ޔުނައިޓެޑުން ޖާގަ ނުލިބުނަސް ހެރީ މެގުއާ ގައުމީ ޓީމަށް ނަގަނީ
7 ސެޕްޓެމްބަރު 2022 | ބުދަ 03:42ގައުމީ ކޯޗު ވަނީ މެގުއާ އަށް ގައުމީ ޓީމުގެ ޖާގަ ދޭނެ ކަމުގެ ޔަގީންކަން ދީފައި
އިނގިރޭސި ކޯޗު ސައުތުގޭޓް (ވ) އާއި ޑިފެންޑަރު މެގުއާ: ގައުމީ ޓީމުން އޭނާ އަށް ޖާގަ ދޭނެ
މެންޗެސްޓާ ޔުނައިޓެޑްގެ ފުރަތަމަ 11 އަށް ނޭރި ނަމަވެސް ޑިފެންޑަރު ހެރީ މެގުއާއަށް އިނގިރޭސި ގައުމީ ޓީމުން ޖާގަ ނުގެއްލޭނެ ކަމުގެ ޔަގީންކަން އޭނާ އަށް ދީފި އެވެ.
މި ސީޒަނުގެ ފުރަތަމަ ދެ ފުޓުބޯޅަ މެޗުގައި ދެއްކި ފީކަޅާ ކުޅުމުގެ ސަބަބުން ޔުނައިޓެޑްގެ ކޯޗު އެރިކް ޓެންހަގް ވަނީ މެގުއާ ބެންޗަށް ބަދަލުކޮށްފަ އެވެ. އޭގެ ފަހުން ކުޅުނު އެއްވެސް މެޗެއްގައި އޭނާއަށް ފުރަތަމަ 11އިން ޖާގަ ނުލިބެ އެވެ.
ނަމަވެސް ރިޕޯޓްތައް ބުނާގޮތުން އިނގިރޭސި ކޯޗު ގެރެތް ސައުތުގޭޓް ވަނީ މެގުއާ ގުޅައި މިގޮތަށް ކަންތައް މެދުވެރިވި ނަމަވެސް ގައުމީ ޓީމުގެ ފުރަތަމަ 11އިން އޭނާ ބާކީނުވާނެ ކަމުގެ ޔަގީންކަންދީފަ އެވެ.
ޔުނައިޓެޑުގައި ދަށްކުޅުނު ނަމަވެސް މެގުއާ ވަނީ ގައުމީ ޓީމުގައި އެންމެ ފަހުން ކުޅުނު ގިނަ މެޗުތަކެއް ރަނގަޅު ކުޅުމެއް ދައްކައިފަ އެވެ.
އިނގިރޭސި ގައުމީ ޓީމު ޔޫއޭފާ ނޭޝަންސް ލީގުގައި ޖަރުމަނާއި އިޓަލީއާ ދެކޮޅަށް ކުޅޭ ޓީމުގައި މެގުއާ އަށް ކޯޗު ސައުތުގޭޓް މުހިންމު ރޯލެއް ދޭނެ ކަމަށް ވެސް ވަނީ ޔަގީންކުރެވިފަ އެވެ. މިގޮތަށް އަމަލުކުރަން ކޯޗު ނިންމީ ވޯލްޑްކަޕް ފުޓްބޯޅަ މުބާރާތް ނުހަނު ގާތްވެފައިވާއިރު އިތުބާރުހިފޭ ކުޅުންތެރިއެއްގެ ކޮންފިޑެންސް ދަށްވިޔަ ނުދިނުމަށެވެ.
