ވިލިމާލެ ފަރަށް ލިބުނު ގެއްލުމުގެ ތަފްސީލުތައް ހަފްތާއެއްގެ ތެރޭގައި ލިބޭނެ: އީޕީއޭ
ދިރާސާގެ ފީލްޑް ބައި މިހާރު ވަނީ ނިމިފައި
ވިލިމާލެ ފަރަށް ލިބިފައިވާ ގެއްލުންތައް ފެންނަ ފޮޓޯއެއް
ތިލަމާލެ ބްރިޖްގެ ޖިއޯ ޓެކްނިކަލް ދިރާސާތަކަށް ގެނެސްފައިވާ ސެލްފް އެލެވޭޓިންގ ޕްލެޓްފޯމް (އެސްއީޕީ)، ވިލިމާލެ ފަރަށް އެރުމުގެ ސަބަބުން ފަރަށް ލިބުނު ގެއްލުމުގެ ތަފްސީލުތައް ހަފްތާއެއްހާ ދުވަހުގެ ތެރޭގައި ލިބޭނެ ކަމަށް އީޕީއޭގެ ޑިރެކްޓަރ ޖެނަރަލް އިބްރާހިމް ނައީމް ވިދާޅުވެއްޖެއެވެ.
މި ޕްލެޓްފޯމް ފަރަށް އެރުމުގެ ސަބަބުން ފަރަށް ލިބުނު ގެއްލުމުގެ ސަރވޭގެ މަސައްކަތް އީޕީއޭއިން ފަށާފައިވަނީ މިމަހުގެ 6 ވަނަ ދުވަހުއެވެ. މި މަސައްކަތް މިހާރު ނިންމާލާފައިވާއިރު އީޕީއޭއިން ވަނީ ފަރުގެ ބައެއް ފޮޓޯތައް އީޕީއޭގެ ޓްވިޓަރގައި ހިއްސާކޮށްފައެވެ. އެ ފޮޓޯތަކުން ފެންނަ ގޮތުގައި ޕްލެޓްފޯމް އޮތް ތަނުގައި ފުން ވަޅުގަނޑުތަކެއް ވަނީ ހެދިފައެވެ.
މި ސަރވޭއާ ގުޅޭގޮތުން ރާއްޖެ އެމްވީއަށް މައުލޫމާތުދެއްވަމުން އީޕީއޭގެ ޑިރެކްޓަރު ޖެނެރަލް ނައީމް ވިދާޅުވީ ފަރަށް ލިބުނު ގެއްލުން ބެލުމަށް ފަށާފައިވާ ދިރާސާގެ ފީލްޑް ބައި މިހާރު ނިމިފައިވާ ކަމަށެވެ. ފަރަށް ގެއްލުންތަކެއް ލިބިފައިވާކަމަށާއި، އެހެންނަމަވެސް ލިބިފައިވަނީ ކިހާ ބޮޑު ގެއްލުންތަކެއް ކަން އެނގޭނީ ސަރވޭގެ ނަތީޖާ ލިބުމުން ކަމަށް ނައީމް ވިދާޅުވިއެވެ. ސަރވޭއިން ފާހަގަވި ކަންކަން އެނަލައިޒް ކޮށް ނިންމާ ހަފްތާއެއްހާ ދުވަހުގެ ތެރޭގައި ލިބުނު ގެއްލުމުގެ އިތުރު ތަފްސީލު ލިބޭނެ ކަމަށް ނައީމް ވިދާޅުވިއެވެ.
ސަރވޭގެ މަސައްކަތް އީޕީއޭއިން ކުރަމުންދާއިރު މި ޕްލެޓްފޯމް ވިލިމާލެ ފަރަށް އެރުމުގެ ސަބަބުން އެ ސަރަހައްދަށް ވެއްޓުނު ދަގަނޑުތައް ނަގައި އެ ސަރަހައްދު އެއްކޮށް ސާފުކޮށްފައިވާ ކަމަށް، ބްރިޖުގެ މަސައްކަތް ކުރަމުންދާ އެފްކޮންސްއިން ވަނީ ބުނެފައެވެ.
އެ ކުންފުނިން ބުނީ އާދިއްތަ ދުވަހު އެ ސަރަހައްދު އެއްކޮށް ސާފުކޮށްފައިވާ ކަމަށާއި، އެ މަސައްކަތް ނުނިމި ލަސްވީ މޫސުން ގޯސްވުމުގެ ސަބަބުން ކަމަށެެވެ. އެ ކުންފުނިން ބުނީ މަސައްކަތް ފެށީ މިދިޔަ މަހު 28ގައި ކަމަށާއި އޭރުވެސް މޫސުން ގޯސްކަމަށެވެ. އެހެންނަމަވެސް ޕްލެޓްފޯމް ފަރަށް އެރި ސަރަހައްދު ސާފުކޮށް ނިންމާފައިވަނީ އެންމެ ރަނގަޅު ވަސީލަތްތައް ބޭނުންކޮށްގެން ކަމަށްވެސް އެ ކުންފުނިން ވަނީ ބުނެފައެވެ.
އެ މަޝްރޫއު ހިންގަމުންއަންނަ އިންޑިއާގެ އެފްކޮންސް ކުންފުނިން ކުރިން ބުނީ ޕްލެޓްފޯމް ފުންނުކުރެވި ލަސްވީ މޫސުން ގޯސްވުމުގެ ސަބަބުން ކަމަށެވެ. އަދި ޕްލެޓްފޯމް ވިލިމާލޭ ފަރަށް ބީހެން ދިމާވީ މޫސުން ގޯސްވެ ވައިގަދަވުމާއި ރާޅު ބޮޑުވުމުގެ ސަބަބުން ކަމަށާއި، އެ ހާދިސާ ހިނގީ އެ ސަރަހައްދުގައި ޕްލެޓްފޯމް އަޅާފައި ބޭއްވުމަށް މަސައްކަތް ކުރަމުންދަނިކޮށް ކަމަށްވެސް އެ ކުންފުނިން ބުނެފައިވެއެވެ.
އެ ޕްލެޓްފޯމް ފުންކޮށްފައިވަނީ އޮގަސްޓް މަހުގެ 28 ވަނަ ދުވަހު، އެ ޕްލެޓްފޯމް ފަރަށް އެރިތާ 12 ދުވަސް ފަހުންނެވެ.
