރިވި
ޕްރެކްޓިސް ޕާލިމެންޓް ފޯރ ވިމެން ޕްރޮގްރާމްގެ ތެރެއިން
ޕްރެކްޓިސް ޕާލިމެންޓް ފޯރ ވިމެން ނިންމުމުގެ ރަސްމިއްޔާތު ބާއްވައިފިއެވެ.
ހޮނިހިރު ދުވަހު މި ރަސްމިއްޔާތު ބާއްވާފައިވާއިރު، ޕްރޮގްރާމުގައި ބައިވެރިވި 32 މީހުންނަށް ސެޓްފިކެޓް ހަވާލުކޮށްދެއްވީ ރަސްމިއްޔާތުގެ ޝަރަފުވެރި މެހެމާނު، ރައްޔިތުންގެ މަޖިލީހުގެ އަމީން އާންމު، ފާތިމަތު ނިއުޝާއެވެ.
ރަސްމިއްޔާތުގައި ވާހަކަ ދައްކަވަމުން ނިއުޝާ ވިދާޅުވީ، މި ޕްރޮގްރާމުގެ އަމާޒަކީ ތަފާތު ގިންތިތަކަށް ނިސްބަތްވާ އަންހެނުން ސިޔާސީ މައިދާނަށް ނެރެ، ރައްޔިތުންގެ މަޖިލީހުގެ މެމްބަރުކަމަށް ނެރުން ކަމަށެވެ. މި ޕްރޮގްރާމް މެދުވެރިކޮށް ވަރަށް ގިނަ މައުލޫމާތު ލިބިގެން ދިޔަކަމަށް އުންމީދުކުރައްވާކަމަށާއި، އަދި މިއީ ވަރަށް މުހިންމު ޕްރޮގްރާމެއް ކަމަށެވެ.
މިޕްރޮގްރާމް ކުރިއަށްގެންގޮސްފައިވަނީ ސެޕްޓެމްބަރު މަހުގެ 4ން 10ށް މާލޭގައެވެ. މިއީ ޕްރެކްޓިސް ޕާލިމެންޓް ފޯރ ވިމެންގެ 5 ވަނަ ޕްރޮގްރާމެވެ.
ޕްރެކްޓިސް ޕާލިމެންޓް ހަރަކާތަކީ މަޖިލީހުގެ މަސައްކަތްތައް ކުރިޔަށްދާ ގޮތް ރަނގަޅަށް ދަނެގަނެ، ގިނަ ޒުވާނުންނާއި އަންހެނުން މަޖިލީހަށް ކުރިމަތިލާން ހިތްވަރުދިނުމަށް ކުރިއަށްގެންދާ ޕްރޮގްރާމެއްކަމަށް، ރައްޔިތުންގެ މަޖިލީހުގެ އިދާރާއިން ބުނެއެވެ. އަދި މިއީ މަޖިލީހުގެ ސިޔާސަތުތަކުގައި ހުރި އުނިކަންކަން ދެނެގަނެ އެކަންކަން ބަދަލުކުރުމަށް މަސައްކަތްކުރާ ހަރަކާތެއް ކަމަށްވެސް އެއިދާރާއިން ބުނެއެވެ.
ޕްރޮގްރާމް ކުރިއަށްގެންދަނީ 2 ބަޔަކަށް ބަހާލައިގެންނެވެ. އެއީ ސިޔާސަތުތަކާއި މަޖިލީހުގެ މަސައްކަތް ކުރިއަށްދާ ގޮތުގައި މައުލޫމާތު ދިނުމާއި ރައްޔިތުންގެ މަޖިލީހުގެ ނަމޫނާ މާދިރީއެކެވެ.
"ޕްރެކްޓިސް ޕާލިމެންޓް ފޯރ ވިމެން"ގެ ފުރަތަމަ ޕްރޮގްރާމްގައި 5 އަތޮޅަކުން ޖުމްލަ 48 ފަރާތުން ބައިވެރިވެފައިވާއިރު އޭގެތެރޭގައި ޚާއްސަ އެހީއަށް ބޭނުންވާ 2 ފަރާތްވެސް ހިމެނެއެވެ.
