ކިންގް ޢަބްދުލް ޢަޒީޒު އިންޓަރނޭޝަނަލް ޤުރުއާން މުބާރާތުގައި ރާއްޖޭގެ 2 ބައިވެރިން
މި މުބާރާތުގެ ބައިވެރިން ފުރަން ހަމަޖެހިފައިވަނީ ހުކުރު ދުވަހު
އިސްލާމިކް މިނިސްޓަރު - މުބާރާތުގެ ބައިވެރިންނާއި އެ ބައިވެރިންގެ ބެލެނިވެރިންނާ ބައްދަލުކުރެއްވުން
42 ވަނަ "ކިންގް ޢަބްދުލް ޢަޒީޒް އިންޓަރނޭޝަނަލް ކޮމްޕެޓިޝަން އޮފް ދަ ހޮލީ ޤުރުއާން"ގައި ރާއްޖެ ތަމްސީލުކުރާ ދެ ބައިވެރިން އަންނަ ހުކުރު ދުވަހު ސަޢޫދީއަށް ފުރަން ހަމަޖެހިފައިވާކަމަށް އިސްލާމިކް މިނިސްޓްރީން ބުނެފިއެވެ.
އެ މިނިސްޓްރީން ބުނިގޮތުގައި މިފަހަރު ރާއްޖެއިން މި މުބާރާތް ތަމްސީލުކުރަނީ އަޙްމަދު ނަބީހު ޢަބްދުލް ޤާދިރުއާއި މުޙައްމަދު ޔޫޝަޢު ބިން ޒަމްޒަމްއެވެ. މި ބައިވެރިންނާއިއެކު ބައިވެރިންގެ ބެލެނިވެރިންވެސް ސަޢޫދީއަށް ފުރުމަށް ހަމަޖެހިފައިވާކަމަށް އިސްލާމިކް މިނިސްޓްރީން ބުނެއެވެ.
މި މުބާރާތް ކުރިއަށްދާނީ ސެޕްޓެމްބަރު މަހުގެ 10ން 21ށް މައްކާގައެވެ. މި މުބާރާތުގައި ރާއްޖޭގެ ފަރާތުން ބައިވެރިވާނެ ފަރާތްތައް ހޮވުމަށް ހުޅުވާލި ފުރުސަތުގައި 6 މީހަކު އެޕްލިކޭޝަން ހުށަހެޅިކަމަށް އިސްލާމިކް މިނިސްޓްރީން ބުނެއެވެ.
މިމުބާރާތަށް ބައިވެރިން ހޮވާފައިވަނީ ކީރިތި ޤުރުއާނާބެހޭ ޤައުމީ މަރުކަޒުން ކުރިއަށްގެންދިޔަ އޮޑިޝަނަކުންނެވެ. މި އޮޑިޝަން ކުރިއަށްގެންގޮސްފައިވަނީ ބެލެނިވެރިންގެ ހާޒިރުގައި، ފަނޑިޔާރުންގެ ޕެނަލަކުންނެވެ.
މިނިސްޓަރ އޮފް އިސްލާމިކް އެފެއާޒް ޑރ. އަޙްމަދު ޒާހިރު ޢަލީ ބުދަ ދުވަހު ވަނީ މި މުބާރާތުގައި ރާއްޖޭގެ ފަރާތުން ބައިވެރިވާ ބައިވެރިންނާއި އެކުދިންގެ ބެލެނިވެރިންނާ ބައްދަލުކުރައްވައި މަރުހަބާ ވިދާޅުވެފައެވެ.
މުބާރާތް ނިންމައި ބައިވެރިން ރާއްޖެ އައުމަށް ހަމަޖެހިފައިވަނީ 23 ސެޕްޓެންބަރު 2022ގައެވެ.
