ހިތަދޫ ވަލުތެރޭގައި ރޯވި އަލިފާންގަނޑު ނިއްވާލައިފި
7 ސެޕްޓެމްބަރު 2022 | ބުދަ 21:12އަލިފާންގަނޑު ނިއްވާލާފައިވަނީ ބުދަ ދުވަހުގެ ރޭ 20:20ހާއިރު
އައްޑޫ ސިޓީ ހިތަދޫ ވަލުތެރޭގައި ރޯވި އަލިފާންގަނޑު ނިއްވާލުމުގެ މަސައްކަތުގައި
އައްޑޫ ސިޓީ ހިތަދޫ ބޮޑުމަގު ބުރުކައިރީ ވަލުތެރޭގައި ހުރި ގަސްތަކެއްގައި ރޯވި އަލިފާންގަނޑު ނިއްވާލައިފިއެވެ.
އެމްއެންޑީއެފުން ބުނީ އެމްއެންޑީއެފް ސަދަން އޭރިއާ ކޮމާންޑް، ސ. ހިތަދޫ ފަޔަރ ސްޓޭޝަންގެ ފަޔަރމަނުން އަލިފާންގަނޑު ނިއްވާލާފައިވާކަމަށެވެ. މި ހާދިސާގެ މައުލޫމާތު ބުދަ ދުވަހުގެ ހަވީރު 17:25ހާއިރު އެމްއެންޑީއެފް ސަދަން އޭރިއާ ސ. ހިތަދޫ ފަޔަރ ސްޓޭޝަނަށް ލިބުމާއެކު އެ ސްޓޭޝަންގެ ސިފައިން އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ފެށިއެވެ.
އަދި ފަޔަރމަނުން ކުރި މަސައްކަތުން ރޯވެފައިހުރި އަލިފާންގަނޑު ނިއްވާލާފައިވަނީ ބުދަ ދުވަހުގެ ރޭ 20:20 ހާއިރުއެވެ. މިހާދިސާގައި އެއްވެސް މީހަކަށް ގެއްލުމެއް ލިބިފައިނުވާކަމަށް އެމްއެންޑީއެފުން ބުނެއެވެ.
އަލިފާން ރޯވާން ދިމާވި ސަބަބެއް އެމްއެންޑީއެފުން ހާމަކޮށްފައެއްނުވެއެވެ.
