ވޯލްޑްކަޕުގައި ގަތަރުގެ ސަލާމަތީކަންކަން ބަލަހައްޓަން އިޓަލީން ވެސް ބައިވެރިވާނެ
7 ސެޕްޓެމްބަރު 2022 | ބުދަ 03:45އިޓަލީގެ ވައިގެ ސިފައިން ގަތަރުގައި ހަރަކާތްތެރިވާން އެގްރީމަންޓްގައި ސޮއިކުރީ އިއްޔެ
ވޯލްޑްކަޕުގެ ތައްޔާރީތަކުގެ ތެރެއިން
ގަތަރުގައި އަންނަ ނޮވެމްބަރު މަހު 20ގައި ފަށާ ވޯލްޑްކަޕް ފުޓްބޯޅަ މުބާރާތުގެ ސެކިއުރީޓީ ބަލަހައްޓަން އިޓަލީ ވެސް ބައިވެރިވާން ނިންމައިފި އެވެ.
މިކަމަށް ދެ ގައުމުގެ ފަރާތުން ރަސްމީކޮށް މިހާރުވަނީ އިޓަލީގެ ރޯމުގައި އެގްރީމަންޓްގައި ސޮއިކޮށްފަ އެވެ. ނަމަވެސް އިޓަލީން ގަތަރުގައި އަދާކުރާނެ ދައުރެއް އެއްވެސް ގައުމަކުން އަދި ބުނެފަ އެއްނުވެ އެވެ. ނަމަވެސް މި އެގްރީމަންޓްގައި އިޓަލީގެ ފަރާތުން ސޮއިކުރީ އެގައުމުގެ އެއާފޯސް ޑިޕާޓްމަންޓްގެ އޮޕަރޭޝަން ކޮމާންޑަރު ފެނާންޑޯ ކޮސާނިއާ އެވެ. ގަތަރުގެ ފަރާތުން ސޮއިކުރީ ވޯލްޑް ކަޕް އޮގަނައިޒިން ކޮމިޓީގެ ޗެއާމަން މޭޖަރ ޖެނެރަލް މުހައްމަދު އަބްދުއްލަތީފް އަލްމަންނާއީ އެވެ.
މިހެންވެ އިޓަލީން ބޮޑަށް ހަރަކާތްތެރިވާނީ ވައިގެ މަގުން ސަލާމަތީ ކަންކަން ބެލެހެއްޓުމުގައި ކަމަށް ވަނީ ޔަގީންކުރެވިފަ އެވެ.
ވޯލްޑްކަޕުގައި ދިފާއީކަންކަން ވަރުގަދަ ކުރުމަށް އަވަށްޓެރި އަދި އެކުވެރި ގައުމުތަކުގެ އެހީ ގަތަރުން ދަނީ ހޯދަމުންނެވެ. މި ގޮތުން ޔޫއޭއީ އާއި ސައޫދީ އަރަބިއާ އަދި ޕާކިސްތާނާއި އިނގިރޭސި ސިފައިން ވެސް ގަތަރުގެ ސަލާމަތީކަންކަން ބެލެހެއްޓުމުގައި ހަރަކާތްތެރިވާން ވަނީ ނިންމައިފަ އެވެ.
ގަތަރަކީ ހަނގުރާމަވެރި ބައެއް ޖަމާއަތްތަކަށް މާލީ އެހީތެރިކަން ފޯރުކޮށްދޭ ގައުމަކަށްވުމުން މިކަމާމެދު ހިތްހަމަނުޖެހޭ ޖަމާއަތްތަކުން ގަތަރަށް ވޯލްޑްކަޕް ދުވަސްވަރު ހަމަލާދީފާނެ ކަމުގެ ބިރު އޮތުމުން ގަތަރުން ދަނީ ދިފާއީކަންކަން ވަރަށް ބޮޑަށް ވަރުގަދަ ކުރަމުންނެވެ.
