އަންހެނުންގެ ތަރައްޤީއަށް މަސައްކަތްކުރާ ކޮމިޓީ ތަކުގެ ބައި އިލެކްޝަންއާއި ގުޅޭ ބަދަލު ގެނައުމަށް ދަނީ މަޝްވަރާކުރަމުން: ނިޔާޒް
އެ މަހާސިންތާގައި އެއްބަސްވާ ކަންތައްތައް ވިޔަވަތީގައި ހިއްސާކުރާނެ
ފަނޯއްލަ ދަރުބާރު
ލާމަރުކަޒީ ޤާނޫނަށް އެންމެ އަވަހަށް ގެނައުމަށް މަޝްވަރާ ކުރަމުންދާ ބަދަލަކީ އަންހެނުންގެ ތަރައްޤީއަށް މަސައްކަތްކުރާ ކޮމިޓީ ތަކުގެ ބައި އިލެކްޝަންއާއި ގުޅޭ ބަދަލު ކަމަށް ރައްޔިތުންގެ މަޖިލީހުގެ ހުޅުމާލޭ ދާއިރާގެ ރައްޔިތުންގެ މަޖިލީހުގެ މެންބަރު ޢަލީ ނިޔާޒު ވިދާޅުވިއެވެ.
ރައްޔިތުންގެ މަޖިލީހުގެ ލާމަރުކަޒީ ކޮމިޓީގެ މުޤައްރިރުކަން ވެސް ކުރައްވަމުންދާ ނިޔާޒް އެފަދައިން ވިދާޅުވީ ލޯކަލް ގަވަމެންޓް އޮތޯރިޓީ އެލްޖީއޭ އާއި އިންޓަރނޭޝަނަލް ރިޕަބްލިކަން އިންސްޓިޓިއުޓާއި ޔޫ.އެސް.އެއިޑް ގުޅިގެން ކުރިޔަށް ގެންދާ ފަނޯއްލަ ދަރުބާރު ސިލްސިލާގެ ހަތަރު ވަނަ ޕްރޮގްރާމް ފެށުމުގެ ރަސްމިއްޔާތު ޝަރަފުވެރިކޮށްދެއްވާ ވާހަކަދައްކަވަމުންނެވެ.
ހުކުރު ދުވަހު ފެށި އެ ޕްރޮގްރާމް ކުރިއަށް ގެންދަނީ ހައްދުންމަތީގައި ގަމުގައެވެ. ދެ ދުވަހުގެ މުއްދަތަށް ކުރިޔަށް ގެންދާ މި ދަރުބާރު ފެށުމުގެ ރަސްމިއްޔާތުގައި އެލްޖީއޭގެ ޗީފް އެގްޒެކެޓިވް އޮފިސަރ ފާޠިމަތު އަފްޝަން ލަތީފާއި ޔޫ.އެސް. އެއިޑުން ދިވެހިރާއްޖެއަށް ކަނޑައޅުއްވާފައިވާ ޕްރޮގްރާމް ކޯޑިނޭޓަރ ހިލެރީ މިޑްކިފް އާއި އޮތޯރިޓީގެ ޑިރެކްޓަރ ޖެނެރަލް ޝައްމުޢޫން އާދަމް ވެސް ވަނީ ވާހަކަދައްކަވާފައވެެ.
ފަނޯއްލަ ދަރުބާރުގައި ޖުމުލަ 200 އަށް ވުރެ ގިނަ މީހުން ބައިވެރިވެއެވެ. އޭގެ ތެރޭގައި ނިލަންދެއަތޮޅު ދެކުނުބުރިން ފެށިގެން އައްޑޫ ސިޓީއާއި ދެމެދު ގެ ސިޓީ ކައުންސިލްތަކުގެ މޭޔަރުންނާއި އަތޮޅު އަދި ރަށު ކައުންސިލްތަކުގެ ރައީސުންނާއި އަދި އަންހެނުން ތަރައްޤީއަށް މަސައްކަތްކުރާ ކޮމިޓީތަކުގެ ރައީސުންގެ އިތުރުން ރައްޔިތުން މަޖިލީހުގެ ބައެއް މެމްބަރުންނާއި ކަމާގުޅުން ހުރި ވުޒާރާތަކާއި އަދި އިދާރާތަކާއި ކުންފުނިތަކުގެ ބައިވެރިން ހިމެނެއެވެ.
ފަނޯއްލަ ދަރުބާރަކީ ސަރުކާރުގެ 5 އަހަރުގެ ސްޓްރެޓީޖިކް އެކްޝަން ޕްލޭން (ސެޕް) ގެ ސިޔާސަތުތަކާއި ލާމަރުކަޒީ ޤާނޫނަށް ގެނެވުނު 8 ވަނަ އިސްލާހު ތަންފީޛުކުރުމަށް ހުރި ގޮންޖެހުންތައް ދެނެގަނެ، ޖުމްލަގޮތެއްގައި ލާމަރުކަޒީ ނިޒާމު ހިންގުމަށް ހުރި ދަތިތައް ފާހަގަކޮށް އެކަންކަމާ ގުޅޭގޮތުން މަޝްވަރާކޮށް، އެކަންކަން ހައްލުކުރުމަށް ކަމާގުޅޭ ފަރާތްތަކަށް ހުށަހެޅުމުގެ މަގްސަދުގައި ކުރިއަށް ގެންދާ ޕްރޮގްރާމެކެވެ. އެ މަހާސިންތާގައި އެއްބަސްވާ ކަންތައްތައް 11-12 ސެޕްޓެމްބަރ 2022 ވަނަ ދުވަހު ލ.ގަމުގައި ބޭއްވުމަށް ހަމަޖެހިފައިވާ 'ވިއަވަތި ރާއްޖެ' މަހާސިންތާގައި ރައީސުލްޖުމްހޫރިއްޔާއާއި ދައުލަތުގެ ކަމާގުޅޭ ފަރާތްތަކާ ހިއްސާ ކުރާގޮތަށް ވަނީ ހަމަޖެހިފައެވެ.
