ޗެމްޕިއަން ރެއާލް މެޑްރިޑުން ދެވަނަ ހާފްގައި ޖެހި ލަނޑުތަކުން ސެލްޓިކް ބަލިކޮށް, ޗެމްޕިއަންސްލީގުގެ ފެށުން ރަނގަޅުކޮށްފިއެވެ.
މި ފުޓުބޯޅަ މެޗު ރެއާލްއިން ކާމިޔާބުކުރީ 3-0 ނެވެ. މެޗުގައި ރެއާލްގެ ތިން ލަނޑުވެސް ޖެހީ ދެވަނަ ހާފްގައެވެ. މެޗުގެ 30 ވަނަ މިނެޓުގައި ބެންޒިމާގެ ބަދަލުގައި ކުޅެން ނުކުތް ހަޒާޑް ވަނީ ރެއާލްއިން ޖެހި ތިން ލަނޑުގެ ތެރެއިން ދެ ލަނޑުގައި ހިއްސާވެފައެވެ. ކެޕްޓަން ބެންޒިމާ ބަދަލުކުރަން ޖެހުނީ އަނިޔާ ވެގެންނެވެ. ދެވަނަ ހާފް ފަށައިގެން ހަވަނަ މިނެޓުގައި ރެއާލްގެ ފުރަތަމަ ލަނޑު ޖެހީ ވިނީޝިއުސް ޖޫނިއަރއެވެ. ދެވަނަ ލަނޑު ޖަހަން މޮޑްރިޗަށް އެހީވީ ހަޒާޑްއެވެ. އަދި ތިންވަނަ ލަނޑު ޖެހީ ހަޒާޑްއެވެ.
ފަސް އަހަރަށްފަހު ޔޫރަޕްގެ އެންމެ ބޮޑު ކްލަބް މުބާރާތުގައި ވާދަކުރާ ސެލްޓިކުން ވަނީ ފުރަތަމަ ހާފްގައި ރެއާލްއަށް ރަނގަޅު ފައިޓެއް ދީފައެވެ. މިގްރޫޕްގެ އަނެއް މެޗުގައި ޝަޚުތަރު ޑޮނެސްކުން ވަނީ 4-1 ން އާރުބީ ލައިބްޒިގް ބަލިކޮށްފައެވެ. ގްރޫޕްގެ އެއްވަނައިގައި އޮތީވެސް ޝަހުތަރު ޑޮނެސްކެވެ.
