އިނގިރޭސިވިލާތުގެ ރާނީ އެލިޒަބަތު ދޭއް އަވަހާރަވެއްޖެ ކަމަށް ރަސްކަމުގެ ތަހުތުކަމަށްވާ ބަކިންހަމް ޕެލަސްއިން އިއުލާންކޮށްފިއެވެ.
ރާނީ އަވަހާރަވެފައިވަނީ ސްކޮޓްލަންޑްގެ ބަލްމޯރަލްގައި ހުންނަ ޝާހީ ގަނޑުވަރުގައި އާއިލާ މެމްބަރުންގެ ހާޒިރުގައި ކަމަށް އެބަޔާނުގައި ބުނެފައިވެއެވެ. ރާނީ އަވަހާރަވި ޚަބަރު އިއުލާންކޮށްފައިވަނީ ބުރާސްފަތި ދުވަހުގެ ރޭ ރާއްޖޭ ގަޑިން ނުވަގަޑި ތިރީސް އެހާއިރުއެވެ.
ރާނީގެ ސިއްޙީ ހާލުކޮޅު ރަނގަޅު ނޫންކަން ފުރަތަމަ ހާމަކޮށްފައިވަނީ ބުރާސްފަތި ދުވަހު ހަވީރު ރާއްޖޭ ގަޑިން ހަތަރުގަޑި ތިރީސް އެހާކަންހާއިރު ބަކިންހަމް ޕެލަސްއިން ކުރި އިއުލާނަކާއި ގުޅިގެންނެވެ. އެބަޔާނުގައި ބުނެފައިވަނީ ރާނީގެ ސިއްޙީ ހާލުކޮޅު އެވަގުތު ރަނގަޅު ނޫންކަމަށާއި ޑަކްޓަރުންގެ ކަންބޮޑުވުން ހުރުމާއި އެކު މެޑިކަލް ސުޕަވިޝަންގައި އޮންނެވި ކަމުގައެވެ. އެހެން ނަމަވެސް ރާނީ އޮންނެވީ އުނދަގޫތަކެއް ލިބިވަޑައިނުގަންނަވާ ގޮތަށް ކަމަށް އެ އިއުލާނުގައި ބުނެފައިވެއެވެ.
ރާނީގެ ހާލުކޮޅު ރަނގަޅު ނޫންކަން ހަމާވުމާއި އެކު ރާނީގެ ހަތަރު ބޭފުޅުންނާއި މާމަ ވިދާޅުވާ ބައެއް ބޭފުޅުން ވަނީ އަވަހަށް ރާނީގެ އަރިހަށް ބަލްމޯރަލްއަށް ވަޑައިގެންފައިވެއެވެ.
ރާނީގެ ސިއްޙީ ހާލުކޮޅު ހާމަވުމާއި އެކު ބުރާސްފަތި ދުވަހު ހަވީރުން ފެށިގެން ބަލްމޯރަލްއާއި ބަކިންހަމް ގަނޑުވަރު ދޮށަށް އައީ ގިނަ އަދަދެއްގެ ހެޔޮ އެދޭ ބަޔަކު އެއްވަމުން ނެވެ. އެއާ ހަމައެކުއެކީ ދުނިޔޭގެ ލީޑަރުން ވެސް ގެންދެވީ ހެޔޮއެދުމުގެ މެސެޖުތައް ފޮނުއްވަމުންނެވެ.
ރާނީ އެލިޒަބަތު ރަނިކަމާ ހާލުވެވަޑައިގެންފައިވަނީ އުމުރުފުޅުން 25 އަހަރުފުޅުގައެވެ. އަދި އެކަމަނާ 70 އަހަރު ތަހުތުގައި އިންނެވިއެވެ. އަވަހާރަވީ އުމުރުފުޅުން 96 އަހަރުފުޅުގައެވެ.
ރާނީ އެލިޒަބަތު އަވަހާރަވުމާއި ގުޅިގެން ރަސްކަން ވަނީ ދަރިކަލުން ޕްރިންސް ޗާލްސް އަށް އޮޓަމެޓިކުން ބަދަލު ވެފައެވެ.