ރައްޔިތުން ބޭނުންވާ ކަރަންޓުގެ ރައްކާތެރިކަން ދެއްވާނެ ކަމުގެ ޔަޤީންކަން ފެނަކަ އެމްޑީ ދެއްވި: މުހައްމަދު ވަހީދު

ރައްޔިތުން ބޭނުންވަނީ ކަރަންޓުގެ ރައްކާތެރިކަން ކަމަށާއި އެ ރައްކާތެރިކަން ހޯއްދަވައިދެއްވާނެކަމުގެ ޔަޤީންކަން ފެނަކަގެ މެނޭޖިންގް ޑިރެކްޓަރ އަހްމަދު ސައީދު މުހައްމަދު ދެއްވާ ކަމަށް އުނގޫފާރު ދާއިރާގެ މެންބަރު މުހައްމަދު ވަހީދު ވިދާޅުވެއްޖެއެވެ.

ރ. އުނގޫފާރުގެ ފެނާއި ނަރުދަމާ އަދި ކަރަންޓުގެ ނިޒާމު ފެނަކަ ކޯޕަރޭޝަނާއި ހަވާލުކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ވަހީދު ވިދާޅުވީ ފެނަކައާ މި މަސައްކަތް ހަވާލުކުރުމަކީ ރަނގަޅު އަދި އުފާވެރިކަމެއް ކަމަށެވެ. އަދި މި ބަދަލާއެކު ހުރިހާ ގޮތަކުން ވެސް ކަރަންޓުގެ ހާލަތު ރަނގަޅުވެގެންދާނެ ކަމަށް އުންމީދު ކުރާ ކަމަށް ވެސް ވިދާޅުވިއެވެ.

ގެނެވުނު ބަދަލާއި އެކު ދެމެހެއްޓެނިވި ހަރުދަނާ ނިޒާމެއްގެ ތެރެއިން ރ. އުނގޫފާރު ރައްޔިތުންނަށް ކަރަންޓު ލިބިގެންދާނެ ކަމަށް ފެނަކަ ކޯޕަރޭޝަންގެ މެނޭޖިންގް ޑިރެކްޓަރ އަހްމަދު ސައީދު މުހައްމަދު ވެސް ވަނީ ވިދާޅުވެފައެވެ. ކަރަންޓުގެ ނިޒާމު ފެނަކައާއި ހަވާލުކުރުމުން ރައްޔިތުންގެ ހިތުގައި ވަރަށް ބައިވަރު ސުވާލުތައް އުފެދޭނެ ކަމަށާއި އެ ސުވާލުގެ ޖަވާބު ވަރަށް އަވަހަށް ލިބިގެންދާނެ ކަމަށް ސައީދު ވިދާޅުވިއެވެ. އަދި އެ ތަފާތު ތިން މަސް ދުވަހުގެ ތެރޭގައި ފެނިގެންދާނެ ކަމަށް ވެސް ވިދާޅުވިއެވެ.

މީގެއިތުރުން ރ. އުނގޫފާރު ބިން ހިއްކުމުގެ މަސައްކަތާއި ގުޅޭގޮތުން ވެސް ވަހީދު ވަނީ ވާހަކަ ދައްކަވާފައެވެ. އަދި ބިމުގެ ޖާގަ އިތުރުކޮށްދެއްވުމަށް ވެސް ވަނީ އެދިވަޑައިގަންނަވާފައެވެ.

އެމްޓީސީސީން ދީފައިވާ ޝެޑިއުލްގައިވާގޮތުން، ރ. އުނގޫފާރު ބިން ހިއްކުމުގެ މަސައްކަތް ފެށޭނީ އަންނަ އަހަރުގެ ޖޫން މަހުގައި ކަމަށް މިނިސްޓަރ އޮފް ނެޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ މުހައްމަދު އަސްލަމް ވަނީ ދާދިފަހުން ވިދާޅުވެފައެވެ.

މާފަހުން ކޮންޓްރެކްޓް ކުރެވިފައިވާ މަސައްކަތް ފެށިފައިވަނީ ކީއްވެގެންތޯ، އުނގޫފާރު ދާއިރާގެ މެންބަރު މުހައްމަދު ވަހީދު ކުރެއްވި ސުވާލުގެ ޖަވާބުގައި މިނިސްޓަރު ވިދާޅުވީ އުނގޫފާރުގެ ބިން ހިއްކުމަށް އެމްޓީސީސީއާއި ހަވާލުކުރެވިފައިވާ ކަމަށެވެ.

އަދި އެމްޓީސިސީން ޝެޑިއުލްއެއް ތައްޔާރުކޮށްފައިވާ ކަމަށާއި، އުނގޫފާރުގެ ބިން ހިއްކުމަށް ޝެޑިއުލް ކުރެވިފައިވަނީ ޖޫން 2023 ގައި ކަމަށެވެ.

ޑިޒައިން އެންޑް ބިލްޑް އުސޫލުން ރ.އުނގޫފާރުގެ 10 ހެކްޓަރުގެ ބިން ހިއްކުމާއި، ގޮނޑުދޮށް ހިމާޔަތްކުރުމުގެ ގޮތުން 1150 މީޓަރުގެ ރިވެޓްމަންޓަކާއި، 75 މީޓަރުގެ ގްރޮއިން ޤާއިމުކުރެވިގެންދާނެއެވެ. މަޝްރޫޢަކީ 240 ދުވަހުގެ ތެރޭގައި ނިންމުމަށް ހަވާލުކޮށްފައިވާ މަޝްރޫޢެކެވެ. މި މަސައްކަތް ހަވާލުކޮށްފައިވަނީ މިދިޔަ އަހަރުގެ ޖެނުއަރީ މަހުގެ 31 ވަނަ ދުވަހުއެވެ.