1.6 މިލިއަން ފަތުރުވެރިން ގެނައުމުގެ އަމާޒު: މިހާތަނަށް 1.1 މިލިއަން އަތުވެއްޖެ
9 ސެޕްޓެމްބަރު 2022 | ހުކުރު 12:07މިމަހުގެ ފުރަތަމަ ހަފްތާ ތެރޭގައި 25،854 ފަތުރުވެރިން އައި
ރާއްޖެ އަށް އައި 1 މިލިއަން ވަނަ ފަތުރުވެރިޔާ އަށް މަރުޚަބާކިޔުން
އަހަރުގެ މިހާތަނަށް 1.1 މިލިއަން ފަތުރުވެރިން ރާއްޖެ އައިސްފައިވާކަމަށް ޓޫރިޒަމް މިނިސްޓްރީން ހާމަކޮށްފިއެވެ.
ޓޫރިޒަމް މިނިސްޓްރީން އާންމުކޮށްފައިވާ ތަފާސްހިސާބުތައް ދައްކާގޮތުން ސެޕްޓެމްބަރު 7 ވަނަ ދުވަހުގެ ނިޔަލަށް މިހާތަނަށް ރާއްޖެ އައި ފަތުރުވެރިންގެ އަދަދު ވަނީ 1،104،488 އަށް އަރާފައެވެ. ނަމަވެސް މިއީ ކޮވިޑް-19 ގެ ކުރިން 2019 ވަނަ އަހަރު ރާއްޖެ އައި ފަތުރުވެރިންނަށްވުރެ 4.7 އިންސައްތަ ދަށް އަދަދެކެވެ. 2019 ވަނަ އަހަރުގެ މި މުއްދަތުގައި 1،159،280 ފަތުރުވެރިން ވަނީ ރާއްޖެ އައިސްފައެވެ. 2021 ވަނަ އަހަރުގެ މި މުއްދަތުގައި ރާއްޖެ އައިސްފައިވަނީ 785،025 ފަތުރުވެރިންނެވެ. އަދި 2020 ވަނަ އަހަރުގެ މި މުއްދަތުގައި އައިސްފައިވަނީ 394،155 ފަތުރުވެރިންނެވެ.
ޓޫރިޒަމް މިނިސްޓްރީން ބުނީ މިމަހުގެ ފުރަތަމަ ހަފްތާގެ ތެރޭގައި އައިސްފައިވަނީ 25،854 ފަތުރުވެރިން ކަމަށެވެ. މިއީ މިދިޔަ އަހަރުގެ މި މުއްދަތުގައި އައި ފަތުރުވެރިންނަށްވުރެ 11 އިންސައްތަ ދަށް އަދަދެކެވެ. މިދިޔަ އަހަރު އައިސްފައިވަނީ 29،059 ފަތުރުވެރިންނެވެ. 2020 ވަނަ އަހަރު 1،950 ފަތުރުވެރިން އައިސްފައިވާއިރު ކޮވިޑްގެ ހާލަތުގެ ކުރިން 2019 ވަނަ އަހަރު އައިސްފައިވަނީ 25،209 ފަތުރުވެރިންނެވެ. މިއީ މިއަހަރު އައި ފަތުރުވެރިންނާ އަޅާ ބަލާއިރު 2.6 އިންސައްތަ ދަށް އަދަދެކެވެ.
ޓޫރިޒަމް މިނިސްޓްރީން ބުނީ އަހަރުގެ މިހާތަނަށް ދުވާލެއްގެ މައްޗަށް އެވްރެޖްކޮށް 4،400 ފަތުރުވެރިން ރާއްޖެ އައިސްފައިވާކަމަށެވެ. އަދި އެވަރޭޖްކޮށް 8 ދުވަހު ރާއްޖޭގައި މަޑުކޮށްފައިވާކަމަށެވެ.
އެންމެ ގިނަ ފަތުރުވެރިން ރާއްޖެ އަންނަ މާކެޓު ކަމުގައިވާ އިންޑިއާއިން މިހާތަނަށް 156،644 ފަތުރުވެރިން ވަނީ އައިސްފައެވެ. ދެވަނައަށް އެންމެ ގިނަ ފަތުރުވެރިން އަންނަމުންދާ ރަޝިއާއިން 127،894 ފަތުރުވެރިން ވަނީ މިހާތަނަށް އައިސްފައެވެ. އަދި ތިންވަނައިގައި އޮތް އިނގިރޭސިވިލާތުން 125،081 ފަތުރުވެރިން އައިސްފައިވެއެވެ.
މީގެ އިތުރުން މިވަގުތު 1،180 ޓޫރިސްޓް އެކޮމޮޑޭޝަން ފެސިލިޓީ ރާއްޖޭގައި ހިންގަމުން ދެއެވެ. އެއީ 58،467 ބެޑް ކެޕޭސިޓީއެވެ.
