ފަނޯއްލަ މަހާސިންތާގައި މިފަހަރު އެންމެ ބޮޑު ކަންބޮޑުވުމަކަށް ވީ ކަމަކީ ބަޖެޓްގެ ދަތިކަމުގެ މައްސަލަ: އަފްޝަން
9 ސެޕްޓެމްބަރު 2022 | ހުކުރު 17:14މަހާސިންތާގައި ޖުމުލަ 200ށް ވުރެ ގިނަ މީހުން ބައިވެރިވޭ
އެލްޖީއޭގެ ޗީފް އެގްޒެކެޓިވް އޮފިސަރ ފާޠިމަތު އަފްޝަން ލަތީފް
ފަނޯއްލަ މަހާސިންތާގައި މި ފަހަރު އެންމެ ބޮޑު ކަންބޮޑުވުމަކަށް ވީ ކަމަކީ ބަޖެޓްގެ ދަތިކަމުގެ މައްސަލަ ކަމަށް އެލްޖީއޭގެ ޗީފް އެގްޒެކެޓިވް އޮފިސަރ ފާޠިމަތު އަފްޝަން ލަތީފް ވިދާޅުވެެއްޖެއެވެ.
އޭނާ އެފަދައިން ވިދާޅުވީ، ލޯކަލް ގަވަމެންޓް އޮތޯރިޓީ އެލްޖީއޭ އާއި އިންޓަރނޭޝަނަލް ރިޕަބްލިކަން އިންސްޓިޓިއުޓާއި ޔޫ.އެސް.އެއިޑް ގުޅިގެން ކުރިޔަށް ގެންދާ ފަނޯއްލަ ދަރުބާރު ސިލްސިލާގެ ހަތަރު ވަނަ ޕްރޮގްރާމާއި ގުޅޭގޮތުން ރާއްޖެއެމްވީ އަށް މައުލޫމާތު ދެއްވަމުންނެވެ. އަފްޝަން ވަނީ އެ މަހާސިންތާއަކީ ކާމިޔާބު މަހާސިންތާއެއް ކަމަށް ސިފަ ކުރައްވާފައެވެ. އަދި ކައުންސިލްތަކުން ފާހަގަކުރި އިތުރު ކަންބޮޑުވުންތަކުގެ ތެރޭގައި ލޭންޑްޔޫސް ޕްލޭން އާއި ގުޅުން ހުރި ކަންކަން ހިމެނޭ ކަމަށާއި، އެ ކަންބޮޑުވުންތައް ހައްލު ކުރަން ކަމާއި ބެހޭ ފަރާތްތަކާއިއެކު މަޝްވަރާ ކުރައްވާނެ ކަން އަފްޝަން ފާހަގަކުރެއްވިއެވެ.
ހުކުރު ދުވަހު ފެށި އެ ޕްރޮގްރާމް ކުރިއަށް ގެންދަނީ ހައްދުންމަތީގައި ގަމުގައެވެ. ދެ ދުވަހުގެ މުއްދަތަށް ކުރިޔަށް ގެންދާ މި ދަރުބާރުގައި ޖުމުލަ 200ށް ވުރެ ގިނަ މީހުން ބައިވެރިވެއެވެ. އޭގެ ތެރޭގައި ނިލަންދެއަތޮޅު ދެކުނުބުރިން ފެށިގެން އައްޑޫ ސިޓީއާއި ދެމެދު ގެ ސިޓީ ކައުންސިލްތަކުގެ މޭޔަރުންނާއި އަތޮޅު އަދި ރަށު ކައުންސިލްތަކުގެ ރައީސުންނާއި އަދި އަންހެނުން ތަރައްޤީއަށް މަސައްކަތްކުރާ ކޮމިޓީތަކުގެ ރައީސުންގެ އިތުރުން ރައްޔިތުން މަޖިލީހުގެ ބައެއް މެމްބަރުންނާއި ކަމާގުޅުން ހުރި ވުޒާރާތަކާއި އަދި އިދާރާތަކާއި ކުންފުނިތަކުގެ ބައިވެރިން ހިމެނެއެވެ.
ފަނޯއްލަ ދަރުބާރަކީ ސަރުކާރުގެ 5 އަހަރުގެ ސްޓްރެޓީޖިކް އެކްޝަން ޕްލޭން (ސެޕް) ގެ ސިޔާސަތުތަކާއި ލާމަރުކަޒީ ޤާނޫނަށް ގެނެވުނު 8 ވަނަ އިސްލާހު ތަންފީޛުކުރުމަށް ހުރި ގޮންޖެހުންތައް ދެނެގަނެ، ޖުމްލަގޮތެއްގައި ލާމަރުކަޒީ ނިޒާމު ހިންގުމަށް ހުރި ދަތިތައް ފާހަގަކޮށް އެކަންކަމާ ގުޅޭގޮތުން މަޝްވަރާކޮށް، އެކަންކަން ހައްލުކުރުމަށް ކަމާގުޅޭ ފަރާތްތަކަށް ހުށަހެޅުމުގެ މަގްސަދުގައި ކުރިއަށް ގެންދާ ޕްރޮގްރާމެކެވެ.
އެ މަހާސިންތާގައި އެއްބަސްވާ ކަންތައްތައް 11-12 ސެޕްޓެމްބަރ 2022 ވަނަ ދުވަހު ލ.ގަމުގައި ބޭއްވުމަށް ހަމަޖެހިފައިވާ 'ވިއަވަތި ރާއްޖެ' މަހާސިންތާގައި ރައީސުލްޖުމްހޫރިއްޔާއާއި ދައުލަތުގެ ކަމާގުޅޭ ފަރާތްތަކާ ހިއްސާ ކުރާގޮތަށް ވަނީ ހަމަޖެހިފައެވެ.
