މިނިވަންކަމުގެ ދިފާއުގައި ސިފައިން އަޅާ ކޮންމެ ފިޔަވަޅަކީ ސަރަހައްދީ ހަމަޖެހުމާއި ސުލްހައަށްޓަކައި އަޅާ ފިޔަވަޅެއް: ރައީސް
ސިފައިންގެ 68 ވަނަ އަސާސީ ތަމްރީން ފުރިހަމަކުރި ސިފައިންނަށް ރައީސް ވަނީ ގިނަ އިލްތިމާސްތަކެއް ކުރައްވާފައި
ސިފައިންގެ 68 ވަނަ އަސާސީ ތަމްރީން ފުރިހަމަކުރި ސިފައިން ހުވާކުރުމުގެ ރަސްމިއްޔާތުގައި ރައީސް ވާހަކަފުޅުދައްކަވަނީ
ރާއްޖޭގެ މިނިވަންކަމުގެ ދިފާއުގައި ސިފައިން އަޅާ ކޮންމެ ފިޔަވަޅަކީ ސަރަހައްދީ ހަމަޖެހުމާއި ސުލްހައަށްޓަކައި އަޅާ ފިޔަވަޅެއްކަމަށް، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ، ސިފައިންގެ 68 ވަނަ އަސާސީ ތަމްރީން ފުރިހަމަކުރި ސިފައިން ހުވާކުރުމުގެ ގޮތުން މިއަދު ޅ. މާފިލާފުށީގައި ބޭއްވި ރަސްމިއްޔާތު ޝަރަފުވެރިކޮށްދެއްވައި ދެއްކެވި ވާހަކަފުޅުގައެވެ. ރައީސް ވިދާޅުވީ، ރާއްޖެ ހިމެނޭ ސަރަހައްދުގެ އަސްކަރިއްޔާތަކުން އެންމެ ބޮޑު އިސްކަމެއް ދޭ އެއްކަމަކީ ސަރަހައްދީ ސުލްހައާއި ހަމަޖެހުން ދެމެހެއްޓުންކަމަށެވެ. އަދި ޑިމޮކްރެޓިކް މުޖުތަމައުތަކުގައި އަސްކަރިއްޔާތަކުގެ ބޭނުންހިފަނީ ހަމައެކަނި ހަނގުރާމަކުރުމަށް ނޫންކަންވެސް ރައީސް ފާހަގަކުރެއްވިއެވެ.
ރައީސް ވިދާޅުވީ، ދެވަނަ ބޮޑު ހަނގުރާމައިން ދުނިޔެއަށް ދަސްވި އެންމެ ބޮޑު ފިލާވަޅަކީ ހަނގުރާމައަށްވުރެ ބޮޑަށް ސުލްހަ ދެމެހެއްޓުމުގައި އަސްކަރިއްޔާތަކުން މުހިންމު ދައުރެއް އަދާކުރެވޭނެކަން ކަމަށެވެ. އެެހެންކަމުން މި ސަރަހައްދުގެ އަސްކަރިއްޔާތަކުންވެސް އެންމެ ބޮޑު އިސްކަމެއް ދެނީ ސަރަހައްދީ ސުލްހައާއި ހަމަޖެހުމަށް ކަމަށް އެމަނިކުފާނު ވިދާޅުވިއެވެ.
މީގެ އިތުރުން ސިފައިންގެ ޚިދުމަތަކީ ޤައުމީ ޚިދުމަތެއްގެގޮތުގައި ސިފަކުރައްވައި ރައީސް ވަނީ، ފަހު ވިންދާ ޖެހެންދެން ގައުމީ ޖިހާދުގައި ދެމިތިބުމަށް އިލްތިމާސްކުރައްވާފައެވެ. ސިފައިންގެ މީހަކަށް ވުމަކީ ބޮޑު ޝަރަފެއްކަަމަށާއި، އެ ޝަރަފު ދެމިއޮންނަނީ، ގައުމަށް ޚިދުމަތްކުރުމުގައި ގައުމުގެ މިނިވަންކަމާއި، ސަލާމަތާއި، އަމަންއަމާންކަމުގެ ދިފާއުގައި ސިފައިން ކުރާ މަސައްކަތުގެ މައްޗަށް ކަަމަށް ވެސް އެމަނިކުފާނު ވަނީ ވިދާޅުވެފައެވެ. ގައުމަށް ދިމާވާ ކޮންމެ ނުރައްކަލަކުން ގައުމު ދިފާއުކުރުމުގައި ސިފައިން އިސް ދައުރެއް އަދާކުރާކަން ރައީސް ފާހަގަކުރެއްވިއެވެ.
ރައީސް ވަނީ، ދިވެހި ޒުވާން ލޭގައި ހިނގާ ޖޯޝާއި ހޫނަށް ދިވެހި އުންމަތް މިއަދު އޮތީ ވަރަށް ބޭނުންވެފައިކަން ފާހަގަކުރައްވާފައެވެ. މީގެ އިތުރުން މިހާރު އަސްކަރިއްޔާތައް ވަރުގަދަވަނީ ހަނގުރާމައިގެ އުކުޅުތަކާއި ތަމްރީންތަކުން އެކަނި ނޫންކަމަށާއި، އަސްކަރިއްޔާތައް ވަރުގަދަވަނީ ކުރިއަރާފައިވާ ޓެކްނޮލޮޖީއާއި އީޖާބީ މައުލޫމާތުގެ އަލީގައިކަމަށް ރައީސް ވިދާޅުވިއެވެ. އެހެންކަމުން އެންމެ ކުރިއަރާފައިވަނީ ސައިންސާއި ޓެކްނޮލޮޖީ އެ އަސްކަރިއްޔާގެ އުކުޅުތަކުގެ މައްޗަށް ބިނާވެފައިވާ އަސްކަރިއްޔާތައް ކަަމަށާއި، މިއީ ދިވެހި ސިފައިންވެސް ވިސްނަންޖެހޭ ކަމެއް ކަމަށް އެމަނިކުފާނު ވަނީ ވިދާޅުވެފައެވެ.
ރައީސް ވަނީ، ސިފައިންގެ މީހަކަށް ވިޔަސް އާންމު ރައްޔިތުންނަށްޓަކައި އަދާކޮށްދޭންޖެހޭ މަދަނީ ވާޖިބުތަކެއް ހުންނާނެކަން ފާހަގަކުރައްވައި، އާންމު ރައްޔިތަކަށް ކަމެއްދަމެއް ބޮޑުވާ ހާލަތްތަކުގައި ރައްޔިތުންގެ ހިމާޔަތުގައި ސިފައިން ތިބެންވާނެކަން ފާހަގަކުރައްވާފައެވެ. ސިފައިންގެ އެންމެ އިސް އެއް ވާޖިބަކީ ކޮންމެ ހާލަތެއްގައިވެސް ރައްޔިތުން ހިމާޔަތްކުރުންކަމަށްވެސް އެމަނިކުފާނު ވަނީ ވިދާޅުވެފައެވެ.
